ବିଜେପି ଓ ଜେଡିୟୁ ମଧ୍ୟରେ ବଢୁଛି ଦୂରତା । ନିତୀଶଙ୍କ ସାମ୍ନାରେ ଜେଡିୟୁ ନେତା କହିଲେ ବିଜେପି ଆମ ପିଠିରେ ପଛରୁ ଛୁରୀ ମାରିଲା । ସେପଟେ ବିଜେପି କହିଲା ନିତୀଶଙ୍କ ବିନା ଚାଲିବନି ସରକାର
କନକ ବ୍ୟୁରୋ : ବିହାରରେ ବିଜେପି ଓ ଜେଡିୟୁ ମଧ୍ୟରେ ଚାଲିଛି କଡା ବୟାନ ବାଜି । ଏହି କ୍ରମରେ ଜେଡିୟୁ ବିଧାୟକ ପ୍ରାର୍ଥୀ ହୋଇ ପରାଜିତ ହୋଇଥିବା ସମସ୍ତ ନେତାମାନେ ଏକ ସ୍ୱରରେ କହିବା ଆରମ୍ଭ କରିଛନ୍ତି କି ଜେଡିୟୁକୁ ଏଷତ କମ୍ ସଂଖ୍ୟକ ଆସନରେ ବିଜୟ ମିଳିବା ପଛରେ ରହିଛି ବିଜେପିର ଅସହଯୋଗ ଓ ଷଡଯନ୍ତ୍ର । ଶନିବାର ଦିନ ଜେଡିୟୁର ରାଜ୍ୟପରିଷଦ ବୈଠକରେ ପରାଜିତ ହୋଇଥିବା ସମସ୍ତ ନେତା ମାନେ ବିଜେପି ଉପରେ ବର୍ଷିଛନ୍ତି । ସେମାନଙ୍କ ପରାଜୟ ପାଇଁ ବିଜେପି ଦାୟୀ ବୋଲି ମତ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ବୈଠକରେ ମୁଖ୍ୟମନ୍ତ୍ରୀ ତଥା ଜେଡିୟୁ ମୁଖ୍ୟ ନିତୀଶ କୁମାରଙ୍କ ଉପସ୍ଥିତିରେ ପରାଜିତ ବିଧାୟକ ମାନେ କହିଥିଲେ କି ଚିରାଗ ପାଶୱାନକୁ ବିଜେପି ମୋହରା କରି ଜେଡିୟୁକୁ ଶେଷ କରିଦେବାକୁ ଯୋଜନା କରିଥିଲା । ଫଳରେ ନିର୍ବାଚନ ବେଳେ ବିଜେପି ଭୋଟର ମାନେ ଜେଡିୟୁ ପ୍ରାର୍ଥୀଙ୍କୁ ଭୋଟ ଦେଲେ ନାହିଁ, ବିଜେପି କର୍ମକର୍ତ୍ତା ମାନେ ନିର୍ବାଚନ ପ୍ରଚାରରେ ଜେଡିୟୁକୁ ସହଯୋଗ କଲେ ନାହିଁ । ଅନ୍ୟପଟେ ସୀମାଞ୍ଚଳରେ ପରାଜିତ ଜେଡିୟୁ ପ୍ରାର୍ଥୀମାନେ କହିଛନ୍ତି କି ଏନଆରସିକୁ ନେଇ ଜେଡିୟୁର ଷ୍ଟାଣ୍ଡ ସହ ବିଜେପିର ଷ୍ଟାଣ୍ଟ ସମାନ ରହିଲା ନାହିଁ । ଏହାସହ ବିଜେପିର ପୂର୍ବତନ ମନ୍ତ୍ରୀଙ୍କ ବୟାନ ଭୋଟରଙ୍କ ମଧ୍ୟରେ ସନ୍ଦେହ ସୃଷ୍ଟି କଲା । ଯାହାର ପରିଣାମ ଜେଡିୟୁକୁ ପରାଜୟ ସ୍ୱିକାର କରିବାକୁ ବାଧ୍ୟ କଲା ।
ଏହି ରାଜ୍ୟପରିଷଦ ବୈଠକରେ ଯେତେବେଳେ ବରିଷ୍ଠ ନେତା ମାନଙ୍କ ଭାଷଣ ଦେବାର ପାଳି ଆସିଲା ସେତେବେଳେ ନିତୀଶ କୁମାର ସ୍ୱିକାର କରିଥିଲେ କି ଆସନ ବୁଝାମଣା ଠିକ୍ ସମୟରେ ହୋଇପାରିଲା ନାହିଁ । ଏହାସହ ନିତୀଶ ତାଙ୍କ ଦଳର ଖରାପ ପ୍ରଦର୍ଶନ ପାଇଁ ସୋସିଆଲ ମିଡିଆକୁ ଦାୟି କରିଛନ୍ତି । ସେ କହିଛନ୍ତି କି ମୁଁ ଜାଣିନାହିଁ କାହାର ଚାପରେ ସୋସିଆଲ ମିଡିଆ ବାରମ୍ବାର ତାଙ୍କ ସରକାର ବିରୋଧରେ ଅପପ୍ରଚାର କରୁଥିଲା । ଅନ୍ୟପଟେ ପୁଣି ସମାନ କଥାକୁ ନିତୀଶ ଦୋହରାଇ କହିଛନ୍ତି କି ଦଳର ଖରାପ ପ୍ରଦର୍ଶନ ପରେ ସେ ମୁଖ୍ୟମନ୍ତ୍ରୀ ହେବାକୁ ରାଜି ହେଉନଥିଲେ । ମାତ୍ର ବିଜେପି ଓ ସହାଯୋଗୀ ଦଳମାନଙ୍କ ଚାପରେ ସେ ମୁଖ୍ୟମନ୍ତ୍ରୀ ହୋଇଛନ୍ତି ।
ଅନ୍ୟପଟେ ଜେଡିୟୁର ରାଷ୍ଟ୍ରୀୟ ଅଧ୍ୟକ୍ଷ ଆର.ପି ସିଂ କହିଛନ୍ତି କି କିଛି ଲୋକ ଜେଡିୟୁର ଭୋଟର ମାନଙ୍କୁ ବିପରିତ ଦିଗକୁ ନେଇଯିବାକୁ ସଫଳ ହୋଇଥିଲେ । ଏହା ସହ ସେ କହିଛନ୍ତି କି କରୋନା କାଳରେ ତାଙ୍କ ସରକାର ଲୋକମାନଙ୍କ ପାଇଁ ଯେତିକି କାମ କରିଛି ଭାରତ ବର୍ଷରେ ଅନ୍ୟ କୌଣସି ରାଜ୍ୟ ସରକାର ତାହା କରିପାରି ନାହାନ୍ତି । ଏହା ବ୍ୟତିତ ଜେଡିୟୁର ବରିଷ୍ଠ ନେତା ନାରାୟଣ ସିଂ କହିଛନ୍ତି କି ଜେଡିୟୁ ଏମିତି ଏକ ଦଳ ସେ ବାରମ୍ବାର ଧୋକା ଖାଇପାରେ କିନ୍ତୁ କାହାକୁ ଧୋକା ଦେବା ଦଳର ସମ୍ବିଧାନ ବାହାରେ ।