ସୁଜାତା କାର୍ତ୍ତିକେୟନଙ୍କ ବୟାନକୁ ବିଜେପିର ଟାର୍ଗେଟ : ମିଶନ ଶକ୍ତି ଅଧିକାରୀଙ୍କ ବୈଠକରେ ଅଶାଳୀନ ଶବ୍ଦ ପ୍ରୟୋଗର ଅଭିଯୋଗ

କନକ ବ୍ୟୁରୋ : ମିଶନ ଶକ୍ତି ବିଭାଗ ଅଧିକାରୀଙ୍କ ବୈଠକରେ ଯୋଗଦେଇ ସଚିବ ସୁଜାତା କାର୍ତ୍ତିକେୟନ୍ ଦେଇଥିବା ବୟାନ ଉପରେ ପ୍ରଶ୍ନ ଉଠାଇଛି ବିଜେପି । ସାମ୍ବାଦିକ ସମ୍ମିଳନୀ କରି ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା କହିଛନ୍ତି ମିଶନ ଶକ୍ତିକୁ ଶାସକ ବିଜେଡି ଦଳୀୟ କାର୍ଯ୍ୟକ୍ରମ କରି ସାରିଲାଣି । ଏହାର ନେତୃତ୍ୱ ଏବେ ବିଭାଗୀୟ ସଚିବ ସୁଜାତା କାର୍ତ୍ତିକେୟନ୍ ନେଉଛନ୍ତି ।

ବୈଠକରେ ଅଶ୍ଳୀଳ ଓ ଅଶାଳୀନ ଶବ୍ଦର ବ୍ୟବହାର କରାଯାଇଥିବା ଅଭିଯୋଗ କରିଛି ବିଜେପି । ଯାହା ଓଡ଼ିଆଙ୍କ ପ୍ରତି ଅପମାନ ବୋଲି ଦଳ କହିଛି । ଏହା ସହ ବିଜେପି ଅଭିଯୋଗ କରିଛି ଯେ, ବିଜେଡି ଏଜେଣ୍ଡାକୁ ଠିକ୍ ଭାବେ କାର୍ଯ୍ୟକାରୀ କରାନଗଲେ ସ୍ଥାନୀୟ ଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଲକ୍ଷ୍ମୀ ବିଏସକେୱାଇ ଯୋଜନାରେ ଏସଏଚଜି ମହିଳାଙ୍କୁ ଯୋଡିବା ପାଇଁ ଚିପ୍ ବେସ୍ ସ୍ମାର୍ଟକାର୍ଡ ଦିଆଯିବ ।

ଏସଏଚଜି ଜରିଆରେ ଭୋଟରଙ୍କୁ କଳା ଟଙ୍କା ପଠାଇବାର ସୁଚିନ୍ତିତ ଯୋଜନା ପ୍ରସ୍ତୁତ କରାଯାଉଛି । ସେହିପରି ଯେଉଁମାନେ ଭଲ କାମ କରିବେ ତାଙ୍କୁ ଦୁବାଇ, ସିଙ୍ଗାପୁର ବୁଲିବା ପାଇଁ ନିଆଯିବ ବୋଲି ମଧ୍ୟ ବିଭାଗୀୟ ସଚିବ ବୈଠକରେ କହିଛନ୍ତି । ମିଶନ ଶକ୍ତି ଜରିଆରେ ରାଜ୍ୟ ସରକାର ନିର୍ବାଚନ ପାଇଁ ପ୍ରସ୍ତୁତ ହେଉଛନ୍ତି ବୋଲି କହିଛନ୍ତି ବିଜେପି ମୁଖପାତ୍ର ।