କନକ ବ୍ୟୁରୋ: ସବୁ କଳ୍ପନା ଜଳ୍ପନାର ଘଟିଲା ଅନ୍ତ । ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିଛି ବିଜେଡି । ସୁବାଷ ସିଂ, ମୁନ୍ନା ଖାଁ, ସୁଜିତ କୁମାର ଓ ମମତା ମହନ୍ତଙ୍କ ନାଁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ରାଜ୍ୟସଭା ପାଇଁ ଖାଲିପଡିଥିବା ୪ ଆସନ ପାଇଁ ବିଜେଡି ପ୍ରାର୍ଥୀ ଘୋଷଣା କରିଛି । ବଡ କଥା ହେଉଛି ମୁଖ୍ୟମନ୍ତ୍ରୀ ଘୋଷଣା କରିଥବା ରାଜ୍ୟସଭା ପ୍ରାର୍ଥୀଙ୍କ ନାଁ ଓଡିଶାର ସମସ୍ତ ଅଂଚଳକୁ ଦୃଷ୍ଟିରେ ରଖି ଦିଆଯାଇଛି । ପଶ୍ଚିମ ଓଡିଶା, ଦକ୍ଷିଣ ଓଡିଶା, ଉତର ଓଡିଶା, ଏବଂ ଉପକୂଳ ଓଡିଶାରୁ ଜଣେ ଲେଖାଁଏ ପ୍ରାର୍ଥୀ ଦେଇଛନ୍ତି । ସେହିପରି ମୁନ୍ନା ଖାଁ ସଂଖ୍ୟା ଲଘୁ ସଂପ୍ରଦାୟର ହୋଇଥିବା ବେଳେ ମମତା ମହନ୍ତଙ୍କ ନାଁ ଘୋଷଣା କରି ମହିଳା ପ୍ରତିନିଧିତ୍ୱକୁ ବି ଗୁରୁତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ । ୩ଟି ରାଜ୍ୟ ସଭା ଆସନ ପାଇଁ ବିଜେଡି ପାଖରେ ସଂଖ୍ୟା ଥିବା ବେଳେ ଚତୃର୍ଥ ଆସନ ପାଇଁ ଅତି କମରେ ସାତ ଜଣ ବିଧାୟକଙ୍କ ସମର୍ଥନ ଆବଶ୍ୟକ କରୁଛି । ବଡ କଥା ହେଉଛି, ଚତୃର୍ଥ ପ୍ରାର୍ଥୀ ଭାବେ ମମତା ମହନ୍ତଙ୍କ ନାଁ ଘୋଷଣା କରାଯାଇଛି । ତେବେ ବିଜେଡି ଘୋଷଣା କରିଥିବା ୪ ରାଜ୍ୟସଭା ପ୍ରାର୍ଥୀଙ୍କ ମଧ୍ୟରୁ ସୁବାସ ସିଂ ଏବଂ ମୁନ୍ନା ଖାଁ ଚିହ୍ନା ଚେହେରା ହୋଇଥିବା ବେଳେ ମମତା ମହନ୍ତ ଏବଂ ସୁଜିତ କୁମାର ପୂରା ନୂଆ । ତେବେ ରାଜ୍ୟସଭା ପାଇଁ ବିଜେଡିର ଅନେକ ତୁଙ୍ଗ ନେତାମାନେ ଦାବିଦାର ରହିଥିବା ବେଳେ ସୁଜିତ ଏବଂ ମମତାଙ୍କୁ କାହିଁକି ଭରସିଲେ ସୁପ୍ରିମୋ ଏବଂ ଏହା ପଛରେ କଣ ବଡ କାରଣ ରହିଛି ତାହା ଜାଣିବା ପାଇଁ ପଢନ୍ତୁ ଏହି ରିପୋର୍ଟ ।
Kanak News is now on WhatsApp
Join and get latest news updates delivered to you via WhatsApp
୨୦୧୪ ନିର୍ବାଚନ ସମୟରେ ସୁଜିତ କୁମାର ବିଜେଡିରେ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅବତୀର୍ଣ୍ଣ ହୋଇଥିବା ବେଳେ ତାଙ୍କ ଉପରେ ରହିଥିଲା ଅଭିଭକ୍ତ କଳାହାଣ୍ଡି ଜିଲ୍ଲାର ଗୁରୁ ଦାୟିତ୍ୱ । ତେବେ ରାଜ୍ୟସଭାରେ ପଶ୍ଚିମ ଓଡିଶାର ଜଣେ ପ୍ରତିନିଧିତ୍ୱ ରହିବ ବୋଲି କୁହାଯାଉଥିଲା କାହିଁକି ନା ପଶ୍ଚିମ ଓଡିଶାର ୫ରୁ ୫ ଲୋକସଭା ଆସନ ବିଜେପି ହାତରେ ରହିଥିଲା । ଆଉ ଏକ୍ଷେତ୍ରରେ ପରାଜିତ ନେତା ଅନେକ ଦାବିଦାର ରହିଥିଲେ । କୌଣସି ବି ପରାଜିତ ନେତାଙ୍କୁ ନବୀନ ରାଜ୍ୟସଭାକୁ ପଠାଇବାକୁ ଚାହୁଁନଥିବା ଏଠାରେ କୁହାଯାଇପାରିବ । ସେହିଭଳି ସୁଜିତଙ୍କୁ ବିଜେଡି କାହିଁକି ରାଜ୍ୟସଭା ପ୍ରାର୍ଥୀ ଭାବେ ଚୟନ କଲେ ତାର ଯୁକ୍ତି ମଧ୍ୟ ବିଜେଡି ପକ୍ଷରୁ ଦିଆଯାଇଛି । ଅଭିଭକ୍ତ କଳାହାଣ୍ଡିରେ ଦଳୀୟ ସଂଗଠନକୁ ମଜଭୁତ କରିବା ପାଇଁ ସୁଜିତଙ୍କ ଉଦ୍ୟମ ଉପରେ ଜୋର୍ ଦିଆଯାଇଛି ଏବଂ ସୁଜିତଙ୍କ ଶିକ୍ଷାଗତ ଯୋଗ୍ୟତାକୁ ମଧ୍ୟ ସାମ୍ନାକୁ ଅଣାଯାଇଛି ।
ସୁଜିତ୍ ଅସଫୋର୍ଡ ୟୁନିଭର୍ସିଟିରେ ଏମବିଏ କରିଥିବା ବେଳେ ମାଷ୍ଟର ଇନ ପବ୍ଲିକ୍ ଆଡମିନିଷ୍ଟ୍ରେସନ ହାବାର୍ଡ ୟୁନିଭର୍ସିଟିରେ କରିଛନ୍ତି । ସେହିଭଳି ୨୦୧୪ ନିର୍ବାଚନ ପରବର୍ତ୍ତୀ ପର୍ଯ୍ୟାୟରେ ସୁଜିତ ସରକାରଙ୍କ ପ୍ଲାନିଂ ଡିପାର୍ଟମେଂଟରେ କିଛି ଦିନ କାମ ମଧ୍ୟ କରିଥିଲେ ଏବଂ ମୁଖ୍ୟମନ୍ତ୍ରୀ କାର୍ଯ୍ୟାଳୟ ସହ ଥିବା ସୁଜିତଙ୍କ ବେଶ୍ ଭଲ ସଂପର୍କ । ଏପରିକି ୨୦୧୯ ନିର୍ବାଚନର ଠିକ୍ ପୂର୍ବରୁ ତଥା ଜାନୁଆରୀ ମାସରେ ସରକାରୀ ପଦରୁ ଇସ୍ତଫା ଦେଇ ଅଭିଭକ୍ତ କଳାହାଣ୍ଡି ଜିଲ୍ଲାରେ ସୁଜିତ ଦଳ ପାଇଁ କାମ କରିଥିଲେ । ଯାହା ଫଳରେ ପରବର୍ତ୍ତୀ ସମୟରେ ରାଜ୍ୟ ସରକାର ତାଙ୍କୁ ମୁଖ୍ୟ ସଚିବ ରାଙ୍କ ମଧ୍ୟ ଦେଇଥିଲେ । ତେବେ ଦୁଇଟି ଜିନିଷ ଗୋଟିଏ ଚେହେରାରେ ସାମ୍ନାକୁ ଆଣିଛନ୍ତି ମୁଖ୍ୟମନ୍ତ୍ରୀ । ଅର୍ଥାତ୍ ସ୍ପେଶାଲ କାଉସିଲ ଜରିଆରେ ଟ୍ରାଇବାଲ ଡେଭଲପମେଂଟ ଏବଂ ଅଭିଭକ୍ତ କଳାହାଣ୍ଡିର ଏହି କାର୍ଡ ଅନୁଯାୟୀ ସୁଜିତ କୁମାରଙ୍କୁ ରାଜ୍ୟସଭା ପ୍ରାର୍ଥୀ ଭାବେ ଚୟନ କରିଛନ୍ତି ନବୀନ ।
ଅନ୍ୟପଟେ, ମମତା ମହାନ୍ତ ହେଉଛନ୍ତି ବିଜୁ ମହିଳା ଦଳର ଜଣେ ଆଗ ଧାଡିର ନେତ୍ରୀ । ଏବଂ ମମତା ଏସଏସଜି କ୍ଷେତ୍ରରେ ସବୁଠୁ ଭଲ କାମ କରିଛନ୍ତି । ସବୁଠାରୁ ବଡ କଥା ହେଲା ୭୦ ଲକ୍ଷ ମହିଳା ବିଜୁ ଜନତା ଦଳର ଆଜିର ଦିନରେ ବଡ ଭୋଟ ବ୍ୟାଙ୍କ ହିସାବରେ ଚିନ୍ତା କରାଯାଏ । ୨୦୦୦ ମସିହାରୁ ଆରମ୍ଭ ହୋଇଥିବା ଏସଏସଜି ସବୁବେଳେ ବିଜୁ ଜନତା ଦଳ ପାଇଁ ଭୋଟ୍ ବ୍ୟାଙ୍କ ଭାବେ କାମ କରିଛି । ଯାହାକୁ ବିଜେଡି କୌଣସି ବି ପରିସ୍ଥିତିରେ ହରାଇବାକୁ ଚାହିଁବନି । ଯେଉଁ ରାଜ୍ୟସଭା ସାଂସଦ ସରୋଜିନୀ ହେମ୍ବ୍ରମଙ୍କ କାର୍ଯ୍ୟକାଳ ନିକଟରେ ସରିବାକୁ ଯାଉଛି , ସେ ମଧ୍ୟ ମୟୂରଭଂଜର ଏବଂ ମମତା ମହନ୍ତ ମଧ୍ୟ ମୟୂରଭଂଜର । ତେବେ ମୟୂରଭଂଜ ରାଜନୀତି ଏଥିପାଇଁ ଗୁରୁତ୍ୱପୂର୍ଣ୍ଣ କାରଣ ଦୌପଦୀ ମୁର୍ମୁ ବର୍ତ୍ତମାନ ଝାଡଖଣ୍ଡର ରାଜ୍ୟପାଳ ଅଛନ୍ତି ଏବଂ ଗିରିଶ ମୁର୍ମୁ ଜାମ୍ମୁକାଶୀର ଦାୟିତ୍ୱରେ ଅଛନ୍ତି । ତେବେ ଏଭଳି ପରିସ୍ଥିତିରେ ପ୍ରଶ୍ନ ଉଠୁଛି କି, ମୟୂରଭଂଜର ସଂଗଠନକୁ ସୁଧାରିବା ପାଇଁ ବିଜେଡି ସବୁଠାରୁ ଅଧିକ ଗୁରୁତ୍ୱ ଦେଉଛି । ତେଣୁ ମୟୁରଭଂଜରେ ମହିଳା ସଂଗଠନକୁ ଆହୁରି ମଜଭୁତ କରିବା ପାଇଁ ଏବଂ ଏସଏସଜି କ୍ଷେତ୍ରରେ ଗୋଟିଏ ସ୍ପଷ୍ଟ ବାର୍ତ୍ତା ଦେବା ପାଇଁ ପ୍ରମିଳା ବିଶୋଇଙ୍କ ପରେ ବୋଧହୁଏ ଦ୍ୱିତୀୟ ମହିଳା ଭାବେ ମମତା ମହନ୍ତଙ୍କୁ ରାଜ୍ୟସଭା ପଠାଉଛନ୍ତି ବିଜେଡି ସୁପ୍ରିମୋ ।