ନିର୍ବାଚନ ପୂର୍ବରୁ ବିଜେପି ଦେଲା ବଡ ପ୍ରତିଶ୍ରୁତି: ସଂକଳ୍ପ ପତ୍ରର ଉନ୍ମୋଚନ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
କନକ ବ୍ୟୁରୋ: ୨୦୨୪ ନିର୍ବାଚନ ପାଇଁ ବିଜେପି ଜାରି କରିଛି ସଂକଳ୍ପ ପତ୍ର । ବିଜେପି ମୁଖ୍ୟ କାର୍ଯ୍ୟାଳୟରେ ସଂକଳ୍ପ ପତ୍ରର ଉନ୍ମୋଚନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ବିଜେପି ତା’ର ସଂକଳ୍ପ ପତ୍ରରେ ବିକଶିତ ଭାରତର ସଂକଳ୍ପକୁ ଦୋହରାଇଛି । ସଂକଳ୍ପ ପତ୍ରରେ ବିକଶିତ ଭାରତର ୪ଟି ମଜଭୁତ ସ୍ତମ୍ଭକୁ ଗୁରୁତ୍ୱ ଦେଇଛନ୍ତି ମୋଦୀ । ଏହି ମଜଭୁତ ସ୍ତମ୍ଭ ଗୁଡ଼ିକ ହେଲା, ଯୁବଶକ୍ତି, ନାରୀ ଶକ୍ତି, ଗରିବ ଏବଂ ଚାଷୀ । ଆଗାମୀ ୫ ବର୍ଷ ପାଇଁ ୮୦ କୋଟି ଭାରତୀୟଙ୍କ ମାଗଣା ରାସନ ସହ ଚାଷୀଙ୍କୁ ବାର୍ଷିକ ୬ହଜାର ଟଙ୍କା ପ୍ରଦାନ କରାଯିବା ନେଇ ବିଜେପି ପ୍ରତିଶ୍ରୁତି ଦେଇଛି । ସଂକଳ୍ପ ପତ୍ରରେ ବଡ଼ ପ୍ରତିଶ୍ରୁତି ଦେଇଛନ୍ତି ପ୍ରଧାନମନ୍ତ୍ରୀ । ଏଣିକି ଆୟୁଷ୍ମାନ ଯୋଜନାରେ ସାମିଲ ହେବେ ସବୁ ବର୍ଗର ୭୦ ବର୍ଷରୁ ଅଧିକ ବୟସ୍କ ।
Kanak News is now on WhatsApp
Join and get latest news updates delivered to you via WhatsApp
ମୋଦୀ ଗ୍ୟାରେଂଟିର ପ୍ରତିଶ୍ରୁତି ଦେଇ ବିଜେପି ଜାରି କରିଥିବା ସଂକଳ୍ପପତ୍ରରେ ଯଦିଓ ଲୋଭନୀୟ ଘୋଷଣାକୁ ପ୍ରଥାମିକତା ଦିଆଯାଇ ନାହିଁ, ତଥାପି ପ୍ରତିଶ୍ରୁତିର ପୁଡ଼ିଆରେ ପୁରି ରହିଛି ସର୍ବନିମ୍ନ ଆବଶ୍ୟକତା ପୂରଣ କରିବାର ସୁଯୋଗ । ସ୍ୱାସ୍ଥ୍ୟ, ଖାଦ୍ୟ, ବାସଗୃହ ଭଳି ସର୍ବନିମ୍ନ ଆବଶ୍ୟକତାକୁ ଇସ୍ତାହାରପତ୍ରରେ ପ୍ରାଥମିକତା ଦେଇଛି ଦଳ ।
‘ଆୟୁଷ୍ମାନ’ର ପରିସର ବୃଦ୍ଧି
ଲୋକଙ୍କୁ ମାଗଣା ଚିକିତ୍ସା ଯୋଗାଇ ଦେବା ପାଇଁ ଆୟୁଷ୍ମାନ ଯୋଜନାର ପରିସରକୁ ବୃଦ୍ଧି କରିବାକୁ ପ୍ରତିଶ୍ରୁତି ଦେଇଛି ବିଜେପି । ୭୦ ବର୍ଷରୁ ଉଦ୍ଧ୍ୱର୍ ମଧ୍ୟବିତ ପରିବାରର ଲୋକ ମଧ୍ୟ ଏଣିକି ଆୟୁଷ୍ମାନ ଯୋଜନାରେ ଅନ୍ତର୍ଭୁକ୍ତ ହେବେ । ଏହାସହ ପ୍ରଧାନମନ୍ତ୍ରୀ ଜନ ଔଷଧୀ କେନ୍ଦ୍ରରେ ପୂର୍ବଭଳି ସୁଲଭ ଦରରେ ଔଷଧ ମିଳିବ । ଆୟୁଷ୍ମାନ ଯୋଜନାରେ ଟ୍ରାନ୍ସଜେଣ୍ଡରଙ୍କୁ ମଧ୍ୟ ସାମିଲ୍ କରାଯିବ ।
ଜାରି ରହିବ ମାଗଣା ରାସନ
ଆଗାମୀ ୫ ବର୍ଷ ଯାଏଁ ମାଗଣା ରାସନ ବ୍ୟବସ୍ଥା ଜାରି ରହିବ ବୋଲି ବିଜେପି ଘୋଷଣା କରିଛି । ୮୦ କୋଟି ଭାରତୀୟଙ୍କୁ ମାଗଣା ରାସନ ପ୍ରଦାନ କରାଯିବା ନେଇ ସଂକଳ୍ପପତ୍ରରେ ଘୋଷଣା କରିଛି ବିଜେପି । ଗରିବ କଲ୍ୟାଣ ଯୋଜନା ଅଧିନରେ ଗରିବର ଖାଇବା ଥାଳି ପୋଷଣ ଯୁକ୍ତ ଏବଂ ସନ୍ତୋଷଜଜନକ ହେବ ବୋଲି କୁହାଯାଇଛି ।
୩ କୋଟି ଗୃହ ନିର୍ମାଣ
ଗରିବଙ୍କ ପାଇଁ ଆହୁରି ୩ କୋଟି ଆବାସ ନିର୍ମାଣର ପ୍ରତିଶ୍ରୁତି ଦେଇଛି ଭାରତୀୟ ଜନତା ପାର୍ଟି । ପରିବାରର ବଢ଼ୁଛି ଏବଂ ଏହାକୁ ଦୃଷ୍ଟିରେ ରଖି ଏଭଳି ନିଷ୍ପତି ନେଇଛି ଦଳ । ସେହିପରି ଶସ୍ତାରେ ପାଇପ୍ ଜରିଆରେ ଗ୍ୟାସ ଏବଂ ଗରିବ ଲୋକଙ୍କୁ ମାଗଣା ବିଜୁଳି ଦେବା ପ୍ରତିଶ୍ରୁତି ମଧ୍ୟ ଦିଆଯାଇଛି ।
ଏସବୁ ବାହାରେ
– ଗୋଟିଏ ଦେଶ, ଗୋଟିଏ ନିର୍ବାଚନ ପ୍ରତିଶ୍ରୁତି
– ସମାନ ନାଗରିକ ସଂହିତା ଲାଗୁ
– ୩ କୋଟି ଲକ୍ଷପତି ଦିଦି କରିବାକୁ ଲକ୍ଷ୍ୟ
– ଦେଶର ସବୁ ଭାଗକୁ ବୁଲେଟ୍ ଟ୍ରେନ୍ ସଂଯୋଗ
– ବିକଶିତ ଭାରତ ଗଠନର ପ୍ରତିଶ୍ରୁତି
– ଡାକ୍ତରି ପାଠ୍ୟକ୍ରମ ପାଇଁ ସିଟ୍ ବୃଦ୍ଧି ଭଳି ପ୍ରତିଶ୍ରୁତି ଦେଇଛି ଭାରତୀୟ ଜନତା ପାର୍ଟି ।
ବିଜେପିର ଏହି ପ୍ରତିଶ୍ରୁତିର ପାହାଡ଼ ଭିତରେ କିନ୍ତୁ ବେରୋଜଗାରୀ ଏବଂ ଦରଦାମ ବୃ୍ଦ୍ଧି ପ୍ରସଙ୍ଗରେ ଯେମିତି ନୀରବ ରହିଛି ସଂକଳ୍ପପତ୍ର । ଯାହାକୁ ନେଇ ବିରୋଧୀ ପ୍ରଶ୍ନ ଉଠାଇଛନ୍ତି ।
ତେବେ ଦେଖିବାର କଥା ବିଜେପିର ମୋଦୀ ଗ୍ୟାରେଂଟି ଜନତାଙ୍କୁ ଆକର୍ଷିତ କରୁଛି ନା’ କଂଗ୍ରେସର ୫ ନ୍ୟାୟ ୨୫ ଗ୍ୟାରେଂଟିର ପ୍ରତିଶ୍ରୁତି ଭୋଟରଙ୍କୁ ପ୍ରଭାବିତ କରୁଛି ।