ଦେଶରେ ଧର୍ମାନୁଷ୍ଠାନ ଖୋଲା, ଓଡ଼ିଶାରେ ବନ୍ଦ: ମନ୍ଦିର ଖୋଲିବାକୁ ଦାବି ଉଠାଇଲେ ବିଜୟ ମହାପାତ୍ର; ମନ୍ଦିର ଖୋଲିଲେ ଲୋକଙ୍କ ମିଳିବ ମାନସିକ ଶାନ୍ତି, ସ୍ୱର ମିଳାଇଲେ ସୁର
ପ୍ରମିଳା କହିଲେ ସ୍ଥିତି ଅନୁସାରେ ପଦକ୍ଷେପ ନେଉଛନ୍ତି ସରକାର
କନକ ବ୍ୟୁରୋ: ସାରା ଦେଶରେ ଧର୍ମାନୁଷ୍ଠାନ ଖୋଲିଛି, ହେଲେ ଓଡ଼ିଶାରେ ବନ୍ଦ ରହିଛି ଧର୍ମାନୁଷ୍ଠାନ । ଏହାକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ । ଅନ୍ଲାଇନରେ ଶ୍ରୀମନ୍ଦିରରେ ଦିଅଁ ଦର୍ଶନ ପାଇଁ ଆଲୋଚନା ହେଉଥିବା ବେଳେ ଆବଶ୍ୟକ କଟକଣା ଭିତରେ ମନ୍ଦିର ଖୋଲିବାକୁ ଯୁକ୍ତି ବାଢ଼ିଛନ୍ତି ବିରେଜପିର ବରିଷ୍ଠ ନେତା ବିଜୟ ମହାପାତ୍ର । ସେ କହିଛନ୍ତି, ମନ୍ଦିର ଖୋଲିଲେ ଚାପଗ୍ରସ୍ତ ହୋଇପଡ଼ିଥିବା ଲୋକ ମାନସିକ ଶାନ୍ତି ପାଇବେ । କଂଗ୍ରେସର ବରିଷ୍ଠ ନେତା ସୁର ରାଉତରାୟ ମଧ୍ୟ ମନ୍ଦିର ଖୋଲିବା ପାଇଁ ମତ ରଖିଛନ୍ତି । ହେଲେ ଶାସକ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ରାଜ୍ୟ ସରକାର ଯାହା କରିବା କଥା କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶରେ ଧର୍ମାନୁଷ୍ଠାନ ଖୋଲିଥିବା ବେଳେ ଓଡ଼ିଶାରେ କାହିଁକି ବନ୍ଦ ରହିବ ବୋଲି ପ୍ରଶ୍ନ ଉଠାଇଛନ୍ତି ବିଜେପିର ବରିଷ୍ଠ ନେତା ବିଜୟ ମହାପାତ୍ର । କରୋନା ଯୋଗୁଁ ଲୋକେ ଚାପଗ୍ରସ୍ତ ହେଉଥିବାରୁ ମନ୍ଦିର ଗଲେ ସେମାନେ ମାନସିକ ଶାନ୍ତି ପାଇବେ ବୋଲି ଯୁକ୍ତି ବଢ଼ିଛନ୍ତି ବିଜୟ । କଟକଣା ଭିତରେ ରଥଯାତ୍ରା ହୋଇପାରିଲା, ସେହିଭଳି ଆକଶ୍ୟକ ଗାଇଡଲାଇନ ଭିତରେ ମନ୍ଦିର ଖୋଲିବାକୁ ସେ ପରାମର୍ଶ ଦେଇଛନ୍ତି ।
ବିଜୟଙ୍କ ସହ ସ୍ୱର ମିଳାଇ ମନ୍ଦିର ଖୋଲିବାକୁ ଦାବି କରିଛନ୍ତି ବରିଷ୍ଠ କଂଗ୍ରେସ ନେତା ସୁର ରାଉତରାୟ । ଆସନ୍ତା ସପ୍ତାହରେ ମନ୍ଦିର ଖୋଲିବାକକୁ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି ଜଟଣୀ ବିଧାୟକ । ସେପଟେ ଶାସକ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି, କରୋନା ଦାଉରୁ ଲୋକଙ୍କ ରକ୍ଷା କରିବା ପାଇଁ ରାଜ୍ୟ ସରକାର ଯାହା କରିବା କଥା କରୁଛନ୍ତି । କାହା ଜିଦ୍ରେ ସରକାର ନିଷ୍ପତି ନିଅନ୍ତି ନାହିଁ ।
କେବଳ ମନ୍ଦିର ଖୋଲିବା ପ୍ରସଙ୍ଗରେ ନୁହେଁ କରୋନା ମହାମାରୀ ପରିଚାଳନାରେ ରାଜ୍ୟ ସରକାରଙ୍କ ମଡେଲ ଉପରେ ମଧ୍ୟ ବର୍ଷିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର । ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଉଛି, ଏହାକୁ ସ୍ୱୀକାର କରି ସରକାର ତାଙ୍କର ରଣନୀତି ପରିବର୍ତନ କରନ୍ତୁ ବୋଲି ପରାମର୍ଶ ଦେଇଛନ୍ତି ବିଜୟ । ଦିନକୁ ଦିନ କରୋନା ସଂକ୍ରମଣ ରାଜ୍ୟରେ ବଢ଼ିଚାଲିଥିବା ବେଳେ ଶାସକ ଓ ବିରୋଧୀ ଦଳ ମଧ୍ୟରେ କଥା କଟାକଟି ଆରମ୍ଭ ହୋଇଯାଇଛି ।