କନକ ବ୍ୟୁରୋ : ପୁଣି ପିପିଲିରେ ଉଡିଲା ବିଜେଡିର ବିଜୟ ବାନା, ଗଡିଲା ରୁଦ୍ରଙ୍କ ବିଜୟ ରଥ । ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକଙ୍କୁ ୨୦ ହଜାରରୁ ଅଧିକ ଭୋଟରେ ମାତ୍ ଦେଇ ପିପିଲି ବାଜି ଜିତିଛନ୍ତି ଜୁନିୟର ମହାରଥୀ । ଏପରିକି ୨୦୧୯ ତୁଳନାରେ ଅଧିକ ଭୋଟରେ ବିଜୟୀ ହୋଇ ରୁଦ୍ର ନୂଆ ଇତିହାସ ରଚିଛନ୍ତି । ଏହାସହ ବିଜେଡି ଗଡ ପିପିଲି ଗଡ ଅକ୍ତିଆର କରିବାକୁ ବିଜେପି ଯେଉଁ ସ୍ୱପ୍ନ ଦେଖିଥିଲା ତାହା ଅଧୁରା ରହିଛି । ପ୍ରଥମ ପଦାର୍ପଣରେ ପିପିଲି ଭଳି ହାଇଭୋଲଟେଜ ଆସନରେ ବିଜୟଲାଭ କରି ବିଜେଡିକୁ ବଡ ଭେଟି ଦେଇଛନ୍ତି ରୁଦ୍ର ।ଏନେଇ ପୁରୀ ଜିଲ୍ଲାପାଳଙ୍କ କାର୍ଯ୍ୟାଳୟରୁ ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ମୋଟ ୨୫ଟି ରାଉଣ୍ଡ ଭୋଟ ଗଣତି ହୋଇଥିବା ବେଳେ ମାତ୍ର ୪ଟି ରାଉଣ୍ଡରେ ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ଆଗୁଆ ରହିଥିବା ବେଳେ ବଳକା ୨୧ଟି ରାଉଣ୍ଡରେ ଆଗୁଆ ରହିଥିଲେ ବିଜେଡି ପ୍ରାର୍ଥୀ ରୁଦ୍ର ପ୍ରତାପ ମହାରଥୀ । ପ୍ରଥମରୁ ୧୮ଟି ରାଉଣ୍ଡ ପର୍ଯ୍ୟନ୍ତ ଆଗରେ ରହି ବିଜେଡିର ବିଜୟକୁ ନିଶ୍ଚିତ କରିଥିଲେ ରୁଦ୍ର । ତେବେ ଏହାପରେ କିଛି ରାଉଣ୍ଡରେ ଆଶ୍ରିତ ଆଗୁଆ ରହିଥିଲେ ମଧ୍ୟ ଏହା ଫଳାଫଳକୁ ପ୍ରଭାବିତ କରିପାରିନଥିଲା । କାରଣ ସେତେବେଳକୁ ବିଜେଡି-ବିଜେପି ମଧ୍ୟରେ ଭୋଟ ବ୍ୟବଧାନ ଯଥେଷ୍ଟ ଅଧିକ ହୋଇ ସାରିଥିଲା ।
ସେହିଭଳି କଂଗ୍ରେସ ପ୍ରାର୍ଥୀ ପ୍ରଥମରୁ ହିଁ ପଛରେ ରହି ଆସିଥିଲା । କୌଣସି ଗୋଟିଏ ବି ରାଉଣ୍ଡରେ ଦଳ ୩ ଅଙ୍କରୁ ଅଧିକ ଭୋଟ ହାସଲ କରିପାରିନଥିଲା । ଯାହା ଦଳକୁ ପ୍ରଥମରୁ ବ୍ୟାକଫୁଟକୁ ଠେଲି ଦେଇଥିଲା । ଏବେ ଏହି ବିଜୟ ସହ ବିଜେଡିର ପିପିଲି ଗଡକୁ ରକ୍ଷା କରିବାରେ ସଫଳ ହୋଇଛନ୍ତି ରୁଦ୍ର ।