କନକ ବ୍ୟୁରୋ: ରାଜନୈତିକ ପ୍ରତିଦ୍ୱନ୍ଦିତା ଭିତରେ ବିଜେଡିର ଟିକେଟ୍ କସରତ ଜାରି ରହିଛି । ଏହି କ୍ରମରେ ଆଜି ୬ଟି ସଂସଦୀୟ କ୍ଷେତ୍ରର ବିଧାୟକ, ନେତା ଓ ପର୍ଯ୍ୟପେକ୍ଷକଙ୍କ ସହ ଚର୍ଚ୍ଚା କରିଛନ୍ତି ବିଜେଡି ସୁପ୍ରିମୋ । ପୂର୍ବାହ୍ନରେ ସମ୍ବଲପୁର, ସୁନ୍ଦରଗଡ଼ ଓ ଢେଙ୍କାନାଳ ଲୋକସଭା କ୍ଷେତ୍ରର ସମୀକ୍ଷା କରାଯାଇଥିବା ବେଳେ ଅପରାହ୍ନରେ ଜଗତସିଂହପୁର, ଯାଜପୁର ଏବଂ କଟକ ଲୋକସଭା ଆସନ ଏବଂ ଏହା ଅଧିନରେ ଆସୁଥିବା ୭ ବିଧାନସଭା ଆସନରେ ଦଳର କେଉଁ ନେତାଙ୍କୁ ଟିକେଟ୍ ଦିଆଯିବ ସେ ସଂକ୍ରାନ୍ତରେ ଚର୍ଚ୍ଚା ହୋଇଛି ।
ବିରୋଧୀ ପ୍ରାର୍ଥୀଙ୍କୁ ମାତ୍ ଦେବା ପାଇଁ କିଏ ଯୋଗ୍ୟ ପ୍ରାର୍ଥୀ? ଦଳକୁ ଜିତାଇବାରେ କେଉଁ ନେତା ସକ୍ଷମ? ମୁଖ୍ୟତଃ ଏହି ଦୁଇଟି ବିନ୍ଦୁରେ କେନ୍ଦ୍ରୀତ ରହିଛି ବିଜେଡିର ପ୍ରାର୍ଥୀ ଚୟନ କସରତ । ସୁପ୍ରିମୋଙ୍କ ଲୋକପ୍ରିୟତା ଓ ବିକାଶଧାରାକୁ ବଜାର ରଖିବା ପାଇଁ ଯିଏ ଯୋଗ୍ୟ, ହୁଏତ ସେ ଟିକେଟ୍ ପାଇବ ବୋଲି କୁହାଯାଉଛି ।
ପୂର୍ବାହ୍ନରେ ମନ୍ଥନ ହୋଇଥିବା ସମ୍ବଲପୁର, ସୁନ୍ଦରଗଡ଼ ଓ ଢେଙ୍କାନାଳ ଆସନରୁ ୨ଟି ବିଜେପି ହାତରେ ଥିବା ବେଳେ ଗୋଟିଏ ଲୋକସଭା ଶାସକ ବିଜେଡି ହାତରେ ରହିଛି । କିନ୍ତୁ ‘୨୪’ ଲଢ଼େଇରେ ୩ରୁ ୩ ଲୋକସଭା ଆସନ ପୋଛି ନେବା ଲକ୍ଷ୍ୟରେ ରହିଛି ବିଜୁ ଜନତା ଦଳ । ଏହି ଲକ୍ଷ୍ୟ ନେଇ ଦଳୀୟ ନେତା, ବିଧାୟକ, ସାଂସଦ, ପର୍ଯ୍ୟବେକ୍ଷକଙ୍କ ସହ ଚର୍ଚ୍ଚା ଆଲୋଚନା କରିଛନ୍ତି ସୁପ୍ରିମୋ ।
- ବିଜେଡି ଫୋକସରେ ସମ୍ବଲପୁର
- ଏଥର ବଦଳିବ ସମ୍ବଲପୁର ଗଣିତ?
ସମ୍ବଲପୁର ଲୋକସଭା ଆସନର ଗଣିତ କହୁଛି, ସମ୍ବଲପୁର ଅଧିନରେ ଆସୁଥିବା ୭ ବିଧାନସଭା ଆସନରୁ ବିଜେଡି ୪ଟି ଆସନ ଜିତିଥିବା ବେଳେ ବିଜେପି ହାତରେ ରହିଛି ୩ଟି ଆସନ । ତେବେ ସମ୍ବଲପୁର ଲୋକସଭା ଆସନ ସହ ସଂପୂର୍ଣ୍ଣ ୭ ବିଧାନସଭା ଆସନ ଜିତିବା ପାଇଁ ଲକ୍ଷ୍ୟ ରଖିଛି ଦଳ ।ଏପଟେ ଢେଙ୍କାନାଳ ଲୋକସଭା ଆସନରେ ବିଜେଡିକୁ ମିଳିଥିବା ସଫଳତା ଦୋହରାଇବା ଲକ୍ଷ୍ୟରେ ରହିଛି ଦଳ । ଗତଥର ଭଳି ଲୋକସଭା ଆସନ ସମେତ ୭ରୁ ୭ ବିଧାନସଭା ଆସନ ଜିତିବା ଲକ୍ଷ୍ୟରେ ରହିିଛି ବିଜେଡି । ତେବେ ସୁନ୍ଦରଗଡ଼ ଲୋକସଭା ଆସନ ପାଇଁ ବିଜେଡି କରିଛି ସ୍ୱତନ୍ତ୍ର ରଣନୀତି । କାରଣ, ଗତ ଦୁଇଟି ନିର୍ବାଚନରେ ବିଜେପି କବଜାରେ ରହିଛି ସୁନ୍ଦରଗଡ଼ ଲୋକସଭା । ଏଥର ଜୁଏଲ୍ ଓରାମଙ୍କୁ ଘେରିବା ପାଇଁ ବିଜେଡି ପ୍ରସ୍ତୁତ ହେଉଛି ।ଏସବୁ ଭିତରେ ଅପରାହ୍ନରେ ବିଜେଡି ଜଗତସିଂହପୁର, ଯାଜପୁର ଏବଂ କଟକ ଲୋକସଭା ଆସନ ଏବଂ ଏହି ଲୋକସଭା ଅଧିନରେ ଆସୁଥିବା ୨୧ଟି ବିଧାନସଭା ଆସନ ନେଇ ସମୀକ୍ଷା କରିଛନ୍ତି ବିଜେଡି ସୁପ୍ରିମୋ । ତେବେ ଦିନ ତମାମ୍ ଆଲୋଚନା କରିବା ସହ ବିକାଶ ବାର୍ତ୍ତା ନେଇ ଲୋକଙ୍କ ପାଖକୁ ଯିବା ପାଇଁ ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ ।