କାଲି ଅଚାନକ ଇସ୍ତଫା, ଆଜି ଆକସ୍ମିକ ଚୟନ । ଭୂପେନ୍ଦ୍ର ପଟେଲ ହେବେ ଗୁଜରାଟର ପରବର୍ତ୍ତୀ ମୁଖ୍ୟମନ୍ତ୍ରୀ ।
କନକ ବ୍ୟୁରୋ: ୨୪ ଘଣ୍ଟା ମଧ୍ୟରେ ବିଜେପି ଗୁଜରାଟର ନୂଆ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିଛି । ଭୂପେନ୍ଦ୍ର ପଟେଲ ଗୁଜରାଟର ନୂଆ ମୁଖ୍ୟମନ୍ତ୍ରୀ ହେବେ । ଭୂପେନ୍ଦ୍ର ପଟେଲ ୨୦୧୭ରେ ପ୍ରଥମ ଥର ଲାଗି ବିଧାୟକ ହୋଇଛନ୍ତି ଓ ମାତ୍ର ୪ ବର୍ଷ ମଧ୍ୟରେ ହିଁ ମୋଦି-ଶାହ ଯୋଡି ତାଙ୍କୁ ମୁଖ୍ୟମନ୍ତ୍ରୀ ପଦରେ ବସାଇଛନ୍ତି । ଗାନ୍ଧିନଗରରେ ବିଜେପି ବିଧାୟକ ଦଳ ବୈଠକ ପରେ ଭୂପେନ୍ଦ୍ରଙ୍କୁ ନୂଆ ନେତା ବଛାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗୁଜରାଟରେ ବିଜୟ ରୂପାଣୀଙ୍କ ଇସ୍ତଫା ଯେଭଳି ଆଶ୍ଚର୍ଯ୍ୟଜନକ ଥିଲା, ସେହିଭଳି ଭୂପେନ୍ଦ୍ର ପଟେଲଙ୍କ ନାଁ ଘୋଷଣା ବି ସମସ୍ତଙ୍କୁ ଚମକାଇ ଦେଇଛି । ଉତ୍ତରାଖଣ୍ଡ ଓ କର୍ଣ୍ଣାଟକ ଭଳି ଏଠାରେ ବି ମୋଦି-ଶାହଙ୍କ ଯୋଡି ସରପ୍ରାଇଜ ଫ୍ୟାକ୍ଟରକୁ କାଏମ ରଖିଛନ୍ତି । ବଡ ବଡ ନେତାଙ୍କୁ ପଛର ପକାଇ ରେସରେ ନଥିବା ନେତାଙ୍କୁ ଗୁଜରାଟର ମୁଖ୍ୟମନ୍ତ୍ରୀ କରାଯାଇଛି । ଶନିବାର ବିଜୟ ରୂପାଣୀ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ନୀତିନ ପଟେଲ , ମନସୁଖ ମାଣ୍ଡବ୍ୟ ଭଳି ନେତା ରେସରେ ଆଗରେ ଅଛନ୍ତି ବୋଲି ଚର୍ଚ୍ଚା ଜୋର ଧରିଥିଲା । ରେସରେ ନଥିଲେ ଭୂପେନ୍ଦ୍ର ପଟେଲ କିନ୍ତୁ ୨୦୨୨ ବିଧାନସଭା ନିର୍ବାଚନ ପୂର୍ବରୁ ମୋଦି-ଶାହ ନିଜ ଗଡରେ ଭୂପେନ୍ଦ୍ରଙ୍କୁ ମୁଖ୍ୟମନ୍ତ୍ରୀ ଦାୟିତ୍ୱ ଦେଇଛନ୍ତି ।
କୁହାଯାଉଛି ନୂଆ ମୁଖ୍ୟମନ୍ତ୍ରୀଙ୍କ ସ୍କ୍ରିପ୍ଟ ଦିଲ୍ଲୀରେ ଲେଖାଯାଇଥିଲା ଓ ଗୁଜରାଟରେ ଏହାର ଘୋଷଣା ହେଲା । ରାଜନୈତିକ ନିଷ୍ପତ୍ତି କ୍ଷେତ୍ରରେ ମୋଦି-ଶାହ ସବୁବେଳେ ପରିପକ୍ୱ ନିଷ୍ପତ୍ତି ନେଇ ଚର୍ଚ୍ଚାରେ ରହିଥାନ୍ତି । ଆଉ ଏହାର ସଙ୍କେତ କାହାକୁ ବି ମିଳିନଥାଏ । ତେବେ ୫୯ ବର୍ଷୀୟ ଭୂପେନ୍ଦ୍ର ପଟେଲଙ୍କ ସଙ୍ଗଠନ ଉପରେ ଭଲ ପ୍ରଭାବ ରହିଛି । ସେ ଗୁଜରାଟରେ ପ୍ରଭାବ ରଖିଥିବା ପାଟିଦାର ସମୁଦାୟରୁ ଆସିଛନ୍ତି । ଦୀର୍ଘ ଦିନ ହେବ ଆରଏସସ ସହ ବି ଜଡିତ ଅଛନ୍ତି । ଏବେ ସଙ୍ଗଠନକୁ ଏକାଠି ରଖି ନିର୍ବାଚନକୁ ଓହ୍ଲାଇବା ଭୂପେନ୍ଦ୍ରଙ୍କ ପାଇଁ ବଡ ଚ୍ୟାଲେଞ୍ଜ ହେବ ।