କନକ ବ୍ୟୁରୋ: ସାଧାରଣ ନିର୍ବାଚନ ପାଇଁ ବିଜେଡିର ସମରସଜ୍ଜା । ୬ ମାସ ଭିତରେ ବିଜେଡି ପୁଣି ଜିଲ୍ଲା ପର୍ଯ୍ୟବେକ୍ଷକଙ୍କ ତାଲିକାକୁ ପରିବର୍ତ୍ତନ କରିଛି । ଏହି ତାଲିକାରେ ସବୁଠାରୁ ବଡ କଥା ହେଲା ଧର୍ମେନ୍ଦ୍ରଙ୍କୁ ଚେକ ଦେବାକୁ ରଣନୀତି ତିଆରି କରିଛି ବିଜେଡି । ଆଉ ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶଙ୍କୁ ଏହି ଦାୟିତ୍ୱ ଦିଆଯାଇଛି । ଜାତୀୟ ଗଣମାଧ୍ୟମ ଓ ବିଜେପି ଅନ୍ଦରମହଲ ଚର୍ଚ୍ଚା ଅନୁସାରେ, ଆଗାମୀ ନିର୍ବାଚନରେ ଧର୍ମେନ୍ଦ୍ର ନିଜର ହୋମ ଗ୍ରାଉଣ୍ଡ ଢେଙ୍କାନାଳ କିମ୍ବା ସମ୍ବଲପୁରରୁ ନିର୍ବାଚନ ମୈଦାନକୁ ଆସିପାରନ୍ତି । ଏପରିକି ଧର୍ମେନ୍ଦ୍ର ଏହି ଜିଲ୍ଲାଗୁଡିକୁ ମାରାଥନ ଗସ୍ତ କରି ସଙ୍ଗଠନକୁ ସଜାଡୁଛନ୍ତି । ତେଣୁ ବିଜେଡି ଏହାର ଆଭାସ ପାଇ ଟାଣୁଆ ସଙ୍ଗଠକ ପ୍ରଣବଙ୍କୁ ଅନୁଗୁଳୁ, ଢେଙ୍କାନାଳ, କେନ୍ଦୁଝର ଓ ସମ୍ବଲପୁର ଜିଲ୍ଲା ଦାୟିତ୍ୱ ଦେଇଛି । ପୂର୍ବରୁ ଡେଙ୍କାନାଳ ଦାୟିତ୍ୱରେ ପ୍ରମିଳା ମଲ୍ଲିକ ଓ ସମ୍ବଲପୁର ଦାୟିତ୍ୱରେ ନଳିନୀ ପ୍ରଧାନ ଥିଲେ ।
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ତଳେ ବିଜେପି ରାଜ୍ୟ ମୁଖିଆ ପରିବର୍ତନ କରିବା ପରେ ବିଜେଡିର ପର୍ଯ୍ୟବେକ୍ଷକ ତାଲିକା ଘୋଷଣା ରାଜନୀତିକୁ ଅଧିକ ସରଗରମ କରିଛି । ବିଜେପି ନୂଆ ସଭାପତି ମନମୋହନ ସାମଲଙ୍କ ନିଜ ଜିଲ୍ଲା ଭଦ୍ରକରେ ନୂଆ ରଣନୀତି ସହ ମୈଦାନକୁ ଓହ୍ଲାଇବ ବିଜେଡି । ଏଠାରେ ପର୍ଯ୍ୟବେକ୍ଷକ ବଦଳାଯାଇ ପ୍ରତାପ ଜେନାଙ୍କୁ ନୂଆ ପର୍ଯ୍ୟବେକ୍ଷକ କରାଯାଇଛି । ବିଜେଡିର ସଙ୍ଗଠନ ଯେଉଁଠି ଦୁର୍ବଳ ରହିଛି ସେଠାରେ ଟାଣୁଆ ନେତାଙ୍କୁ ଜିଲ୍ଲା ଦାୟିତ୍ୱ ଦେଇଛନ୍ତି ଦଳର ସୁପ୍ରିମୋ ।
୩୦ଟି ଜିଲ୍ଲା ପାଇଁ ପର୍ଯ୍ୟବେକ୍ଷକ ଦାୟିତ୍ୱରେ ଅଛନ୍ତି ୯ ଜଣ ମନ୍ତ୍ରୀ । ଅତନୁ ସବ୍ୟସାଚି ନାୟକ ଏବଂ ଦିବ୍ୟଶଙ୍କର ମିଶ୍ରଙ୍କୁ ୨ ଟି ଲେଖାଏଁ ଜିଲ୍ଲାର ଦାୟିତ୍ୱ ଦିଆଯାଇଛି । ସେପଟେ ମନ୍ତ୍ରୀ ଟୁକୁନି ସାହୁ, ଉଷା ଦେବୀ, ରୋହିତ ପୁଜାରୀଙ୍କୁ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱରୁ ବାଦ ଦିଆଯାଇଛି ।