କନକ ବ୍ୟୁରୋ: କିଛି ମାସ ପରେ କର୍ଣ୍ଣାଟକରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ସମସ୍ତ ଦଳ ନିଜର ନିର୍ବାଚନ ପ୍ରସ୍ତୁତିକୁ ଆରମ୍ଭ କରିଦେଇସାରିଛନ୍ତି । ରାଜ୍ୟରେ ଶାସନ କରୁଥିବା ବିଜେପି ନିର୍ବାଚନରେ ପୁଣି ବିଜୟ ହାସଲ କରିବା ପାଇଁ ନିଜର ପ୍ରୟାସ ଆରମ୍ଭ କରିଦେଇଛି । ଶନିବାର ଆଗାମୀ ବିଧାନସଭା ନିର୍ବାଚନ ପାଇଁ ୟୁପିର ଫର୍ମୁଲା ଆପଣେଇଛି । ପୁଣିଥରେ ଦଳ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ନିର୍ବାଚନ ପ୍ରଭାରୀ ଭାବେ ଦାୟିତ୍ୱ ଦେଇଛନ୍ତି । କର୍ଣ୍ଣାଟକର ପ୍ରଭାରୀଭାବେ ତାଙ୍କୁ ଦାୟିତ୍ୱ ପ୍ରଦାନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବିଜେପି ପକ୍ଷରୁ ଜାରିହୋଇଥିବା ବୟାନରେ କୁହାଯାଇଛି ଯେ, ଆଗାମୀ ନିର୍ବାଚନରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦଳର ନିର୍ବାଚନ ପ୍ରଭାରୀ ହେବେ । ସେହିଭଳି ତାମିଲନାଡୁ ପ୍ରଦେଶ ବିଜେପି ଅଧ୍ୟକ୍ଷ ଆନ୍ନାମଲାଇ ଦଳର ସହପ୍ରଭାରୀ ହେବେ । ଏପ୍ରିଲ-ମେ ମାସରେ ଏଠାରେ ବିଧାନସଭା ନିର୍ବାଚନ ହେବା ନେଇ ଆଶା କରାଯାଉଛି । ତେଣୁ ବିଭିନ୍ନ ଦଳ ଏବେଠାରୁ ନିଜର ପ୍ରସ୍ତୁତିକୁ ଜୋରଦାର କରୁଛନ୍ତି ।
ଗତବର୍ଷ ଉତ୍ତରପ୍ରଦେଶ ନିର୍ବାଚନ ସହ ଅତୀତରେ ହୋଇଥିବା ଅନେକ ନିର୍ବାଚନରେ ଧର୍ମେନ୍ଦ୍ରଙ୍କୁ ନିର୍ବାଚନ ପ୍ରଭାର ଦାୟିତ୍ୱ ମିଳିଥିଲା । ଉତ୍ତରପ୍ରଦେଶରେ ବିଜେପି ବଡ ଅନ୍ତରରେ ବିଜୟ ହାସଲ କରିଥିଲା । ପୂର୍ବରୁ ୨୦୧୩ରେ କର୍ଣ୍ଣାଟକ, ବିହାର, ଉତ୍ତରାଖଣ୍ଡ ଏବଂ ଝାଡଖଣ୍ଡ ନିର୍ବାଚନରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ । ସେହିଭଳି ୨୦୧୫ ଏବଂ ୨୦୧୮ ନିର୍ବାଚନରେ ଆସାମ ଏବଂ ମଧ୍ୟପ୍ରଦେଶରେ ସେ ବିଜେପିର ପ୍ରଭାରୀ ଥିଲେ । ତେଣୁ ଦଳ ତାଙ୍କଠାରୁ ଅଧିକ ଆଶା ରଖିଛି । ଦକ୍ଷିଣ ଭାରତର ଏହି ରାଜ୍ୟରେ ସରକାରକୁ ବଞ୍ଚାଇରଖିବା ପାଇଁ ଦଳ ଧର୍ମେନ୍ଦ୍ରଙ୍କୁ ଦାୟିତ୍ୱ ଦେଇଛି ।
କର୍ଣ୍ଣାଟକ ଦକ୍ଷିଣ ଭାରତର ଏକମାତ୍ର ରାଜ୍ୟ ଯେଉଁଠାରେ ବିଜେପିର ସରକାର ଅଛି । ୨୦୧୮ ଜୁଲାଇ ମାସରେ ତତକାଳୀନ ମୁଖ୍ୟମନ୍ତ୍ରୀ ବିଏସ ୟେଦୁରପ୍ପାଙ୍କ ସ୍ଥାନରେ ଦଳ ବାସବରାଜ ବୋମାଇଙ୍କୁ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ପରିବର୍ତ୍ତନ କରିଥିଲା । ୟେଦୁରପ୍ପା ମୁଖ୍ୟମନ୍ତ୍ରୀ ନରହିଲେ ମଧ୍ୟ ତାଙ୍କ ସ୍ଥାନ ଏବଂ ବୋମାଇଙ୍କ ଅପେକ୍ଷାକୃତ କମ କ୍ଷମତା ତାଙ୍କୁ ପୂର୍ବଭଳି ସେହି ସ୍ଥାନରେ ରଖିଛି ।