ଅକ୍ଷତ ରହିଛି ନବୀନଙ୍କ ଲୋକପ୍ରିୟତା : ଉପନିର୍ବାଚନରେ ଜିତି ପାରୁନାହାନ୍ତି ବିରୋଧୀ
ବିଜେପୁର, ବାଲେଶ୍ୱର ଓ ତିର୍ତୋଲ ପରେ ବିଜେଡି ଖାତାକୁ ଗଲା ପିପିଲି; ସାଧାରଣ ନିର୍ବାଚନ ତୁଳନାରେ ବଢ଼ି ଚାଲିଛି ଭୋଟ ବ୍ୟବଧାନ
କନକ ବ୍ୟୁରୋ : ଉପନିର୍ବାଚନରେ ଜିତି ପାରୁ ନାହାନ୍ତି ବିରୋଧୀ । ଏପରିକି ଜିତିଥିବା ସିଟ୍ ମଧ୍ୟ ବଂଚାଇ ପାରୁନାହାଁନ୍ତି ବିରୋଧୀ । ବରଗଡ଼ର ବିଜେପୁର,ବାଲେଶ୍ୱରର ସଦର, ଜଗତସିଂହପୁରର ତିର୍ତୋଲ ଏବଂ ପୁରୀର ପିପିଲି ସବୁ ନିର୍ବାଚନରେ ବାଜିମାତ କରିଛି ବିଜେଡି । ଯେତେ ଚେଷ୍ଟା କଲେ ବି ବିଜୟର ସ୍ୱାଦ ପାଇପାରୁ ନାହାଁନ୍ତି ବିଜେପି ଓ କଂଗ୍ରେସ । ୨୦୧୮ରେ ବିଜେପୁରରେ କଂଗ୍ରେସ ବିଧାୟକ ସୁବଳ ସାହୁଙ୍କ ମୃତ୍ୟୁ ପରେ ସେଠାରେ ହୋଇଥିବା ଉପନିର୍ବାଚନରେ ବିଜେଡି ବିପୁଳ ଭୋଟରେ ବିଜୟ ହୋଇଥିଲା । ବିଜେଡିରୁ ପ୍ରାର୍ଥୀ ହୋଇଥିବା ସ୍ୱର୍ଗତ ସୁବଳ ସାହୁଙ୍କ ସ୍ତ୍ରୀ ରୀତା ସାହୁ ୪୦ ହଜାରରୁ ଅଧିକ ଭୋଟରେ ବିଜୟୀ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
୨୦୨୯ରେ ବାଲେଶ୍ୱର ସଦର ନିର୍ବାଚନ ମଣ୍ଡଳୀରେ ବିଜୟୀ ହୋଇଥିବା ବିଜେପି ବିଧାୟକ ମଦନ ମୋହନ ଦତ ଏବଂ ଜଗତସିଂହପୁର ତିର୍ତୋଲ ବିଧାୟକ ବିଷ୍ଣୁ ଦାସଙ୍କ ଦେହାନ୍ତ ପରେ ୨୦୨୦ରେ ନଭେମ୍ବରରେ ଏହି ଦୁଇଟି ଆସନରେ ନିର୍ବାଚନ ହୋଇଥିଲା । ଉଭୟ ଆସନରେ ବିଜେଡି ବିଜୟୀ ହୋଇଥିଲା । ବାଲେଶ୍ୱର ସଦରରେ ବିଜେପିରୁ ପ୍ରାର୍ଥୀ ହୋଇଥିବା ମଦନଙ୍କ ପୁଅ ମାନସଙ୍କୁ ବିଜେଡି ପ୍ରାଥୀ ସ୍ୱରୁପ ଦାସ ୧୩ ହଜାରରୁ ଅଧିକ ଭୋଟରେ ହରାଇଥିଲେ । ସେହିପରି ତିର୍ତୋଲରେ ବିଜେଡି ପ୍ରାର୍ଥୀ ହୋଇଥିବା ବିଷ୍ଣୁଙ୍କ ପୁଅ ୪୦ ହଜାରରୁ ଅଧିକ ଭୋଟରେ ଜିତିଥିଲେ । ଏବେ ପିପିଲିରେ ପୁଣି ଜିତିଛି ବିଜେଡି ।
ସବୁଠି ବିଜେପି ଜୋର୍ଦାର୍ ଲଢ଼େଇ କରୁଛି । ଶାସକ ଦଳକୁ କଡ଼ା ଟକ୍କର ଦେଉଛି । ଦଳର ଭୋଟ୍ ହାର ବଢ଼ୁଛି । କିନ୍ତୁ ସଫଳତା ଛୁଇଁବା ଏ ଯାଏଁ ସହଜ ହେଉ ନାହିଁ । ୨୦୧୯ ସାଧାରଣ ନିର୍ବାଚନରେ କଂଗ୍ରେସକୁ ବହୁ ପଛକୁ ଠେଲି ଦେଇ ବିଜେପି ମୁଖ୍ୟ ବିରୋଧୀ ଦଳର ମାନ୍ୟତା ପାଇଛି ସତ । କିନ୍ତୁ ସଂଖ୍ୟା ଗଣିତରେ ବିଜେଡିଠାରୁ ଯଥେଷ୍ଟ ପଛରେ ରହିଛି ବିଜେପି । ବିଜେଡିକୁ ପଛକୁ ଠେଲି ଏକ ନମ୍ବରକୁ ଆସିବା ପାଇଁ ଦଳର ରଣନୀତି ସେତିକି ଦୃଢ଼ ହୋଇପାରୁ ନାହିଁ । ନିର୍ବାଚନ ବେଳେ ତୃଣମୂଳ ସ୍ତରରେ ଏହି ରଣନୀତିର ଅଭାବ ସ୍ପଷ୍ଟ ପରିଲକ୍ଷିତ ହେଉଛି ।
ରାଜ୍ୟରେ ପଞ୍ଚାୟତ ଓ ପୌର ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ ହୋଇଗଲାଣି । ତାହାର ଅବ୍ୟବହିତ ପୂର୍ବରୁ ପିପିଲି ଉପନିର୍ବାଚନର ଫଳାଫଳ ନିଶ୍ଚିତ ଭାବେ ରାଜ୍ୟ ରାଜନୀତିକୁ ସରଗରମ ରଖିବ । ବିଜେଡି ଶିବିରକୁ ଏହା ଚଳଚଞ୍ଚଳ କରିଦେଇଛି । ତ୍ରୁଟି ସୁଧାରି ବିଜେପି କିପରି ଆଗାମୀ ଦିନରେ ମୁକାବିଲା ପାଇଁ ରଣନୀତି କରୁଛି, ତାହା ଉପରେ ରାଜନୈତିକ ମହଲର ନଜର ରହିଛି । ଆଉ କଂଗ୍ରେସ ତାହାର ଶୋଚନୀୟ ସ୍ଥିତିକୁ ମୁକୁଳିବ ନା ଭୋଟ୍ ରାଜନୀତିରେ ଅପ୍ରାସଙ୍ଗିକ ହୋଇ ରହିବ, ତାହା ମଧ୍ୟ ବଡ଼ ପ୍ରଶ୍ନବାଚୀ ।