ମୁଖ୍ୟ ନିର୍ବାଚନ କମିଶନଙ୍କୁ ଫେରାଦ ହେଲା ବିଜେପି ଟିମ୍ । କିଛି ବୁଥରେ ସାନି ମତଦାନ ଦାବି, ସିଇଓଙ୍କ ବିରୋଧରେ ଆଣିଲେ ସାଂଘାତିକ ଅଭିଯୋଗ ।
କନକ ବ୍ୟୁରୋ: ଓଡ଼ିଶାରେ ୪ଟି ପର୍ଯ୍ୟାୟରେ ସରିଲା ନିର୍ବାଚନ ବଢ଼ିଲା ରାଜନୀତି । ଦିଲ୍ଲୀ ଯାଇ ଭାରତୀୟ ନିର୍ବାଚନ କମିଶନଙ୍କୁ ଭେଟିଲା ଓଡ଼ିଶା ବିଜେପି ପ୍ରତିନିଧି ଦଳ । ତେବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଭୁବନେଶ୍ୱର ବିଜେପି ଲୋକସଭା ପ୍ରାର୍ଥୀ ଅପରାଜିତା ଷଡ଼ଙ୍ଗୀ ଓ ପୁରୀ ବିଜେପି ଲୋକସଭା ପ୍ରାର୍ଥୀ ସମ୍ବିତ ପାତ୍ର ଇସିଆଇଙ୍କୁ ଭେଟିଛନ୍ତି । ଭେଟିବା ପରେ ଧର୍ମେନ୍ଦ୍ର କହିଛନ୍ତି କି, ଗତ ୨୯ ତାରିଖରେ ରାଜ୍ୟରେ ହୋଇଥିବା ଅନ୍ତିମ ପର୍ଯ୍ୟାୟ ନିର୍ବାଚନରେ ସବୁଠାରୁ ଅଧିକ ହିଂସାକାଣ୍ଡ ହୋଇଛି । ଆଉ ଶାସକ ବିଜେଡି ପାଇଁ କିଛି ଭଷ୍ଟ୍ର ସରକାରୀ ଅଫିସର କାର୍ଯ୍ୟ କରୁଥିବା ଧରାପଡ଼ିଥିଲେ । ଆଉ ସେଥିପାଇଁ ୩ ଜଣ ଅଫିସରଙ୍କୁ ନିଲମ୍ବିତ କରାଯାଇଛି । ଯାହାର ଭିଡ଼ିଓ ତଥ୍ୟ ପ୍ରମାଣ ସବୁ ଇସିଆଇଙ୍କୁ ହସ୍ତାନ୍ତର କରିଛୁ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ବିଜେଡି ପରାଜୟ ଭୟରେ ବିଭିନ୍ନ ସ୍ଥାନରେ ଗୁଣ୍ଡାରାଜ ଖେଳାଉଥିବା ସାଂଘାତିକ ଅଭିଯୋଗ ଆଣି ଇସିଆଇ ସୁନିଲ ଅରୋରାଙ୍କୁ ଅବଗତ କରାଇଲେ ବୋଲି କହିଛନ୍ତି ଧର୍ମେନ୍ଦ୍ର ପ୍ରଧାନ । ଏପରିକି ୧୫ଟି ବିଧାନସଭା କ୍ଷେତ୍ରରେ ଥିବା ବିଭିନ୍ନ ବୁଥରେ ସାନି ମତଦାନ କରିବାକୁ ମୁଖ୍ୟ ନିର୍ବାଚନ କମିଶନଙ୍କୁ ଅନୁରୋଧ କରିଛୁ ବୋଲି କହିଛନ୍ତି ଧର୍ମେନ୍ଦ୍ର । ତେବେ ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀ ଆସି ଇସିଆଇଙ୍କୁ ସାକ୍ଷାତ କରିବା ନେଇ ଧର୍ମେନ୍ଦ୍ର କହିଛନ୍ତି କି, ପାଟକୁରା ନିର୍ବାଚନରେ ପରାଜୟ ଭୟରେ ତାରିଖ ଘୁଞ୍ଚାଇବାକୁ ବାତ୍ୟାର ନାଁ ନେଇ ଚାପ ପକାଇବାକୁ ଚେଷ୍ଟା କରୁଛି ବିଜେଡି । କାରଣ ବାତ୍ୟା ‘ଫୋନି’ର ଲ୍ୟାଣ୍ଡଫଲ୍ ପାଟକୁରା ଠାରୁ ୧୦୦ କିଲୋମିଟର ଦୂରରେ ହେବ ବୋଲି ପାଣିପାକ ବିଭାଗ ଆକଳନ କରିଛି । ହେଲେ ବିଜେଡି ପାଟକୁରାରେ ପରାଜୟ ଭୟରେ ଏଭଳି ଚାପ ପକାଇବାକୁ ଉଦ୍ୟମ କରୁଛି ବୋଲି କହିଛନ୍ତି ଧର୍ମେନ୍ଦ୍ର ।
ସେହିପରି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁରେନ୍ଦ୍ର କୁମାରଙ୍କ ବିରୋଧରେ ମଧ୍ୟ ଇସିଆଇଙ୍କୁ ଅବଗତ କରାଇଛି । କାରଣ ରାଜ୍ୟରେ ହୋଇଥିବା ୪ଟି ପର୍ଯ୍ୟାୟ ନିର୍ବାଚନରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ପକ୍ଷପାତିତା କରିଛନ୍ତି । ସେ ଜଣେ ସବୁଠାରୁ ଅଧିକ ପକ୍ଷପାତିତା କରୁଥିବା ଅଫିସର ବୋଲି ସାଂଘାତିକ ଅଭିଯୋଗ କରିଛନ୍ତି ଧର୍ମେନ୍ଦ୍ର । ପୂର୍ବରୁ ମଧ୍ୟ ତାଙ୍କ ବିରୋଧରେ ଇସିଆଇଙ୍କୁ ଅବଗତ କରାଇଥିଲୁ ଆଉ ଆଜି ମଧ୍ୟ ଇସିଆଇ ସୁନିଲ ଅରୋରାଙ୍କୁ ଅବଗତ କରାଇଛୁ ।