ମୂର୍ତ୍ତି ଉଚ୍ଚତାକୁ ନେଇ ବିଜେଡି-ବିଜେଡି ମୁହାଁମୁହିଁ । ସେପଟେ ୧୨ ଘଣ୍ଟିଆ କଟକ ବନ୍ଦ ଡାକରା ଦେଲା ବିଜେପି ।
କନକ ବ୍ୟୁରୋ: ମୂର୍ତ୍ତି ଉଚ୍ଚତାକୁ ନେଇ ଦୁଇ ଭାଗ ହୋଇଛନ୍ତି କଟକର ବିଜେଡି ନେତା । ଉଚ୍ଚତା କମିଲେ ପୂଜାରେ ବିଘ୍ନ ହେବ ବୋଲି କଟକ ଶାନ୍ତି କମିଟି ବୈଠକରେ ଭର୍ତ୍ତୃହରି ମହତାବ କହିବା ପରେ ଏହାକୁ କାଉଣ୍ଟର କରିଛନ୍ତି ବିଜେଡିର ପୂର୍ବତନ ବିଧାୟକ ଦେବାଶିଷ ସାମନ୍ତରାୟ । ସାଂସଦଙ୍କ ବୟାନ ସହରରେ ଅଶାନ୍ତି ସୃଷ୍ଟି କରିବ ବୋଲି ମତ ଦେଇଛନ୍ତି ଦେବାଶିଷ । ତେବେ ସଂକ୍ରମଣ ବଢ଼ିଲେ ସେଥିପାଇଁ କିଏ ଦାୟୀ ରହିବ ବୋଲି ସେ ପାଲଟା ପ୍ରଶ୍ନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାର୍ବଣରେ ଦେବୀ ମୂର୍ତ୍ତି ଉଚ୍ଚତା କଟକଣାକୁ ସରକାର ବଳବତ୍ତର ରଖିବା ପରେ ଶନିବାର ଦିନ କଟକରେ ଶାନ୍ତି କମିଟି ବୈଠକ ହୋଇଥିଲା । ଏହି ବୈଠକରେ ବି ମୂର୍ତ୍ତି ଉଚ୍ଚତାକୁ ନେଇ କଥା କଟାକଟି ହୋଇଥିଲା, ଶାନ୍ତି କମିଟି ବୈଠକରେ ଅଶାନ୍ତି ସୃଷ୍ଟି ହୋଇଥିଲା । ତେବେ ମୂର୍ତ୍ତି ଉଚ୍ଚତା ବଢ଼ାଇବା ପାଇଁ ମୁଖ୍ୟମନ୍ତ୍ରୀଙ୍କୁ ଭେଟି ଅନୁରୋଧ କରିବାକୁ ନିଷ୍ପତ୍ତି ହୋଇଛି । ସରକାର ନିଷ୍ପତ୍ତି ନ ବଦଳାଇଲେ ପୁଣି ଥରେ ଶାନ୍ତି କମିଟି ବୈଠକ ବସିବ ବୋଲି କୁହାଯାଇଛି ।
ଏହି ପ୍ରସଙ୍ଗରେ ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି, କରୋନା ଲଢ଼େଇରେ ନିର୍ଣ୍ଣାୟକ ମୋଡରେ ପହଁଚିଛୁ । ମୂର୍ତ୍ତି ଉଚ୍ଚତାକୁ ନେଇ ବିବାଦ ସୃଷ୍ଟି ନକରି ଆପୋଷ ସମାଧାନ କରିବା ଆବଶ୍ୟକ ବୋଲି କହିଛନ୍ତି ସୌମ୍ୟରଞ୍ଜନ । ଅନ୍ୟପଟେ ମୂୃର୍ତ୍ତି ଉଚ୍ଚତା କଟକଣା ପ୍ରତିବାଦରେ ସୋମବାର ୧୨ ଘଣ୍ଟିଆ କଟକ ବନ୍ଦ ଡାକରା । କଟକ ମହାନଗର ବିଜେପି ପକ୍ଷରୁ ଏହି ବନ୍ଦ ଡାକରା ଦିଆଯାଇଛି । ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ପାଳନ କରାଯିବ । ମାଲଗୋଦାମ ଓ ବ୍ୟବସାୟିକ ପ୍ରତିଷ୍ଠାନ ବନ୍ଦ ରଖିବାକୁ ଆହ୍ୱାନ ଦେଇଛି ବିଜେପି । ହାଇକୋର୍ଟଙ୍କୁ ବନ୍ଦ ପାଳନରେ ସାମିଲ ହେବାକୁ ନିବେଦନ କରାଯାଇଛି । ତେବେ ଜରୁରୀକାଳିନ ସେବାକୁ ବନ୍ଦରୁ ବାଦ ଦିଆଯାଇଛି । ବନ୍ଦ ସମୟରେ ରାସ୍ତାରୋକ କରାଯିବ ନାହିଁ ବୋଲି ବିଜେପି ପକ୍ଷରୁ କୁହାଯାଇଛି । ମୂର୍ତ୍ତି ଉଚ୍ଚତା ବୃଦ୍ଧି ନେଇ କଟକରେ ଅସନ୍ତୋଷ ବଢ଼ିବାରେ ଲାଗିଛି । ୧୬ ତାରିଖ ମଧ୍ୟରେ ସରକାର ନିଷ୍ପତ୍ତି ନବଦଳାଇଲେ, ପୂଜା କମିଟି କି ପଦକ୍ଷେପ ନେବ, ତା’ ଉପରେ ରହିଛି ସମସ୍ତଙ୍କ ନଜର ।