କମୁଛି ବିଜେପି-ବିଜେଡି ଦୂରତା? ଶ୍ୟାମାପ୍ରସାଦ ମୁଖାର୍ଜୀଙ୍କ ମୃତ୍ୟୁର ତଦନ୍ତ ଦାବି କଲେ ବିଜେଡି ସାଂସଦ ଭର୍ତ୍ତୃହରି ମହତାବ ।
ପ୍ରଥମେ ବିଜେପିକୁ ଗୋଟିଏ ରାଜ୍ୟସଭା ଆସନ ଟେକିଦେବା ଆଉ ଏବେ ଶ୍ୟାମାପ୍ରସାଦ ମୁଖାର୍ଜୀଙ୍କ ମୃତ୍ୟୁର ତଦନ୍ତ ପାଇଁ ବିଜେଡି ସାଂସଦ ଦାବି କରିବା ଅନେକ କିଛି ରାଜନୈତିକ ସଂକେତ ଦେଉଥିବା ଚର୍ଚ୍ଚା ହେଉଛି ।
କନକ ବ୍ୟୁରୋ: ଲୋକସଭାରେ ଉଠିଲା ବିଜେପିର ପ୍ରଣେତା ଶ୍ୟାମା ପ୍ରସାଦ ମୁଖାର୍ଜୀଙ୍କ ରହସ୍ୟମୟ ମୃତ୍ୟର ତଦନ୍ତ ଘଟଣା । ହେଲେ ଏହାର ତଦନ୍ତ ଦାବି ବିଜେପି ସଦସ୍ୟ ନୁହେଁ ବରଂ କରିଛନ୍ତି ବିଜେଡି ସାଂସଦ ଭର୍ତ୍ତୃହରି ମହତାବ । ୧୯୫୩ ମସିହା ଶ୍ରୀନଗର ଠାରେ ଜେଲରେ ଥିବାବେଳେ ଶ୍ୟାମା ପ୍ରସାଦଙ୍କ କିଭଳି ମୃତ୍ୟୁ ହୋଇଥିଲା, ତାହା ଉପରୁ ପରଦା ଉଠାଇବାକୁ ଲୋକସଭାରେ ଦାବି କରିଛନ୍ତି କଟକ ବିଜେଡି ସାଂସଦ ଭର୍ତ୍ତୃହରି ମହତାବ । ଏପରିକି ଯଦି ସରକାର ସୁବାଷ ଚନ୍ଦ୍ର ବୋଷଙ୍କ ଅନ୍ତର୍ଦ୍ଧାନ ବିଷୟରେ ଅନୁସନ୍ଧାନ କରିପାରିଲେ ତା’ହାଲେ ମୁଁ ଆଶା କରୁଛି ନୂଆ ସରକାର ଶ୍ୟାମା ପ୍ରସାଦ ମୁଖାର୍ଜୀଙ୍କ ମର୍ଡର ମିଷ୍ଟ୍ରିର ପର୍ଦ୍ଦାଫାଶ କରିପାରିବେ । କିଛି ଏଭଳି ଉକ୍ତ ବିଜେପି ସାଂସଦ ରଖିବା ପରେ ଚର୍ଚ୍ଚା ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମେ ବିଜେପିକୁ ଗୋଟିଏ ରାଜ୍ୟସଭା ଆସନ ଟେକିଦେବା ଆଉ ଏବେ ଶ୍ୟାମାପ୍ରସାଦ ମୁଖାର୍ଜୀଙ୍କ ମୃତ୍ୟୁର ତଦନ୍ତ ପାଇଁ ବିଜେଡି ସାଂସଦ ଦାବି କରିବା ଅନେକ କିଛି ରାଜନୈତିକ ସଂକେତ ଦେଉଥିବା ଚର୍ଚ୍ଚା ହେଉଛି । କୁହାଯାଉଛି, ବିଜେପି ଓ ବିଜେଡି ଭିତରେ ଆଉ ତିକ୍ତତା ନାହିଁ । ବରଂ ଉଭୟ ରାଜନୈତିକ ଦଳ ଅତୀତର ଧାରାରେ ଆଗକୁ ବଢିବାକୁ ଚାହୁଁଛନ୍ତି । ଅର୍ଥାତ୍ ମେଂଟ ସରକାରରେ ଅଂଶୀଦାର ଥିବା ବିଜେଡି ଏବେ ସହଯୋଗୀ ଦଳ ଭାବେ ନିଜର ଆଭିମୁଖ୍ୟ ରଖୁଥିବା ଦେଖିବାକୁ ମିଳୁଛି ।
ଲୋକସଭାରେ ବିଜେଡି ସାଂସଦ ଭର୍ତ୍ତୃହରି ଆହୁରି ମଧ୍ୟ କହିଛନ୍ତି କି, ପଶ୍ଚିମବଙ୍ଗ ବିଧାନସଭାରେ ଶ୍ୟାମା ପ୍ରସାଦ ମୁଖାର୍ଜୀଙ୍କ ରହସ୍ୟମୟ ମୃତ୍ୟ ଘଟଣାର ତଦନ୍ତ ପାଇଁ ସଂକଳ୍ପ ପାରିତ ହୋଇଥିଲା । କିନ୍ତୁ ଏହାର କୌଣସି ସୁଫଳ ମିଳିପାରିଲା ନାହିଁ ବରଂ ସେ ସଂକଳ୍ପ ପତ୍ର ସେଠାରେ ହିଁ ରହିଗଲା । ତେବେ ଭର୍ତ୍ତୁହରିଙ୍କ ପ୍ରସ୍ତାବ ଗୃହରେ ଉପସ୍ଥିତ ଥିବା ସମସ୍ତ ବିଜେପି ସଦସ୍ୟଗଣଙ୍କୁ ଆଶ୍ଚର୍ଯ୍ୟ କରିଥିଲା ଏବଂ ଭର୍ତ୍ତୃହରିଙ୍କୁ ପୂର୍ଣ୍ଣ ସହମତି ମଧ୍ୟ ଜଣାଇଥିଲେ । ଆଉ ଏହାର ତଦନ୍ତ ତୁରନ୍ତ କରିବାକୁ କେନ୍ଦ୍ର ସରକାରଙ୍କୁ ଅପିଲ୍ କରିଛନ୍ତି ।
ଅନ୍ୟପଟେ ବିଜେପିର ପ୍ରଣେତା ଶ୍ୟାମା ପ୍ରସାଦଙ୍କ ମର୍ଡର ମିଷ୍ଟ୍ରୀର ଖୋଳତାଡ କରିବାକୁ କାହିଁକି ବିଜେଡି ସାଂସଦ ଗୃହରେ ପ୍ରସ୍ତାବ ଆଣିଲେ ସେନେଇ ଚର୍ଚ୍ଚା ଜୋର ଧରିଛି । କ’ଣ ଏହା ପଛରେ କିଛି ରାଜନୈତିକ ଗନ୍ଧ ରହିଛି କି ? କ’ଣ ଏହା ବିଜେଡି-ବିଜେପି ମଧ୍ୟରେ ଦୂରତାକୁ ଦୂର କରିବାକୁ ଏକ ଯୋଗସୂତ୍ର କି? ନା ଶ୍ୟାମା ପ୍ରସାଦଙ୍କ ରହସ୍ୟମୟ ମୃତ୍ୟ ଘଟଣା ଉପରୁ ପରଦା ଉଠାଇବାକୁ ଭର୍ତ୍ତୃହରି ନିଜେ ଚାହୁଁଛନ୍ତି ? ଏଭଳି କିଛି ପ୍ରଶ୍ନ ଏବେ ରାଜନୈତିକ ମହଲକୁ ଗରମ କରିବାରେ ଲାଗିଛି ।
ଏଠାରେ ଉଲ୍ଲେଖଯୋଗ୍ୟ ଯେ, ଶ୍ୟାମା ପ୍ରସାଦ ମୁଖାର୍ଜୀ କାଶ୍ମୀରରୁ ଧାରା- ୩୭୦ ହଟାଇବା ଦାବୀରେ ୧୯୫୩ ମସିହାରେ ଜାମ୍ମୁ ଯିବା ପାଇଁ ନିଷ୍ପତି ନେଇଥିଲେ । ସେତେବେଳେ ଜାମ୍ମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଶେଖ ଅବଦୁଲ୍ଲା ମୁଖାର୍ଜୀଙ୍କୁ ଧମକ ଦେଲେ ଯେ, ଯଦି ସେ ଜାମ୍ମୁ କାଶ୍ମୀରର ସୀମା ମଧ୍ୟରେ ପ୍ରବେଶ କରିବେ ତେବେ ତାଙ୍କୁ ଗିରଫ କରି ନିଆଯିବ । କିନ୍ତୁ ସେ କାହା କଥାକୁ ଭ୍ରୁକ୍ଷେପ ନ କରି ଜାମ୍ମୁ କାଶ୍ମୀର ଆଡକୁ ପ୍ରବେଶ କରିଥିଲେ । ସୀମାରେ ପ୍ରବେଶ କରିବା ମାତ୍ରେ ହିଁ ମୁଖାର୍ଜୀଙ୍କୁ ଗିରଫ କରାଯାଇଥିଲା ଏବଂ ଜେଲରେ ରଖାଯାଇଥିଲା । ଏହାର କିଛି ଦିନ ପରେ ଜେଲରୁ ତାଙ୍କର ମୃତ୍ୟୁର ଖବର ଆସିଲା । ଅନେକ ରାଜନୈତିକ ଦଳ ମାନେ ଘୋଷଣା କରିଥିଲେ ଯେ ସରକାରକୁ ଆସିଲେ ଡ. ମୁଖାର୍ଜୀଙ୍କ ଜେଲର ମୃତ୍ୟୁ ଘଟଣାର ତଦନ୍ତ କରାଯିବ ଏବଂ ସତ୍ୟତାକୁ ପ୍ରକାଶ କରାଯିବ । କିନ୍ତୁ ୬ ଦଶନ୍ଧି ବିତିଯାଇଥିଲେ ମଧ୍ୟ ଦେଶରେ ଅନେକ ସରକାର ଆସିଛନ୍ତି ଏବଂ ଯାଇଛନ୍ତି । ମୁଖାର୍ଜୀଙ୍କ ମୃତ୍ୟୁର ରହସ୍ୟ ଆଜି ମଧ୍ୟ ରହସ୍ୟ ହୋଇ ରହିଛି ।