ଗୃହ ଭିତରେ ବିରୋଧୀ, ରାଜ ରାସ୍ତାରେ ଶାସକ । ଆବାସ ଯୋଗାଇବାରେ ପାତରଅନ୍ତରକୁ ନେଇ ରାଜ୍ୟପାଳଙ୍କୁ ଫେରାଦ ହେଲା ବିଜେଡି ।
କନକ ବ୍ୟୁରୋ : ମମିତା ମେହେର ପ୍ରସଙ୍ଗରେ ଶାସକ ଦଳକୁ ଘେରିବାକୁ ବିରୋଧୀ ଯୋଜନା କରିଥିବାବେଳେ କାଉଣ୍ଟର କରିବାକୁ ପଧାନମନ୍ତ୍ରୀ ଆବାସ ଯୋଜନାରେ କେନ୍ଦ୍ରର ଅବହେଳା ଅଭିଯୋଗ ଆଣି ପ୍ରତିବାଦ କରିଛି ବିଜେଡ଼ି । ବିଧାନସଭାରୁ ରାଜଭବନ ପର୍ଯ୍ୟନ୍ତ ଶୋଭାଯାତ୍ରା, ବିକ୍ଷୋଭ କରି କେନ୍ଦ୍ର ବିରୋଧରେ ପ୍ରତିବାଦ ଜଣାଇଛନ୍ତି ବିଜେଡି ବିଧାୟକ । କେନ୍ଦ୍ର ସରକାର ଓଡ଼ିଶାକୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଦେବାରେ ପାତର ଅନ୍ତର କରିଥିବା ଅଭିଯୋଗ କରିଛନ୍ତି । କହିଛନ୍ତି ୧୩ ଲକ୍ଷ ଘର ଆବଶ୍ୟକତା ଥିବା ବେଳେ କେନ୍ଦ୍ର ଦେଇଛି ମାତ୍ର ୫ଲକ୍ଷ । ବାକି ୮ ଲକ୍ଷ ଘର ଦେବାକୁ ମୁଖ୍ୟମନ୍ତ୍ରୀ ବାରମ୍ବାର ଚିଠି ଲେଖିଲେ ବି କେନ୍ଦ୍ର ଶୁଣୁନି ।
Kanak News is now on WhatsApp
Join and get latest news updates delivered to you via WhatsApp
ଗ୍ୟାସ ଦର ବୃଦ୍ଧିକୁ ନେଇ ପ୍ରତିବାଦ କରିବ ବୋଲି ପୂର୍ବରୁ ସୂଚନା ଦେଇଥିଲେ ବି ପରେ ବଦଳି ଯାଇଥିଲା ଶାସକ ଦଳର ରଣନୀତି । ଗ୍ୟାସ ଦର ବୃଦ୍ଧି ବଦଳରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଅବହେଳା ପ୍ରସଙ୍ଗ ଉଠାଇଥିଲେ । ଆଉ ଏ ନେଇ ରାଷ୍ଟ୍ରପତିଙ୍କୁ ଉଦ୍ଦେଶ୍ୟରେ ରାଜ୍ୟପାଳଙ୍କୁ ସ୍ମାରକ ପତ୍ର ଦେଇଛନ୍ତି ।
ସେପଟେ କେନ୍ଦ୍ର ସରକାରଙ୍କ ବିରୋଧରେ ଗାନ୍ଧିମାର୍ଗରେ ଗର୍ଜିଛନ୍ତି ଚାଷୀ । କଟକ ଓ ବରଗଡର ଜିଲ୍ଲାର ଚାଷୀ ସଂଗଠନର ସଦସ୍ୟମାନେ, ଧାନର ଏମଏସପି ବୃଦ୍ଧି ଓ ସ୍ୱାମୀନାଥନ କମିଟି ରିପୋର୍ଟ ଓ କୃଷକ ବୀମା ଲାଗୁ କରିବା ଦାବିରେ ଅହୋରାତ୍ର ଗଣଧାରଣା ଦେଇଛନ୍ତି । ମନ୍ତ୍ରୀ ଦିବ୍ୟଶଙ୍କରଙ୍କ ଇସ୍ତଫା ଦାବିରେ ବିଜେପି ବିଧାୟକମାନେ ଗୃହ ବାହାରେ ପ୍ରତିବାଦ କରିଛନ୍ତି । ମନ୍ତ୍ରୀ ଯେପର୍ଯ୍ୟନ୍ତ ନିର୍ଦ୍ଦୋଷ ବୋଲି ପ୍ରମାଣିତ ହୋଇନାହାନ୍ତି, ସେ ପର୍ଯ୍ୟନ୍ତ ବିଧାନସଭା ପ୍ରବେଶ ପାଇଁ ଅନୁମତି ନଦେବାକୁ ବାଚସ୍ପତିଙ୍କୁ ଅନୁରୋଧ କରିଛି ବିଜେପି । ଏବଂ ଏଥିପାଇଁ ଆଦେଶନାମା ଜାରି କରିବାକୁ ଦାବି କରିଛି ।