ଓଡି଼ଶାରେ ଦୁଇ କେନ୍ଦ୍ରମନ୍ତ୍ରୀଙ୍କ ପାୱାର-ସୋ । ଜନ ଆର୍ଶୀବାଦ କାର୍ଯ୍ୟକ୍ରମରେ ଧର୍ମେନ୍ଦ୍ର କହିଲେ, ବକୁଳ ବନ ଆସିବାକୁ ପ୍ରଧାନମନ୍ତ୍ରୀଙ୍କୁ କରିବେ ନିମନ୍ତ୍ରଣ । ସେପଟେ ଟ୍ରେନରେ ବୁଲି ଲୋକଙ୍କ ସହ କଥା ହେଲେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ।
କନକ ବ୍ୟୁରୋ : ଶାସକ ଦଳକୁ ମାତ୍ ଦେବାକୁ ବିଜେପି ମଧ୍ୟ ପଛରେ ନାହିଁ । ଜନଆଶୀର୍ବାଦ କାର୍ଯ୍ୟକ୍ରମରେ ନେତା ଲୋକଙ୍କ ପାଖରେ ପହଞ୍ଚୁଛନ୍ତି ଓ ମୋଦୀ ସରକାରଙ୍କର ଯୋଜନା ଓ ସଫଳତାକୁ ବଖାଣୁଛନ୍ତି । ୨୦୧୭ ପଞ୍ଚାୟତ ନିର୍ବାଚନରେ ବିଜେପି ଯେଉଁ ପ୍ରଦର୍ଶନ କରିଥିଲା ତାହା ଦୋହରାଇବାକୁ ବ୍ଲୁ ପ୍ରିଂଟ ପ୍ରସ୍ତୁତ କରି ଦଳ ଆଗକୁ ବଢୁଛି । ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅଶ୍ୱିନୀ ବୈଷ୍ଣବଙ୍କ ଘନ ଘନ ଜିଲ୍ଲା ଗସ୍ତ ତୃଣମୂଳ ସ୍ତରରେ ଦଳରେ ଶକ୍ତି ସଂଚାର କରୁଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ବିଜେଡି, ତାର ପଞ୍ଚାୟତ ପ୍ଲାନକୁ ଜୋରଦାର କରିଥିବା ବେଳେ ବିଜେପି ମଧ୍ୟ ପୂରା ଦମ୍ ଲଗାଇଦେଇଛି । ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅଶ୍ୱିନୀ ବୈଷ୍ଣବ ତିନି ଦିନିଆ ଓଡ଼ିଶା ଗସ୍ତରେ ଅଛନ୍ତି । ଗୁରୁବାର ଦିନ ପୁରୀ ଓ ଭୁବନେଶ୍ୱରରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବା ପରେ ଜନ ଆଶୀର୍ବାଦ ଯାତ୍ରା ଜରିଆରେ ଲୋକଙ୍କ ନିକଟବର୍ତି ହେବାକୁ ଉଦ୍ୟମ କରିଛି ବିଜେପି ।
ନେତା, କର୍ମୀଙ୍କ ଗହଣରେ ଭୁବନେଶ୍ୱର ଓ ପୁରୀ ଶ୍ରୀମନ୍ଦିର ସମେତ ବିଭିନ୍ନ ସ୍ଥାନ ବୁଲିଥିଲେ କେନ୍ଦ୍ରମନ୍ତ୍ରୀ । ଗୋପବନ୍ଧୁଙ୍କ ବକୁଳ ବନ ବିଦ୍ୟାଳୟ କିପରି ଭଲ ମଣିଷ ତିଆରି କରୁଥିଲା, ତାହା ବର୍ଣ୍ଣନା କରିବା ସହ ପ୍ରଧାନମନ୍ତ୍ରୀଙ୍କୁ ଏହି ସ୍ଥାନକୁ ଆସିବା ପାଇଁ ନିମନ୍ତ୍ରଣ କରିବେ ବୋଲି କହିଥିଲେ ଧର୍ମେନ୍ଦ୍ର । ଯେଉଁ ଓଡ଼ିଆ ବିଶ୍ୱବିଦ୍ୟାଳୟକୁ ବ୍ୟାପକ ଆକାରରେ ଗଢ଼ିବାକୁ ଓଡ଼ିଶା ସରକାର ଯୋଜନା କରୁଛନ୍ତି, ସେଥିରେ ମଧ୍ୟ ଭାଗ ବସାଇବାକୁ ଯୋଜନା କରିଛନ୍ତି ଶିକ୍ଷାମନ୍ତ୍ରୀ ।
ତିନି ଦିନ ମଧ୍ୟରେ ପୁରୀ, ଖୋର୍ଦ୍ଧା ଓ କଟକ ଜିଲ୍ଲାରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବେ ଧର୍ମେନ୍ଦ୍ର ପ୍ରଧାନ । ଏପଟେ ଦକ୍ଷିଣ ଓ ପଶ୍ଚିମ ଓଡ଼ିଶା ଗସ୍ତରେ ଅଛନ୍ତି ଅଶ୍ୱିନୀ ବୈଷ୍ଣବ ।
ରାୟଗଡ଼ାରେ ଟ୍ରେନରେ ପହଞ୍ଚିଛନ୍ତି ମନ୍ତ୍ରୀ ଅଶ୍ୱିନୀ ବୈଷ୍ଣବ । ଯାତ୍ରୀଙ୍କ ସମସ୍ୟା କଥା ବୁଝିବା ସହ ଫିଡବ୍ୟାକ୍ ନେଇଛନ୍ତି । ଜନ ଆଶୀର୍ବାଦ ଯାତ୍ରାରେ ଯାଇ ରାୟଗଡାରେ ପହଞ୍ଚିବା ପରେ ଦଳୀୟ ନେତା, କର୍ମୀ ଓ ବିଭିନ୍ନ ସାମାଜିକ ସଂଗଠନ ପକ୍ଷରୁ ତାଙ୍କୁ ବିପୁଳ ସମ୍ବର୍ଦ୍ଧନା ଦିଆଯାଇଛି । ପୂର୍ବଭାରତର ସର୍ବାଙ୍ଗୀନ ଉନ୍ନତି ପାଇଁ ପ୍ରଧାନମନ୍ତ୍ରୀ ଓଡିଶାକୁ ଗୁରୁତ୍ୱ ଦେଉଥିବା କହିଛନ୍ତି ରେଳମନ୍ତ୍ରୀ । ମୋଦୀଙ୍କ କ୍ୟାବିନେଟରେ ରେଳ, ଗମନାଗମନ, ଶିକ୍ଷା, ଜଳସମ୍ପଦ, ଜନଜାତି ବିକାଶ ଓ ଆଇଟି ଭଳି ୭ଟି ଗୁରୁତ୍ୱପୂର୍ଣ୍ଣ ବିଭାଗ ଓଡିଶାକୁ ଦିଆଯାଇଥିବା କହିଛନ୍ତି ଅଶ୍ୱିନୀ ବୈଷ୍ଣବ ।
ଜନ ଆଶୀର୍ବାଦ କାର୍ଯ୍ୟକ୍ରମରେ ରାୟଗଡ଼ାରୁ କୋରାପୁଟ ପହଞ୍ଚିଥିଲେ ଅଶ୍ୱିନୀ । ଲକ୍ଷ୍ମୀପୁର ସ୍ଥିତ ତୟାପୁଟ ଠାରେ ଆଦିବାସୀ ବାଦ୍ୟର ତାଳେ ତାଳେ ନାଚିଥିଲେ ରେଳମନ୍ତ୍ରୀ । ନୂଆ ଯୋଜନା ଓ ରଣନୀତି ଜରିଆରେ ପଂଚାୟତ ବିଜୟ ପାଇଁ ନେତା କସରତ କରୁଥିବା ବେଳେ ତୃଣମୂଳ ସ୍ତରରେ କି ସମସ୍ୟା ରହିଛି, ସରକାରୀ ଯୋଜନା ବାସ୍ତବିକ କେତେ କାର୍ଯ୍ୟ କରୁଛି, ତାହା ଉପରେ ନିର୍ଭର କରିବ କାହା ସମର୍ଥନରେ ଯିବ ଜନମତ ।