ମଣ୍ଡି ଅବ୍ୟବସ୍ଥା ନେଇ ବିଜେପି ନେତାଙ୍କ ହଙ୍ଗାମା । ସମ୍ବଲପୁର ଆରଡିିସି ଅଫିସ ଘେରାଉ ବେଳେ ପୁଲିସ ସହ ବିଜେପି ନେତା, କର୍ମୀଙ୍କ ଧସ୍ତାଧସ୍ତି । ରାଜ୍ୟ ସଭାପତିଙ୍କ ସହ ଅନେକ ନେତା ଅଟକ ।
କନକ ବ୍ୟୁରୋ : ଭିତରେ ଭିତରେ ଗୁହୁଳୁଥିବା ଚାଷୀ ଅସନ୍ତୋଷର ନିଆଁରେ ଘିଅ ଢ଼ାଳିଲା ଭଳି କାମ କରିଛି ବିଜେପିର ଚାଷୀ ଅଧିକାର ରାଲି । ଧାନ କିଣାରେ ଅବ୍ୟବସ୍ଥା ଅଭିଯୋଗ ନେଇ ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲାରୁ ଆସୁଥିବା ଚାଷୀଙ୍କ ପ୍ରତିବାଦ ଭିତରେ ସମ୍ବଲପୁରରେ ଏକ ବିଶାଳ ପ୍ରତିବାଦ ରାଲି କହିଛି ବିଜେପି । ଆଉ ଆରଡିିସି ଅଫିସ ଘେରାଉ ବେଳେ ଦେଖିବାକୁ ମିଳିଛି ଉତ୍ତେଜନା । ପୁଲିସ ସହ ଧସ୍ତାଧସ୍ତି ହୋଇଛନ୍ତି ବିଜେପି ନେତା ଓ କର୍ମୀ । ବିଜେପିର ତୁଙ୍ଗ ନେତାକୁ ପୁଲିସ୍ ଉଠାଇ ନେଇଥିବା ବେଳେ ନେତା ଥାନା ଛାଡ଼ିବେ ନାହିଁ ବୋଲି ଚେତାବନୀ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚାଷୀ ଅଧିକାର ନାଁରେ ବିଜେପି କରିଥିବା ପ୍ରତିବାଦରେ ସେହି ସବୁ ଅଭିଯୋଗ ଦୋହରାଯାଇଛି, ଯାହା ଚାଷୀ ବାରମ୍ବାର ଦାବି କରିଆସୁଛନ୍ତି । ମଣ୍ଡିରେ ଦିନ ଦିନ ଧରି ଧାନ ପଡ଼ି ରହୁଛି । ମଣ୍ଡିରୁ ଧାନ ଉଠୁନାହିଁ । ଧାନର ମାନକୁ ନେଇ ମଣ୍ଡିରେ କଟଣି କରାଯାଉଛି । ଟୋକନ୍ ଥାଇ ସୁଦ୍ଧା ମଣ୍ଡି ଧାନ ନେଉନାହାଁନ୍ତି ।
ମଣ୍ଡି କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ଟୋକନ୍ ଲାପ୍ସ କରିଯାଉଛି । ଏହି ସବୁ ଦାବି ତୁରନ୍ତ ସମାଧାନ ନହେଲେ ଆନ୍ଦୋଳନ ତିବ୍ରତର ହେବ ବୋଲି ବିଜେପି ଚେତାବନୀ ଦେଇଛି । ଆଉ ଏହାରି ଭିତରେ ଦିଲ୍ଲୀର ଚାଷୀ ଆନ୍ଦୋଳନକୁ ଇସାରା କରି କଂଗ୍ରେସ ବିଧାୟକ କହିଛନ୍ତି- ସଇତାନ କରୁଛି ବେଦପାଠ ।
ରାଜନୀତିର ଏହି ବୟାନବାଜୀ ଭିତରେ ଚଳିତବର୍ଷ ଓଡ଼ିଶାରେ ବମ୍ପର୍ କ୍ରପ୍ ହୋଇଛି । ଶେଷ ଖବର ସୁଦ୍ଧା ଓଡ଼ିଶାରେ ୩୫ ଲକ୍ଷ ୬ ହଜାର ୧୮୩ ମେଟ୍ରିକ୍ ଟନ୍ ଧାନ ସଂଗ୍ରହ ହୋଇଛି । ଯାହା, ପୂର୍ବ ବର୍ଷ ତୁଳନାରେ ୨୨% ଅଧିକ । ବଡ଼ କଥା ହେଉଛି- ବରଗଡ଼ରେ ୧୩%, ବଲାଙ୍ଗୀର ୪୦%, କଳାହାଣ୍ଡିରେ ୧୬%, ସୋନପୁର ୧୭%, ସୁନ୍ଦରଗଡ଼ ୧୭% ଅଧିକ ଧାନ ସଂଗ୍ରହ ହୋଇଛି ।