ପରବିନ୍ଦରଙ୍କ ଘରକୁ ଅନ୍ଧାରୀ ବିଜେ ଘଟଣା : ମଧ୍ୟ ବିଧାୟକ ଅନନ୍ତ ଓ ଖୋର୍ଦ୍ଧା ଡିଏସପି ଅନୁପଙ୍କ ନାଁରେ ଥାନାରେ ଅଭିଯୋଗ କଲା ବିଜେପି । ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଦାବି ।
କନକ ବ୍ୟୁରୋ : ବିଜେଡି ବିଧାୟକ ଅନନ୍ତ ନାରାୟଣ ଜେନା ଓ ଡିଏସପି ଅନୁପ କାନୁନଗୋଙ୍କୁ ବିରୋଧରେ ଥାନାକୁ ଗଲା ବିଜେପି । ରାତି ଅଧରେ ପରବିନ୍ଦର ପାଲସିଂଙ୍କ ଘରକୁ ବିଧାୟକ ଅନନ୍ତ ନାରାୟଣ ଜେନା ଓ ଡିଏସପି ଅନୁପ କାନୁନଗୋ ଯିବାକୁ ନେଇ ଲକ୍ଷ୍ମୀସାଗର ଥାନାରେ ଅଭିଯୋଗ କରିଛି ବିଜେପି। ରାତି ଅଧରେ ବିଧାୟକ ଓ ଡିଏସପି ପରବିନ୍ଦରଙ୍କ ଘରକୁ ଯାଇ ଯେଉଁଭଳି କବାଟ ବାଡେଇଛନ୍ତି ସେଥିରେ ତାଙ୍କ ପରିବାର ପୂରା ଆତଙ୍କିତ ଅଛନ୍ତି । ଯାହାର ଭିଜୁଆଲ ସିସିଟିଭିରେ କଏଦ ହୋଇଛି । ଏପରିକି ବିଧାୟକ ଅନନ୍ତ ନାରାୟଣ ଜେନା ମାଡ ମାରିଥିବା ଅଭିଯୁକ୍ତଙ୍କ ଜାମିନ ପାଇଁ ସହଯୋଗ କରିଥିବା ବେଳେ ତାଙ୍କ ସହ ସେଲିବ୍ରେସନ ମଧ୍ୟ କରିଥିବା ନେଇ ଅଭିଯୋଗ ଆଣିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ଏହାଛଡା କମିଶନରେଟ ପୋଲିସ ଅଧୀନରେ କାମ କରୁନଥିଲେ ମଧ୍ୟ କାହିଁକି ଖୋର୍ଦ୍ଧା ଡିଏସପି ଅନୁପ କାନୁନଗୋଙ୍କୁ ସାଥୀରେ ଆଣିଥିଲେ ତାହାକୁ ନେଇ ପ୍ରଶ୍ନ ଉଠାଇଛି ବିଜେପି । ପରବିନ୍ଦରଙ୍କୁ ଭୟଭୀତ କରି ମାମଲା ରଫାଦଫା କରିବାକୁ ଅନନ୍ତ ଓ ଅନୁପ ଚାପ ପକାଇଥିବା ନେଇ ଅଭିଯୋଗ ଆଣିଛନ୍ତି ବିଜେପି ନେତା ଜଗନ୍ନାଥ ପ୍ରଧାନ । ତେଣୁ ଅନନ୍ତ ଓ ଅନୁପଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉ ବୋଲି ବିଜେପି ଦାବି କରିଛି ।
କଣ ଥିଲା ପୂରା ଘଟଣା :
ମଙ୍ଗଳବାର ଲକ୍ଷ୍ମୀସାଗର ଅଞ୍ଚଳରେ ଶିଖ୍ ଯୁବକଙ୍କୁ ଦିନ ଦ୍ୱିପହରରେ ମରଣାନ୍ତକ ଆକ୍ରମଣ ହେଲା । ପଥରରେ ମୁହଁକୁ ଛେଚିବାକୁ ମଧ୍ୟ ଉଦ୍ୟମ କରାଯାଇଥିଲା । ଆଉ ଏସବୁ ହେଉଥିଲା ପୋଲସିର ଉପସ୍ଥିତିରେ । କିନ୍ତୁ ସବୁ ଦେଖି ମଧ୍ୟ ନିରବଦ୍ରଷ୍ଟା ସାଜିଥିଲା ପୋଲିସ । ତେବେ ଗଣମାଧ୍ୟମରେ ଖବର ପ୍ରସାରିତ ହେବା ପରେ ସିସିଟିଭିର ଫୁଟେଜକୁ ଆଧାର କରି ଅଭିଯୁକ୍ତଙ୍କୁ ଗିରଫ କରିଥିଲା ପୋଲିସ । କିନ୍ତୁ ସେଭଳି କଠୋର ଦଫା ଲଗାଇନଥିଲା । ଯେଉଁଥିପାଇଁ ଗିରଫ ହେବାର କିଛି ଘଣ୍ଟା ମଧ୍ୟରେ ଅଭିଯୁକ୍ତଙ୍କୁ ଅନାୟସରେ ମିଳିଥିଲା ଜାମିନ । ଆଉ ଏହି ଘଟଣାକୁ ନେଇ ଏବେ ରାଜନୀତି ଆରମ୍ଭ ହୋଇଛି । ଏପରିକି କାହିଁକି କଠୋର ଦଫା ଲଗାଇଲା ନାହିଁ ପୋଲିସ ଓ ୨୪ ଘଣ୍ଟା ମଧ୍ୟରେ କିଭଳି ଅଭିଯୁକ୍ତଙ୍କୁ ମିଳିଗଲା ଜାମିନ ତାହାକୁ ନେଇ ପ୍ରଶ୍ନ ଉଠାଇଛନ୍ତି ଉଭୟ ବିଜେପି ଓ କଂଗ୍ରେସ । ଏହାଛଡା ବିଧାୟକ ଓ ଡିଏସପି କାହିଁକି ରାତି ଅଧରେ ପରବିନ୍ଦରଙ୍କ ଘରକୁ ଯାଇଥିଲେ ତାହାକୁ ଶାସକଦଳକୁ ଟାର୍ଗେଟ କରିଛନ୍ତି ବିରୋଧୀ । ତେବେ ବିଧାୟକ ଅନନ୍ତ ଜେନା କହିଛନ୍ତି, ସ୍ଥାନୀୟ ଲୋକପ୍ରତିନିଧି ହିସାବରେ ସାନ୍ତ୍ୱନା ଦେବାକୁ ପରବିନ୍ଦରଙ୍କ ଘରକୁ ଯାଇଥିଲି ।
ପୋଲିସ ଆଗରେ ବେଧଡ଼କ ଭାବେ ଆକ୍ରମଣ କରିବା, କମିସନରେଟ୍ ପୋଲିସର ଭାବମୂର୍ତିକୁ କ୍ଷୁର୍ଣ୍ଣ କରିଥିବା ବେଳେ, ଏ ବାବଦରେ କୌଣସି ପ୍ରତିକ୍ରିୟା ପ୍ରକାଶ କରିନାହିଁ କମିସନରେଟ୍ ପୋଲିସ । ଜଣେ ପୋଲିସ ଅଧିକାରୀ ରାତି ଅଧରେ ପୀଡ଼ିତ ରହୁଥିବା ଅପାର୍ଟମେଂଟକୁ ଯିବା ଅନେକ ପ୍ରଶ୍ନ ଲଗାଇଛି ।