ହାଇଦ୍ରାବାଦ ନଗର ନିଗମ ନିର୍ବାଚନରେ ବିଜେପିର ଦମଦାର ପ୍ରଦର୍ଶନ । ୪୯ ଆସନ ଦଖଲ ସହ ଦ୍ୱିତୀୟ ବଡ ଦଳ ଭାବେ ଉଭା । କେସିଆରଙ୍କ ଟିଆରଏସକୁ ୫୬ ଓ ଓବେସୀଙ୍କ ଏଆଇଏମଆଇଏମକୁ ୪୩ଟି ଆସନ
କନକ ବ୍ୟୁରୋ : ଦେଶର ଅନ୍ୟତମ ସବୁଠାରୁ ବଡ ନଗର ନିଗମ ଗ୍ରେଟର ହାଇଦ୍ରାବାଦ ନଗର ନିଗମ ନିର୍ବାଚନରେ ଜବରଦସ୍ତ ପ୍ରଦର୍ଶନ କରିଛି ବିଜେପି । ଏଥର ୪୯ଟି ଆସନରେ ବିଜୟୀ ହୋଇଛି ଭାରତୀୟ ଜନତା ପାର୍ଟି । କେସିଆରଙ୍କ ଟିଆରଏସ ସବୁଠାରୁ ବଡ ଦଳ ଭାବେ ୫୬ଟି ଆସନରେ ବିଜୟୀ ହୋଇଥିଲେ ମଧ୍ୟ ଗତ ନିର୍ବାଚନ ତୁଳନାରେ ବହୁ ଆସନ ହରାଇଛି । ସେହିପରି ଅସଦଉଦିନ ଓବେସୀଙ୍କ ଦଳ ଏଆଇଏମଆଇଏମ ୪୩ଟି ଆସନ ଦଖଲ କରିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ୧୫୦ ଆସନ ବିଶିଷ୍ଟ ଏହି ନଗର ନିଗମର ବହୁମତ ସଂଖ୍ୟା ୭୫ ହୋଇଥିବାବେଳେ କୌଣସି ଦଳକୁ ବହୁମତ ମିଳି ନାହିଁ । ବିଜେପିକୁ ଏତେ ଆସନ ମିଳିବା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଟୁଇଟ୍ କରି କହିଛନ୍ତି, ତେଲେଙ୍ଗାନାର ଜନତା ପ୍ରଧାନମନ୍ତ୍ରୀ ମୋଦିଙ୍କ ଉପରେ ଭରସା କରିଥିବାରୁ ଧନ୍ୟବାଦ ।
ସେହିପରି ଓବେସୀଙ୍କ ଦଳ ମଧ୍ୟ ଭଲ ପ୍ରଦର୍ଶନ କରିଥିବାରୁ ସେ ହାଇଦ୍ରାବାଦର ଜନତାଙ୍କୁ ଧନ୍ୟବାଦ ଦେଇଛନ୍ତି । ଏହି ନଗରନିଗମ ନିର୍ବାଚନରେ ବିଜେପି ତାର ପୁରା ଶକ୍ତି ଲଗାଇ ଦେଇଥିଲା । କାରଣ ତେଲେଙ୍ଗାନାର ରାଜନୀତିରେ ହାଇଦ୍ରାବାଦ ନଗର ନିଗମ ବେଶ ଗୁରୁତ୍ୱ ବହନ କରିଥାଏ । କୁହାଯାଏ ଏହି ନିର୍ବାଚନର ଫଲ ବିଧାନସଭା ନିର୍ବାଚନକୁ ପ୍ରଭାବିତ କରିଥାଏ ।