କନକ ବ୍ୟୁରୋ : ବ୍ରଜରାଜନଗର ଉପ-ନିର୍ବାଚନକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି । ପ୍ରଚାର ମୈଦାନକୁ ପ୍ରାର୍ଥୀ ଓହ୍ଲାଇ ସାରିଥିବା ବେଳେ ଏବେ ବିଭିନ୍ନ ଦଳର ଷ୍ଟାର ପ୍ରଚାରକ ମାନେ ବ୍ରଜରାଜନଗର ମୁହାଁ ହେଲେଣି । ବିଜେଡି ନିଜର ଛାମୁଆ ନେତାଙ୍କୁ ବ୍ରଜରାଜନଗରର ବିଭିନ୍ନ ବ୍ଲକ ଓ ପଞ୍ଚାୟତକୁ ଓହ୍ଲାଇ ସାରିଛି । ଆଉ ଅନ୍ୟପଟେ ବିଜେପିର ବରିଷ୍ଠ ନେତା ପୃଥ୍ୱୀରାଜ ହରିଚନ୍ଦନ କହିଛନ୍ତି, ବିଜେପିର ପ୍ରଚାର ପ୍ରକ୍ରିୟା ଖୁବ ଶୀଘ୍ର ଆରମ୍ଭ ହେବ । ମେ ୨୦ ତାରିଖରୁ ବିଜେପି ଷ୍ଟାର କ୍ୟାମ୍ପେନର ପ୍ରଚାର ମୈଦାନକୁ ଓହ୍ଲାଇବେ । ଓଡିଶାର ତିନି କେନ୍ଦ୍ର ମନ୍ତ୍ରୀ, ପ୍ରହଲ୍ଲାଦ ଯୋଶୀ, ଛତିଶଗଡ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ଏବଂ ପ୍ରମୁଖ ନେତୃତ୍ୱ ମଧ୍ୟ ପ୍ରଚାରକୁ ଓହ୍ଲାଇବେ । ଯେହେତୁ ବ୍ରଜରାଜନଗରର ଲଖନପୁର ବ୍ଲକ ଛତିଶଗଡ ସୀମାକୁ ଲାଗିକି ରହିଛି ତେଣୁ ଛତିଶଗଡ ନେତୃତ୍ୱଙ୍କ ପ୍ରଭାବ ଉପ ନିର୍ବାଚନରେ ରହିବ ବୋଲି କହିଛନ୍ତି ପୃଥ୍ୱୀରାଜ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ବିଜେଡି ପକ୍ଷରୁ ମନ୍ତ୍ରୀ ଟୁକୁନି ସାହୁ କହିଛନ୍ତି, ବିଜେପିର କେନ୍ଦ୍ରମନ୍ତ୍ରୀ, କେନ୍ଦ୍ରୀୟ ନେତୃତ୍ୱ ଆସିଲେ ବି ବ୍ରଜରାଜନଗରରେ କିଛି ଫରକ ପଡ଼ିବନି । ବିଜେଡି ନିଶ୍ଚୟ ବିଜୟ ଲାଭ କରିବ । ମହିଳାଙ୍କ ଲାଗି ମୁଖ୍ୟମନ୍ତ୍ରୀ ଅନେକ ଯୋଜନା କରିଛନ୍ତି, ମହିଳାଙ୍କ ଭୋଟ ସବୁବେଳେ ବିଜୁ ଜନତା ଦଳକୁ ଯିବ, ସେ ଆଶା ଏବଂ ବିଶ୍ୱାସ ଅଛି । ଅଳକା ମହାନ୍ତି ବହୁତ ଭୋଟରେ ଜିତିବେ । ଯେତେ ନିର୍ବାଚନ ବା ଉପ ନିର୍ବାଚନ ଆସିଛି ସବୁଥିରେ ବିଜୁ ଜନତା ଦଳକୁ ସବୁବେଳେ ସଫଳତା ପାଇଛି । ମୁଖ୍ୟମନ୍ତ୍ରୀଙ୍କ ପ୍ରତ୍ୟେକ ଯୋଜନା ଏବଂ ତାର ସଫଳ ରୂପାୟନ ଏବଂ ଚିନ୍ତାଧାରା ଲୋକ ମାନଙ୍କ ପାଖରେ ପହଂଚିଛି । ଯାହାର ପ୍ରଭାବ ବ୍ରଜରାଜନଗର ଉପ ନିର୍ବାଚନରେ ନିଶ୍ଚୟ ପ୍ରତିଫଳିତ ହେବ ।