କନକ ବ୍ୟୁରୋ: ବଲାଙ୍ଗୀରରେ ଦେଖିବାକୁ ମିଳିଛି ଅଭାବନୀୟ ଦୃଶ୍ୟ । ଅବସର ଥିଲା ସଂସ୍କୃତି ଭବନ ଉଦ୍ଦଘାଟନ ସମୟର । ଉଦଘାଟନ କାର୍ଯ୍ୟକ୍ରମରେ ଯୋଗଦେଇଥିଲେ ରାଜ୍ୟ ଉଚ୍ଚଶିକ୍ଷାମନ୍ତ୍ରୀ ରୋହିତ ପୂଜାରୀ, କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର, ଜିଲ୍ଲାପାଳ ଚଞ୍ଚଳ ରଣା, ବଲାଙ୍ଗୀର ମୁନସିପାଲଟି ଚେୟାରମ୍ୟାନ୍ ଲିକା ସାହୁଙ୍କ ସମେତ ଉଭୟ ଦଳର ସମର୍ଥକ । କିନ୍ତୁ ଉଦଘାଟନ ପରେ, ଘର ଭିତରେ ବସିଥିବା ସମୟରେ, ପଟ୍ଟା ବଣ୍ଟାକୁ ନେଇ ନରସିଂହ ମିଶ୍ର ଓ ବିଜେଡି କାଉନସିଲରଙ୍କର ଯୁକ୍ତିତର୍କ ହୋଇଥିଲା । ତାପରେ କଂଗ୍ରେସ ଓ ବିଜେଡି କର୍ମୀଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଧସ୍ତାଧସ୍ତି ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦଳର କର୍ମୀଙ୍କ ମଧ୍ୟରେ ଯେତେବେଳେ ମୁହାଁମୁହିଁ ହୋଇଥିଲେ, ସେତିକିବେଳେ ସେଠାରୁ କୌଶଳ କ୍ରମେ ଚାଲି ଯାଇଥିଲେ ମନ୍ତ୍ରୀ ରୋହିତ ପୂଜାରୀ ଓ ସାଂସଦ ନିରଞ୍ଜନ ବିଶି । ତାପରେ ଦୁଇ ଦଳର କର୍ମୀ ପରସ୍ପର ବିରୋଧରେ ନାରାବାଜି କରିଥିଲେ । ଆଉ ଉତ୍ତେଜନା ବଢ଼ୁଥିବାବେଳେ ଜିଲ୍ଲାପାଳ, ତାଙ୍କ ପିଏସଓ ଓ ଏସଡିପିଓ ଉଭୟ ଦଳର କର୍ମୀଙ୍କୁ ବୁଝାସୁଝା କରିବା ପରେ ସେମାନେ ସ୍ଥାନ ଛାଡି ଯାଇଥିଲେ ।
ପାଟିତୁଣ୍ଡ ପରେ ବିଜେଡି ଓ କଂଗ୍ରେସ କର୍ମୀ ଚାଲିଯାଇଥିଲେ ବି ଏହି ମାମଲା ଏବେ ଥାନାରେ ପହଞ୍ଚିଛି । ବିଜେଡି କାଉନସିଲର କଂଗ୍ରେସ ନେତା ଓ କର୍ମୀଙ୍କ ବିରୋଧରେ ଅଭିଯୋଗ କରିଛନ୍ତି । ଅନ୍ୟପଟେ ବିଧାୟକଙ୍କୁ ଦୁର୍ବ୍ୟବହାର କରାଯାଇଥିବା କଂଗ୍ରେସ ପକ୍ଷରୁ ଏତଲା ଦିଆଯାଇଛି । ଏବଂ ବିଜେଡିର ଅଭିଯୋଗକୁ ଖଣ୍ଡନ କରିଛି କଂଗ୍ରେସ ।
ଉଭୟ ପଟରୁ ଅଭିଯୋଗ ହୋଇଥିଲେ ବି, ପୋଲିସ କାହା ବିରୋଧରେ କାର୍ଯ୍ୟାନୁଷ୍ଠାନ ନେଇନି । ତଦନ୍ତ ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସୂଚନା ଦେଇଛନ୍ତି ବରିଷ୍ଠ ପୋଲିସ ଅଧିକାରୀ । ତେବେ ଏହି ପ୍ରସଙ୍ଗକୁ ନେଇ ସୋସିଆଲ ମିଡିଆରେ ଦୁଇ ଦଳର କର୍ମୀଙ୍କ ମଧ୍ୟରେ ଆରମ୍ଭ ହୋଇଛି କଳି ।