ନୂଆ ସଂସଦ ଭବନ ଉଦଘାଟନରେ ସାମିଲ ହେବ ବିଜେଡି । ପ୍ରେସ ରିଲିଜ ଜାରି କରି ଆଭିମୁଖ୍ୟ ସ୍ପଷ୍ଟ କଲା ଶାସକ ଦଳ

କନକ ବ୍ୟୁରୋ: ନୂଆ ସଂସଦ ଭବନ ଉଦଘାଟନ ସମାରୋହରେ ସାମିଲ ହେବ ବିଜେଡି । ଆଜି ନେଇ ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର ଏକ ପ୍ରେସ ରିଲିଜ ଜାରି କରିଛନ୍ତି । ଏଥିରେ କୁହାଯାଇଛି, ଭାରତର ରାଷ୍ଟ୍ରମୁଖ୍ୟ ହେଉଛନ୍ତି ରାଷ୍ଟପତି । ଆଉ ପାର୍ଲାମେଣ୍ଟ, ଦେଶ ୧୪୦ କୋଟି ଲୋକଙ୍କୁ ପ୍ରତିନିଧିତ୍ୱ କରୁଛି । ଉଭୟ ଅନୁଷ୍ଠାନ ଭାରତୀୟ ଗଣତନ୍ତ୍ରର ପ୍ରତୀକ । ଏମାନଙ୍କ ସମ୍ମାନ ଓ ଗାରିମା ସବୁଦିନ ସୁରକ୍ଷିତ ରହିବା ଦରକାର । ବିଜେଡି ବିଶ୍ୱାସ କରୁଛି , ଏହି ସାମ୍ବିଧାନିକ ସଂସ୍ଥା କୌଣସି ବିବାଦରୁ ଉଦ୍ଧ୍ୱର୍ରେ ରହିବା ଦରକାର । ଏଭଳି ହେଲେ ସେମାନଙ୍କ ସମ୍ମାନରେ ଆଞ୍ଚ ଆସିପାରେ ।

ନୂଆ ସଂସଦ ଭବନର ଉଦଘାଟନକୁ ତିନି ଦିନ ବାକି ଥିବା ବେଳେ ଏହାକୁ ନେଇ ରାଜନୀତି ଥମିବାର ନାଁ ନେଉନାହିଁ । ରାଷ୍ଟ୍ରପତିଙ୍କୁ ଡକାଯାଇନଥିବାରୁ କଂଗ୍ରେସ ସମେତ ମୋଟ ୧୯ ବିରୋଧୀ ଦଳ ଉତ୍ସବକୁ ବହିଷ୍କାର କରିବାକୁ ଘୋଷଣା କରିଛନ୍ତି । ସମସ୍ତ ବିରୋଧୀ ଦଳ ପକ୍ଷରୁ ମିଳିତ ବିବୃତି ଜାରିକରାଯାଇଛି । ବିରୋଧୀ ଦାବି କରିଛନ୍ତି, ପ୍ରଧାନମନ୍ତ୍ରୀ ନୁହେଁ ରାଷ୍ଟ୍ରପତି ନୂଆ ସଂସଦ ଭବନର ଉଦଘାଟନ କରନ୍ତୁ, ଯାହାକୁ ନେଇ ରାଜନୀତି ତେଜିଛି ।