ଲକ୍ଷ୍ମୀପୁରରେ ଚାଷୀଙ୍କ ଉପରେ ଏମିତି ଚଢିଥିଲା ଗାଡି, ବିଜେପି ସାଂସଦ ବରୁଣ ଗାନ୍ଧୀ କହିଲେ, ଭିଡ଼ିଓ ଦେଖିଲେ ଛାତି ଥରି ଉଠିବ ।

317

କନକ ବ୍ୟୁରୋ : ଉତ୍ତରପ୍ରଦେଶ ଲକ୍ଷ୍ମୀପୁର ଖେରି ହିଂସାକାଣ୍ଡର ଆଉ ଏକ ଘଟଣା ଏବେ ସାମ୍ନାକୁ ଆସିଛି । ଯେଉଁ ଭିଡ଼ିଓରେ ପ୍ରଦର୍ଶନ କରୁଥିବା ଚାଷୀଙ୍କ ଉପରେ ଗାଡି ଚଢାଇ ନିଆଯାଉଥିବାର ଦେଖିବାକୁ ମିଳିଛି । ଆଉ ଏହି ଭିଡ଼ିଓକୁ ନେଇ ଯୋଗୀ ସରକାରକୁ ଅଡୁଆରେ ପକାଇଛନ୍ତି ବିଜେପି ସାଂସଦ ବରୁଣ ଗାନ୍ଧୀ । ଉକ୍ତ ଭିଡ଼ିଓରେ ଚାଷୀଙ୍କ ଉପରେ ଗାଡି ମଡାଇ ନେଉଥିବା ଅଭିଯୁକ୍ତଙ୍କୁ ଗିରଫ କରିବାକୁ ଦାବି କରିଛନ୍ତି ବରୁଣ । କେବଳ ବରୁଣ ନୁହଁନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ମଧ୍ୟ ଅଭିଯୁକ୍ତଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ।

ପିଲିଭିତରୁ ସାଂସଦ ଥିବା ବରୁଣ ଟ୍ୱିଟରରେ ଏକ ଭିଡ଼ିଓ ସେୟାର କରି ଲେଖିଛନ୍ତି, ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯାଉ । ଏହି ଭିଡ଼ିଓ ଯେ କୌଣସି ବ୍ୟକ୍ତିର ହୃଦୟକୁ ଥରାଇ ଦେବ । ତେଣୁ ପୋଲିସ ତୁରନ୍ତ ଗାଡି ବାବଦରେ ତଥ୍ୟ ସଂଗ୍ରହ କରିବା ସହ ଗାଡିର ମାଲିକ ଓ ଏଥିରେ ବସିଥିବା ବ୍ୟକ୍ତିଙ୍କୁ ଗିରଫ କରୁ । ଏହାପୂର୍ବରୁ ଲକ୍ଷ୍ମୀପୁର ହିଂସାକାଣ୍ଡକୁ ନେଇ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଚିଠି ଲେଖିଥିଲେ ବରୁଣ ଗାନ୍ଧୀ । ପୂରା ଘଟଣାର ସିବିଆଇ ଯାଞ୍ଚ କରାଯିବା ଉଚିତ ବୋଲି ଦାବି କରିଥିଲେ ବରୁଣ ।

ସେହିଭଳି କେଜ୍ରିୱାଲ କହିଛନ୍ତି, ଏହି ଭିଡ଼ିଓ ଆଇନ ବ୍ୟବସ୍ଥାକୁ ଲଜ୍ଜିତ କଲା ଭଳି । ଯିଏ ବି ଦୋଷୀ ହୁଅନ୍ତୁ ନା କାହିଁକି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ । ଯାହା ଫଳରେ ଚାଷୀଙ୍କୁ ନ୍ୟାୟ ମିଳିବ ।

ଅନ୍ୟପଟେ ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ସିଂ ବାଘେଲ ଉତ୍ତରପ୍ରଦେଶ ଆସୁଥିବା ବେଳେ ତାଙ୍କୁ ବିମାନବନ୍ଦରରେ ରୋକାଯାଇଛି । ଭୂପେଶ କହିଛନ୍ତି, ଉତ୍ତରପ୍ରଦେଶ ଗସ୍ତରେ ଆସି ମୁଁ କଂଗ୍ରେସ କାର୍ଯ୍ୟାଳୟ ଯାଇଥାନ୍ତି । ଦଳୀୟ ନେତାଙ୍କୁ ଦେଖା କରିବା ପରେ ସୀତାପୁର ଯାଇ ପ୍ରିୟଙ୍କା ଗାନ୍ଧୀଙ୍କୁ ଭେଟିଥାନ୍ତେ । କିନ୍ତୁ ତାଙ୍କୁ ଲକ୍ଷ୍ନୌ ବିମାନବନ୍ଦରରେ ରୋକାଯାଇଛି । ଏନେଇ ଭୂପେଶ କହିଛନ୍ତି, ଲକ୍ଷ୍ମୀପୁର ଖେରିରେ ୧୪୪ ଧାରା ଲାଗିଛି, କିନ୍ତୁ ମୋତେ ବିମାନବନ୍ଦରରେ କାହିଁକି ରୋକାଯାଉଛି ବୋଲି ପ୍ରଶ୍ନ କରିଛନ୍ତି ।