ବିଜେଡି ଟାର୍ଗେଟରେ ବାଲେଶ୍ୱର ସଦର ଆସନ । ବିଜେଡିର ନୂଆ ଚେହେରା ସ୍ୱରୂପ କୁମାର ଦାଶ । ସିଟ୍ ହାତେଇବା ଲକ୍ଷ୍ୟରେ ବିଜେଡି କରୁଛି ରଣନୀତି ।
କନକ ବ୍ୟୁରୋ : ସରଗରମ ହେଉଛି ଉପନିର୍ବାଚନ ରାଜନୀତି । ଦୁଇଟି ସିଟ୍ ଅକ୍ତିଆର ପାଇଁ ଦଳମାନଙ୍କ ମଧ୍ୟରେ ଚାଲିଛି ଜୋରଦାର ଅଙ୍କକଷା । ଉପନିର୍ବାଚନରେ କିଏ ମାରିବ ବାଜି, ତାହା ଉପରେ ପୂରା ରାଜ୍ୟର ନଜର । ୨୦୧୯ ବିଧାନସଭା ନିର୍ବାଚନରେ ବାଲେଶ୍ୱରର ସଦରରେ ବାଜି ମରିଥିଲା ଭାରତୀୟ ଜନତା ପାର୍ଟି । ବିଜେଡି ହାତରୁ ଏହି ଆସନ ଛଡାଇନେଇଥିଲା ବିଜେପି । ତେବେ ଏହି ଆସନରେ ପୂର୍ବରୁ ସବୁଜ ବାନା ଉଡାଇ ଆସୁଥିବା ବିଜେଡି ପୁଣିଥରେ ଏହି ସିଟକୁ ହାତେଇବାକୁ କରୁଛି ମାଷ୍ଟରପ୍ଲାନ ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ବିଧାନସଭା ନିର୍ବାଚନରେ ବିଜେଡିର ଜୀବନ ପ୍ରଦୀପ ଦାଶଙ୍କୁ ହରାଇ ବିଜୟୀ ହୋଇଥିଲେ ବିଜେପିର ମଦନ ମୋହନ ଦତ୍ତ । ହେଲେ ବିଧାୟକ ମଦନ ମୋହନ ଦତ୍ତଙ୍କ ଦେହାନ୍ତ ପରେ ଏବେ ଉପବନିର୍ବାଚନ ପାଇଁ ବିଗୁଲ ବାଜି ସାରିଛି । ଯୁଦ୍ଧ ପାଇଁ ନିର୍ବାଚନୀ ଋଣକ୍ଷେତ୍ରକୁ ପ୍ରତି ଦଳର ସିପାହୀ ମଧ୍ୟ ଓହ୍ଲାଇ ସାରିଛନ୍ତି । ବିଜେପି ମଦନ ମୋହନ ଦତ୍ତଙ୍କ ପୁଅ ମାନସ ଦତ୍ତଙ୍କୁ ମୈଦାନକୁ ଓହ୍ଲାଇବା ସହ ଅନୁକମ୍ପାର କାର୍ଡ ଖେଳି ପୁଣିଥରେ ନିଜ ଗଡ ବଞ୍ଚାଇବାକୁ ଗୋଟି ଚାଳନା କରିଛି । ଆଉ ଅନ୍ୟପଟେ ବିଜେପିକୁ ମାତ୍ ଦେବାକୁ ବିଜେଡି ଜୀବନଙ୍କ ବଦଳରେ ନୂଆ ମୁହଁ ସ୍ୱରୂପଙ୍କ ଉପରେ ଭରସା କରିଛି । ସେହିଭଳି କଂଗ୍ରେସ ଏହି ଆସନ ହାତେଇବାକୁ ଖେଳିଛି ମହିଳା କାର୍ଡ । ଦଳ ମମତା କୁଣ୍ଡୁଙ୍କୁ ପ୍ରାର୍ଥୀ କରି ମହିଳାଙ୍କ ଭୋଟ ସହ ବାଲେଶ୍ୱର ଆସନରେ ବିଜୟୀ ଟିକା ପିନ୍ଧିବାକୁ ରଣନୀତି କରିଛି ।
ବାଲେଶ୍ୱର ସଦର ଆସନରେ ବିଜେଡିର ବରିଷ୍ଠ ତଥା ଅଭିଜ୍ଞ ସିପାହୀ ହେଉଛନ୍ତି ଜୀବନ ପ୍ରଦୀପ ଦାସ । ୩ ଥରର ବିଧାୟକ । କିନ୍ତୁ ୨୦୧୯ ନିର୍ବାଚନରେ ରାଜ୍ୟରେ ବିଜେଡି ପୁଣିଥରେ ଶାସନ କ୍ଷମତାକୁ ଫେରିଥିଲେ ମଧ୍ୟ ବାଲେଶ୍ୱର ସଦର ଆସନରେ ମାତ୍ ଖାଇଥିଲେ ଜୀବନ । ଲଗାତାର ୨ ଥର ବିଜେଡି ଟିକେଟରୁ ବିଧାୟକ ହୋଇଥିଲେ ମଧ୍ୟ ୨୦୧୯ରେ ଭୋଟରଙ୍କ ଭରସା ଜିତିବାରେ ସକ୍ଷମ ହୋଇନଥିଲେ ଜୀବନ । ଯାହାଫଳରେ ବିଜେଡି ହାତରୁ ଖସି ଯାଇଥିଲା ବାଲେଶ୍ୱର ସଦର ଆସନ । ନିର୍ବାଚନୀ ମୈଦାନରେ ବାଜି ମାରି ନେଇଥିଲେ ବିଜେପିର ମଦନମୋହନ । ତେବେ ଉପନିର୍ବାଚନରେ ମଦନଙ୍କ ପୁଅକୁ ବିଜେପି ପ୍ରାର୍ଥୀ କରିଥିବାରୁ ଅନୁକମ୍ପା ଭୋଟ ପଦ୍ମ ପୋଖରୀ ଆଡକୁ ଭାସିଯିବାର ଯଥେଷ୍ଟ ସୁଯୋଗ ରହିଛି । ତେଣୁ ବିଜେପିର ଏହି ରଣନୀତିକୁ ଭେଦ କରିବାକୁ ଯାଇ ବିଜେଡି ପୁଣିଥରେ ନିଜର ପରାଜିତ ସିପାହୀଙ୍କୁ ମୈଦାନକୁ ନ ଛାଡି ନୂଆ ସିପାହୀ ଭାବେ ସ୍ୱରୂପଙ୍କୁ ସାମ୍ନାକୁ ଆଣିଛି ।
ସ୍ୱରୂପ ଦାଶ ହେଉଛନ୍ତି ବାଲେଶ୍ୱର ପୂର୍ବତନ ନଗରପାଳ ଦିବଙ୍ଗତ ଅନୁପ ଦାଶଙ୍କ ଭାଇ । ଏପରିକି ନବୀନଙ୍କ ଏହି ନୂଆ ସିପାହୀ ପୂର୍ବରୁ କାଉନସିଲର ଭାବେ ମଧ୍ୟ କାର୍ଯ୍ୟ କରିସାରିଛନ୍ତି । ବାଲେଶ୍ୱର ସଦର ଆସନରେ ସ୍ୱରୂପଙ୍କ ଯଥେଷ୍ଟ ଲୋକପ୍ରିୟତା ରହିଥିବା ବେଳେ ବଡ ସଙ୍ଗଠନ ମଧ୍ୟ ରହିଛି । ଏହାଛଡା ସ୍ୱରୂପ ର୍ନିବିବାଦୀୟ ଚେହେରା ହୋଇଥିବାରୁ ଭୋଟରଙ୍କ ମଧ୍ୟରେ ଖୁବଶୀଘ୍ର ଗ୍ରହଣୀୟ ହୋଇପାରନ୍ତି । ତେଣୁ ସେହି ବିଶ୍ୱାସ ଓ ଭରସାକୁ ପାଥେୟ କରି ସଦର ସମର ପାଇଁ ସ୍ୱରୂପଙ୍କୁ ମୈଦାନକୁ ଛାଡିଛନ୍ତି ବିଜେଡି ସୁପ୍ରିମୋ । ତେଣୁ ନବୀନଙ୍କ ବିଶ୍ୱାସ ଓ ଲୋକପ୍ର୍ରିୟତାକୁ ସ୍ୱରୁପ କିଭଳି ଭୋଟରେ ରୂପାନ୍ତରିତ କରିପାରୁଛନ୍ତି ତାହା ଉପରେ ରହିବ ସମସ୍ତଙ୍କର ନଜର ।