କନକ ବ୍ୟୁରୋ: ଐତିହାସିକ ତାରକସି କଟକ ସହରର ରାଜନୀତି ତାପମାତ୍ରା ବଢ଼ିବାରେ ଲାଗିଛି । କାରଣ ଗୋଟିଏପଟେ ସନ୍ଧ୍ୟାରେ କଟକ ସହରରେ ରୋଡ୍ ସୋ କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଅନ୍ୟପଟେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ମଧ୍ୟ ରୋଡ୍ ସୋ’ କରିବାର କାର୍ଯ୍ୟକ୍ରମ ରହିଛି । ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ରାଜନୈତିକ ଦଳଗୁଡ଼ିକ କସରତ ଜାରି ରଖିଥିବାବେଳେ ସିଲଭର ସିଟିରେ ଆଜି ସୁପର ସୋ’ ଦେଖିବାକୁ ମିଳିବ ବୋଲି ବିଭିନ୍ନ ମହଲରେ ଆଲୋଚନା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୨୩ ତାରିଖରେ ହେବାକୁଥିବା ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର ମୈଦାନକୁ ଓହ୍ଲାଇଛନ୍ତି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସୁପ୍ରିମୋ ଆଜି ମାରାଥନ୍ ପ୍ରଚାର କରି ମୟୁରଭଞ୍ଜ ଜିଲ୍ଲାର କରଞ୍ଜିଆ ଠାରୁ ପ୍ରଚାର ଆରମ୍ଭ କରିଛନ୍ତି । କରଞ୍ଜିଆରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବା ପରେ ସିଧାସଳଖ କେନ୍ଦୁଝରରେ ନିର୍ବାଚନ ପ୍ରଚାର କରିବା ସହ ସନ୍ଧ୍ୟାରେ କଟକରେ ଏକ ବିଶାଳ ରୋଡ୍ ସୋ କରିବାର କାର୍ଯ୍ୟକ୍ରମ ରହିଛି । ଦେବାଶିଷ ସାମନ୍ତରାୟ, ଚନ୍ଦ୍ର ସାରଥୀ ବେହେରା ଓ ସୌଭିକ୍ ବିଶ୍ୱାଳଙ୍କ ପାଇଁ ପ୍ରଚାର କରିବେ ବିଜେଡ଼ି ସୁପ୍ରିମୋ ନବୀନ ପଟ୍ଟାନାୟକ । ତେଣୁ ନବୀନ ନରାଜ ଠାରେ ହୋଇଥିବା ହେଲିପ୍ୟାଡରେ ପହଁଚିବାପରେ ସିଡିଏ ରାସ୍ତା ଦେଇ ରୋଡ଼୍ ସୋ କରି ଭୁବନେଶ୍ୱର ଅଭିମୁଖେ ଯାତ୍ରା କରିବେ । ଏହାପରେ ଭୁବନେଶ୍ୱରରେ ମଧ୍ୟ ମେଗା ରୋଡ୍ ସୋ’ କରିବାର କାର୍ଯ୍ୟସୂଚୀ ରହିଛି ।
ଅନ୍ୟପଟେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ମଧ୍ୟ ନବୀନଙ୍କ ରୋଡ୍ ସୋ’କୁ ଟକ୍କର ଦେବାକୁ ଅଣ୍ଟା ଭିଡ଼ିଛନ୍ତି । ତେଣୁ ଶାହା ସନ୍ଧ୍ୟାରେ କଟକରେ ପହଁଚି ସେ ଏଠାରେ ରୋଡ୍ ସୋ’ କରିବାର କାର୍ଯ୍ୟକ୍ରମ ରହିଛି । ତେବେ ଅମିତ୍ ଶାହା ସତ୍ୟବ୍ରତ ଷ୍ଟାଡିୟମ୍ ହେଲିପ୍ୟାଡରେ ପହଁଚିବା ପରେ ଚଣ୍ଡିମନ୍ଦିର ଅଭିମୁଖେ ଯିବେ । ଏହାପରେ ବକ୍ସି ବଜାର, ଚୌଧୁରୀ ବଜାର ଓ ଦରଘା ବଜାର ଦେଇ ଚଣ୍ଡି ମନ୍ଦିର ନିକଟରେ ପହଁଚିବେ ବୋଲି ଜଣାପଡ଼ିଛି । ଏହାପରେ ଦଳୀୟ କାର୍ଯ୍ୟକ୍ରମରେ ଯୋଗଦେବେ ବୋଲି ରାଜ୍ୟ ବିଜେପି କାର୍ଯ୍ୟାଳୟରୁ ସୂଚନା ମିଳିଛି । ଅନ୍ୟପଟେ ଦୁଇ ହେଭିୱେଟ୍ ନେତାଙ୍କ ଗସ୍ତ ପାଇଁ ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥା କଡ଼ାକଡ଼ି କରାଯାଇଥିବା କମିସନରେଟ୍ ପୋଲିସ ପକ୍ଷରୁ ସୂଚନା ମିଳିଛି ।