ପଶ୍ଚିମ ଓଡିଶାରେ ବିଜେଡିର ଦବଦବା: ବଡ ଚେହେରା ଥାଇ ବି ଗଡ଼ ରକ୍ଷା କରିପାରିଲାନି ବିଜେପି
କନକ ବ୍ୟୁରୋ: ୨୦୧୯ ସାଧାରଣ ନିର୍ବାଚନରେ ୮ଟି ସଂସଦୀୟ କ୍ଷେତ୍ରରେ ବିଜେପି ବିଜୟବାନା ଉଡାଇଥିଲା । କିନ୍ତୁ ପାଖାପଖି ୩ ବର୍ଷ ଭିତରେ ସବୁ କିଛି ଓଲଟପାଲଟ ହୋଇଯାଇଛି । ପଂଚାୟତ ଫଳାଫଳରେ ବିଜେପି ସାଂସଦମାନେ ନିଜ ଅଂଚଳରେ ବି ପତିଆରା ଦେଖାଇପାରିନାହାନ୍ତି
Kanak News is now on WhatsApp
Join and get latest news updates delivered to you via WhatsApp
ସୁନ୍ଦରଗଡ, ବରଗଡ,ସମ୍ବଲପୁର, ବଲାଙ୍ଗୀର, କଳହାଣ୍ଡି, ବାଲେଶ୍ୱର, ଭୁବନେଶ୍ୱର ଓ ମୟୁରଭଞ୍ଜ । ଇଏ ହେଉଛି ସେହି ୮ଟି ଲୋକସଭା ଆସନ ଯେଉଁଠି ବିଜେଡିର ପ୍ରଚଣ୍ଡ ହାୱା ସତ୍ୱେ ବିଜେପି ବିଜୟ ଲାଭ କରିଥିଲା । କିନ୍ତୁ ଏହି ପଂଚାୟତ ନିର୍ବାଚନରେ ସାଂସଦଙ୍କ ସମ୍ମାନ ଧୂଳିସାତ ହୋଇଛି । ପଶ୍ଚିମ ଓଡିଶାରେ ବସନ୍ତ ପଣ୍ଡା, ସୁରେଶ ପୂଜାରୀ, ନୀତେଶ ଗଙ୍ଗଦେବ, ସଙ୍ଗୀତା ସିଂହଦେଓ ନିଜ ନିଜ ଅଂଚଳରେ ବିଜେପିକୁ ଜିତାଇପାରିନାହାନ୍ତି ।
୨୦୧୭ ନିର୍ବାଚନରେ ପଶ୍ଚିମର ୧୦ଟି ଜିଲ୍ଲା ମଧ୍ୟରୁ ୬ଟି ଜିଲ୍ଲା ପରିଷଦ ଗଠନ କରିଥିଲା ବିଜେପି । ଯାହା ପରେ ସଂସଦୀୟ ନିର୍ବାଚନରେ ବିଜେପି ଜିତିବାରେ ସହାୟକ ହୋଇଥିଲା । କିନ୍ତୁ ଏଥ୍ର ଭୋଟରଙ୍କ ମୁଡ ବଦଳିଯାଇଛି । ବିଜେଡି ଜୋରଦାର ପ୍ରତ୍ୟାବର୍ତନ କରିଛି ।
ପୂର୍ବତନ କେନ୍ଦ୍ରମନ୍ତ୍ରୀ ଜୁଏଲ ଓରାମ, କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ଓ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ଭଳି ବିଜେପିର ବଡ ନେତାଙ୍କ ମଧ୍ୟ ଯାଦୁ ଚାଲିପାରିନାହିଁ । ୩୬ ଆସନ ବିଶିଷ୍ଟ ସୁନ୍ଦରଗଡ ଜିଲ୍ଲାରେ ଗତଥର ଝୁଲା ପରିସ୍ଥିତି ସୃଷ୍ଟି ହୋଇଥିଲା । ଏଥର ବିଜେଡି ବହୁ ଆଗରେ ଅଛି । ୨୦୧୭ରେ ମୟୁରଭଞ୍ଜରେ ୫୬ ଜିଲ୍ଲା ପରିଷଦ ଆସନରୁ ବିଜେପି ୪୯ ଆସନ ଜିତିଥିଲା । କିନ୍ତୁ ଏଥର ଅଙ୍କ ଓଲଟପାଲଟ ହୋଇଯାଇଛି । ଲୋକେ ବିଜେଡି ଉପରେ ଭରସା କରିଛନ୍ତି । ଖୋର୍ଧା ଓ ବାଲେଶ୍ୱରରେ ଅପରାଜିତା ଷଡଙ୍ଗୀ ଓ ପ୍ରତାପ ଷଡଙ୍ଗୀଙ୍କ ବି ସେହି ଅବସ୍ଥା । ଲୋକେ ବିଜେପି ଉପରେ ନୁହେଁ ବିଜେଡି ଉପରେ ଭରସା କରିଛନ୍ତିି ।