କ୍ରାଇମବ୍ରାଞ୍ଚ କଣ ଅପାରଗ ଯେ, ସିବିଆଇ ତଦନ୍ତ କରିବ । ପ୍ରସଙ୍ଗ ନଥିବାରୁ ପ୍ରହସନ କରୁଛନ୍ତି ବିରୋଧୀ । ଗୃହ ଅଚଳକୁ ନେଇ ବିରୋଧୀଙ୍କୁ ଟାର୍ଗେଟ କଲା ବିଜେଡି ।
କନକ ବ୍ୟୁରୋ : ସ୍ୱାସ୍ଥ୍ୟମନ୍ତ୍ରୀ ନବ ଦାସ ହତ୍ୟାକାଣ୍ଡ ପ୍ରସଙ୍ଗକୁ ନେଇ ବିରୋଧୀ ବାରମ୍ବାର ଗୃହରେ ହଟ୍ଟଗୋଳ କରୁଛନ୍ତି । ଯାହାଦ୍ୱାରା ଗୃହକାର୍ଯ୍ୟ ସ୍ୱାଭାବିକ ହୋଇପାରୁନି । ଆଉ ବିରୋଧୀଙ୍କ ଏଭଳି ଆଭିମୁଖ୍ୟକୁ ନେଇ ବର୍ଷିଛି ବିଜେଡି । ବିଜେଡି ବିଧାୟକ ଭାଗିରଥୀ ସେଠୀ କହିଛନ୍ତି, ନବ ଦାସ ହତ୍ୟାକାଣ୍ଡକୁ ନେଇ ଗୃହରେ ଆଲୋଚନା ହେଲା ପରେ କାହିଁକି ବିରୋଧୀ ହଟ୍ଟଗୋଳ କରୁଛନ୍ତି । ବିରୋଧୀ କହିଦେଲେ କଣ ମୁଖ୍ୟମନ୍ତ୍ରୀ ଇସ୍ତଫା ଦେଇଦେବେ ? ଏହା ସମ୍ଭବ ନୁହେଁ । ଗୃହରେ ତାଙ୍କର କିଛି ପ୍ରସଙ୍ଗ ନ ଥିବାରୁ ପ୍ରହସନ କରି ଗୃହକୁ ବନ୍ଦ ରଖୁଛନ୍ତି । ଆଗକୁ ନିର୍ବାଚନ ଥିବାରୁ ଏହାକୁ ଇସ୍ୟୁ କରାଯାଉଛି । କ୍ରାଇମବ୍ରାଞ୍ଚ ନବ ବାବୁଙ୍କ ହତ୍ୟାର ତଦନ୍ତ କରୁଛି, ସମୟ ଲାଗିବ । କ୍ରାଇମବ୍ରାଞ୍ଚ ଅପରାଗ ନୁହେଁ, ବହୁତ ତଥ୍ୟ ବାହାର କରୁଛି । ସିବିଆଇ କଣ ଅଧିକ କରିବ, ଆମ ପୋଲିସ କଣ ଅପାରଗ । ବିରୋଧୀଙ୍କ କହିବା ହାସ୍ୟାସ୍ପଦ । ଓଡିଶାରେ ସିବିଆଇ ତଦନ୍ତର ଫଳାଫଳ ଶୂନ ।
Kanak News is now on WhatsApp
Join and get latest news updates delivered to you via WhatsApp
ଏହାସହ ନବ ଦାସଙ୍କ ଚରିତ୍ରକୁ ନେଇ ବିରୋଧୀ ଯେଉଁ ପ୍ରଚାର କରୁଛନ୍ତି ତାହାକୁ ନେଇ ଭାଗିରଥୀ କହିଛନ୍ତି, ଯାହାର ଚରିତ୍ର ଖରାପ, ସେ ଅନ୍ୟର ଚରିତ୍ରକୁ ଆକ୍ଷେପ କରେ । ସେ ସ୍ୱର୍ଗରେ ରହିଲେଣି, ତାଙ୍କ ଚରିତ୍ର ସଂହାର କରିବାକୁ ନିନ୍ଦା କରୁଛି ବୋଲି କହିଛନ୍ତି ଭାଗିରଥୀ ।
ସେହିଭଳି ବିଜେଡି ବିଧାୟକ ସୁଧୀର ସାମଲ କହିଛନ୍ତି, ବିଜେପି ଓ କଂଗ୍ରେସ ବିଧାୟକ ବିଧାନ ସଭାକୁ ଯେପରି ବନ୍ଦ କରିଛନ୍ତି ସାଢେ଼ ଚାରି କୋଟି ଓଡିଆ ତାହା ଦେଖୁଛନ୍ତି । ସେମାନେ ଲୋକଙ୍କ ବିଭିନ୍ନ ସମସ୍ୟା ୧୦ଟା ୩୦ରୁ ୧୧ଟା ୩୦ ଉଠାଇବା କଥା । ହେଲେ ସେମାନେ ତାହା କରୁନାହାନ୍ତି । ୨୦୨୪ରେ ରାଜ୍ୟବାସୀ ଉଭୟ ଦଳକୁ ଏହାର ଜବାବ ଦେବେ । ଗୃହରେ ମୁଖ୍ୟମନ୍ତ୍ରୀ ମଧ୍ୟ ଜବାବ ଦେଇ ସାରିଛନ୍ତି । ମୁଖ୍ୟମନ୍ତ୍ରୀଙ୍କ ଲୋକପ୍ରିୟତାରେ ବର୍ତ୍ତମାନ ବିରୋଧୀ ଭୟଭୀତ ବୋଲି କହିଛନ୍ତି ସୁଧୀର ।