କନକ ବ୍ୟୁରୋ : ବିଜେପିରେ ମିଶିଲେ, ପୁରସ୍କାର ପାଇଲେ । ମାତ୍ର ୩ ଘଣ୍ଟା ତଳେ ବିଜେପିରେ ମିଶିଥିବା ଜ୍ୟୋତିରାଦିତ୍ୟ ସିନ୍ଧିଆଙ୍କୁ ରାଜ୍ୟସଭା ପ୍ରାର୍ଥୀ କରିଛି ଦଳ । ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ମଧ୍ୟପ୍ରଦେଶରୁ ବିଜେପିର ରାଜ୍ୟସଭା ପ୍ରାର୍ଥୀ ଭାବେ ଜ୍ୟୋତିରାଦିତ୍ୟଙ୍କ ନାଁରେ ମୋହର ମାରିଛି ଦଳ । ଏହାପୂର୍ବରୁ ବିଜେପିରେ ମିଶିଲେ ଜ୍ୟୋତିରାଦିତ୍ୟଙ୍କୁ ପୁରସ୍କାର ଆକାରରେ ରାଜ୍ୟସଭା ଆସନ ମିଳିବ ବୋଲି ଚର୍ଚ୍ଚା ହେଉଥିଲା । ଏପରିକି ତାଙ୍କୁ ମୋଦିଙ୍କ ମନ୍ତ୍ରୀମଣ୍ଡଳରେ ମଧ୍ୟ ସିନ୍ଧିଆଙ୍କୁ ସାମିଲ କରାଯିବା ନେଇ କୁହାଯାଉଛି । ବିଜେପିରେ ସାମିଲ ହେବା ସହ ଦେଶବାସୀଙ୍କ ସେବା କରିବାକୁ ସୁଯୋଗ ମିଳିବ ବୋଲି କହିଥିଲେ ସିନ୍ଧିଆ । ତେଣୁ ଏହି ବୟାନରୁ ସଂକେତ ମିଳୁଛି ଯେ ମୋଦିଙ୍କ ମନ୍ତ୍ରୀମଣ୍ଡଳରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିପାରେ ।
Kanak News is now on WhatsApp
Join and get latest news updates delivered to you via WhatsApp
BJP announces the names of party’s candidates for the upcoming election to the Rajya Sabha. https://t.co/sQItPuDotq pic.twitter.com/FAjziadv2Q
— ANI (@ANI) March 11, 2020
ଏହାପୂର୍ବରୁ ଆଜି ବିଜେପି ଅଧ୍ୟକ୍ଷ ଜେପି ନଡ୍ଡାଙ୍କ ଉପସ୍ଥିତିରେ ଗେରୁଆ କ୍ୟାମ୍ପରେ ଏଣ୍ଟ୍ରି କରିଥିଲେ ଜ୍ୟୋତିରାଦିତ୍ୟ । ଆଉ ବିଜେପିରେ ସାମିଲ ହେଉ ହେଉ କଂଗ୍ରେସ ଓ କମଳନାଥ ସରକାର ଉପରେ ବର୍ଷିଛନ୍ତି । ବିଜେପିରେ ସାମିଲ ହେବା ସହ ପଦ୍ମ ପରିବାରରେ ସାମିଲ କରିଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହା ଓ ଜେପି ନଡ୍ଡାଙ୍କୁ ଧନ୍ୟବାଦ ଜଣାଇଛନ୍ତି ଜ୍ୟୋତିରାଦିତ୍ୟ । ଏହାସହ କହିଛନ୍ତି, ମୋ ଜୀବନରେ ୨ଟି ତାରିଖ ୩୦ ସେପ୍ଟେମ୍ବର ୨୦୦୧ ଓ ୧୦ ମାର୍ଚ୍ଚ ୨୦୨୦ ବେଶ ମହତ୍ୱପୂର୍ଣ୍ଣ । ୩୦ ସେପ୍ଟେମ୍ବରରେ ବାପାଙ୍କୁ ହରାଇଥିବା ବେଳେ ୧୦ ମାର୍ଚ୍ଚରେ କଂଗ୍ରେସ ଛାଡି ଏକ ବଡ ନିର୍ଣ୍ଣୟ ନେଇଥିବା କହିଛନ୍ତି ସିନ୍ଧିଆ ।
ବିଜେପିରେ ସାମିଲ ହେବା ସହ ସିନ୍ଧିଆ କହିଛନ୍ତି, ଆଜି ମୁଁ ଦୁଃଖିତ ଓ ବହୁତ ବ୍ୟଥିତ ମଧ୍ୟ । କଂଗ୍ରେସ ଦଳ ପୂର୍ବରୁ ଯେଉଁଭଳି ଥିଲା ତାହା ଏବେ ନାହିଁ । ପ୍ରଥମତଃ ବାସ୍ତିବକତାକୁ ଗ୍ରହଣ ନ କରିବା, ଦ୍ୱିତୀୟତଃ ନୂଆ ବିଚାରଧାରା ଓ ନୂଆ ନେତୃତ୍ୱଙ୍କୁ ସୁଯୋଗ ନ ଦେବା । ୨୦୧୮ରେ ଯେତେବେଳେ ମଧ୍ୟପ୍ରଦେଶରେ କଂଗ୍ରେସ ସରକାର ଗଢିବା ସହ ଅନେକ ସ୍ୱପ୍ନ ଦେଖିଥିଲା । କିନ୍ତୁ ଏବେ ଏହି ସ୍ୱପ୍ନ ଭାଙ୍ଗି ସାରିଛି । ସରକାର ଗଢିବା ପରେ କଂଗ୍ରେସ ଦେଇଥିବା ପ୍ରତିଶ୍ରୁତି ପୂରଣ କରିବାରେ ବିଫଳ ହୋଇଛି ଏପରିକି ଏଭଳି ଦଳରେ ରହି ଜନସେବା କରି ହେବ ନାହିଁ ବୋଲି କହିଛନ୍ତି ସିନ୍ଧିଆ ।
ଏହାସହ ବିଜେପିରେ ସାମିଲ ହୋଇ ଦେଶ ପାଇଁ ସେବା କରିପାରିବି ବୋଲି କହିଛନ୍ତି ସିନ୍ଧିଆ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହ ମନ୍ତ୍ରୀ ଅମିତ ଶାହା ଜାତୀୟ ସ୍ତରରେ ଏକ ନୂଆ ମଞ୍ଚ ଦେଇଥିବାରୁ ଧନ୍ୟବାଦ ଜଣାଇଛନ୍ତି ଜ୍ୟୋତିରାଦିତ୍ୟ ।