କନକ ବ୍ୟୁରୋ: ବିଜେଡି ବିଧାୟକଦଳ ନେତା ଭାବେ ନିର୍ବାଚିତ ହେବାପରେ ନବୀନ ବଖାଣିଲେ ସଫଳତାର ସୂତ୍ର । କହିଲେ, “ପଞ୍ଚମ ଥର ପାଇଁ ସାଢ଼େ ଚାରିକୋଟି ଓଡ଼ିଶାବାସୀ ମୋ ଉପରେ ବିଶ୍ୱାସ ରଖି ତାଙ୍କ ସେବା କରିବାରେ ସୁଯୋଗ ଦେଇଛନ୍ତି, ତେଣୁ ରାଜ୍ୟବାସୀଙ୍କୁ କୃତଜ୍ଞତା ଜଣାଉଛି । ଆଉ ବିଜେଡି ଉପରେ ରଖିଥିବା ଭରସାକୁ ସମ୍ମାନ ଜଣାଇ ଆଗକୁ ଶୃଙ୍ଖଳିତ ଭାବେ ଜନତାଙ୍କ ସେବା କରିବାକୁ ସମସ୍ତ ନବନିର୍ବାଚିତ ପ୍ରତିନିଧିଙ୍କୁ ଆହ୍ୱାନ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ନିରକୁଂଶଭାବେ ପଞ୍ଚମ ଥର ପାଇଁ ରାଜ୍ୟରେ କ୍ଷମତା ବଜାୟ ରଖିବାର ସଫଳତା ସୂତ୍ର ନେଇ ନବୀନ କହିଛନ୍ତି କି, ବିଜେଡି ସବୁବେଳେ ୨ଟି ଦିଗ ଉପରେ ଗୁରୁତ୍ୱ ଦେଇଥାଏ । ପ୍ରଥମଟି ହେଲା- ଜନତାଙ୍କ ଉପରେ ଧ୍ୟାନ ଏବଂ ଦ୍ୱିତୀୟଟି ଜନତାଙ୍କ ପାଇଁ କାମ ହିଁ ବିଜେଡିର ମୂଳମନ୍ତ୍ର । ଏପରିକି ରାଜନୀତି ଦଳମାନେ ଲୋକମାନଙ୍କ ସୁବିଧା ସୁଯୋଗକୁ ଯଦି ପ୍ରାଥମିକତା ଦିଅନ୍ତି ତେବେ ରାଜନୀତି କଦାପି କଠିନ କାର୍ଯ୍ୟ ନୁହେଁ ବୋଲି କହିଛନ୍ତି ନବୀନ ।
ଚଳିତ ନିର୍ବାଚନରେ ଅନେକ ଲୋକପ୍ରତିନିଧି ବିଧାନସଭାକୁ ପ୍ରଥମ କରି ନିର୍ବାଚିତ ହୋଇଛନ୍ତି । ସେମାନଙ୍କୁ ନବୀନ ସ୍ୱାଗତ ଜଣାଇ କିଛି ମନ୍ତ୍ର ଦେଇଛନ୍ତି । ଆଉ କହିଛନ୍ତି କି, ସବୁବେଳେ ସରଳ ଜୀବନଯାପନ କରନ୍ତୁ । କାରଣ ଆପଣ ଯେତେ ସରଳ ହେବେ ଲୋକାମନେ ଆପଣଙ୍କର ସେତେ ନିକଟତର ହୋଇପାରିବେ । ତେଣୁ ଆସନ୍ତୁ ସଭିଏଁ ନୂଆ ସରକାର ଏବଂ ନୂଆ ଆଶା ବିଶ୍ୱାସ ନେଇ କଠିନ ପରିଶ୍ରମ କରିବା ଓ ଓଡ଼ିଶାର ବିକାଶ ପାଇଁ ସଂକଳ୍ପ ନେବା ।