ଦୁଇ ବର୍ଷ ବନ୍ଦ ରହିବା ପରେ ଆସନ୍ତାକାଲି ବିଜେପି ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ । ଆଗାମୀ ବିଧାନସଭା ନିର୍ବାଚନ ନେଇ ରଣନୀତି ପ୍ରସ୍ତୁତ କରିବ ବିଜେପି ।
କନକ ବ୍ୟୁରୋ: କରୋନା କାରଣରୁ ଗତ ଦୁଇ ବର୍ଷ ହେଲା ବନ୍ଦ ରହିଥିବା ବିଜେପିର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ଆସନ୍ତାକାଲି ହେବାକୁ ଯାଉଛି । ଯେଉଁଥିରେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ସମେତ ସମସ୍ତ ରାଜ୍ୟର ପାର୍ଟି ଅଧ୍ୟକ୍ଷ ଓ ମହାସଚିବ ଭାଗ ନେବେ । ଏଥିସହିତ ଆଗାମୀ ବର୍ଷରେ ବିଭିନ୍ନ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନକୁ ନେଇ ମଧ୍ୟ ଏହି ବୈଠକରେ ଆଲୋଚନା ହେବ ।
Kanak News is now on WhatsApp
Join and get latest news updates delivered to you via WhatsApp
ରବିବାର ହେବାକୁ ଥିବା ବିଜେପି ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକରେ ୧୦୦ କୋଟି ଟିକାକରଣକୁ ନେଇ ପ୍ରଧାନମନ୍ତ୍ରୀ ମୋଦୀଙ୍କ ଉଦ୍ଦେଶ୍ୟରେ ଏକ ଧନ୍ୟବାଦ ପ୍ରସ୍ତାବ ପାରିତ ହେବ । ଏହା ସହିତ ଏହି ବୈଠକରେ ପ୍ରଥମେ ଦଳର ଅଧ୍ୟକ୍ଷ ଜେପି ନଡ୍ଡା ଅଭିଭାଷଣ ରଖିବେ ବୋଲି ସୂଚନା ମିଳିଛି । ତେବେ ବିଜେପିର ଏହା ପ୍ରଥମ ହ୍ରାଇବ୍ରିଡ୍ ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ହେବାକୁ ଯାଉଛି । କରୋନା କଟକଣାକୁ ଆଖି ଆଗରେ ରଖି ଏହି ବୈଠକ ବସିବ । ଏଥିରେ ବିଭିନ୍ନ ରାଷ୍ଟ୍ରୀୟ ନେତୃବୃନ୍ଦଙ୍କ ସହିତ ରାଜ୍ୟର ନେତା, ରାଜ୍ୟ ସଭାପତି ଓ ମହାସଚିବ ସାମିଲ ହେବେ । ବୈଠକର ସମାପନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜର ଅଭିଭାଷଣ ରଖିବେ ।
ଆସନ୍ତାବର୍ଷ ଦେଶର ବିଭିନ୍ନ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି । ଉତ୍ତରପ୍ରଦେଶ ସହ ଉତ୍ତରାଖଣ୍ଡ, ଗୋଆ, ମଣିପୁର ଓ ପଞ୍ଜାବ ୨୦୨୨ରେ ବିଧାନସଭା ନିର୍ବାଚନ ଦେଖିବେ । ଏହାକୁ ଆଖି ଆଗରେ ରଖି ଦଳ ନିଜର ରଣନୀତି ମଧ୍ୟ ପ୍ରସ୍ତୁତ କରିବ । ଏହି ସବୁ ରାଜ୍ୟ ଭିତରୁ କେବଳ ପଞ୍ଜାବରେ ଦଳର ସରକାର ନାହିଁ । ତେଣୁ ଏଠାରେ କିପରି ଦଳ ଭଲ ପ୍ରଦର୍ଶନ କରିବା ସହିତ ସରକାର ଗଠନ କରିବ ସେନେଇ କାର୍ଯ୍ୟକାରିଣୀ ବୈଠକରେ ଆଲୋଚନା ହେବ ବୋଲି ସୂଚନା ମିଳିଛି ।