କନକ ବ୍ୟୁରୋ: ନିର୍ବାଚନ ତାରିଖ ଘୋଷଣା ହୋଇନି, କିନ୍ତୁ ନବୀନ ନିବାସରେ କିଛିଦିନ ହେଲା ଦେଖିବାକୁ ମିଳୁଛି ଟିକେଟ୍ ଆଶାୟୀଙ୍କ ଭିଡ଼ । ନିର୍ବାଚନ ମଣ୍ଡଳୀରେ ନରହି, ନେତା ଏବେ ହୋଇଛନ୍ତି ରାଜଧାନୀ ମୁହାଁ । କାଳେ ଟିକେଟ୍ କଟିଯିବ, ତାଙ୍କ ନିର୍ବାଚନମଣ୍ଡଳୀରେ ଅନ୍ୟ କେହି ଏଂଟ୍ରି ମାରିବେ, ଏହି ଆଶଙ୍କା ନେତାଙ୍କ ମନରେ । ତେଣୁ ନବୀନ ନିବାସ ଓ ଶଙ୍ଖଭବନରେ ଭିନ୍ନ ଭିନ୍ନ ଆଳ ଦେଖାଇ ଚକ୍କର କାଟୁଛନ୍ତି ନେତା ।…
Kanak News is now on WhatsApp
Join and get latest news updates delivered to you via WhatsApp
ଆଜି ନବୀନ ନିବାସରେ ପ୍ରବଳ ଭିଡ଼ ଦେଖିବାକୁ ମିଳିଥିଲା । ବିଜେଡିର ହେଭିୱେଟ୍ ନେତା ଅମର ଶତପଥୀ ତାଙ୍କ ସମର୍ଥକଙ୍କ ସହିତ ଆସିଥିଲେ । କହିଥିଲେ, ମୁଖ୍ୟମନ୍ତ୍ରୀ ଚଣ୍ଡିଖୋଲକୁ ଏନଏସି ଘୋଷଣା କରିଥିବାରୁ ସେ ଧନ୍ୟବାଦ ଦେବାକୁ ଆସିଛନ୍ତି ।
ଖୋର୍ଦ୍ଧା ଜିଲ୍ଲାର ବୋଲଗଡ଼ ବିଧାୟକ ରାଜେନ୍ଦ୍ର ସାହୁ ଏବଂ ଏହି ଆସନ ପାଇଁ ଆଶାୟୀ ଥିବା ପ୍ରଦୀପ ସାହୁ, ଉଭୟ ନିଜ ସମର୍ଥକଙ୍କ ସହ ପହଁଚିଥିଲେ ନବୀନ ନିବାସ । ପ୍ରଦୀପ ସାହୁ କହିଥିଲେ, ତୃଣମୂଳ ସ୍ତରରେ କାର୍ଯ୍ୟ କରୁଛନ୍ତି, ଯଦି ଟିକେଟ୍ ମିଳେ, ତେବେ ଲଢ଼ିବେ ନିର୍ବାଚନ ।
ସେହିପରି ଛତ୍ରପୁର ବିଧାୟକ ସୁବାସ ବେହେରା, ଆସ୍କା ବିଧାୟିକା ମଂଜୁଳା ସ୍ୱାଇଁ ଓ ତାଙ୍କ ପୁଅ ନଚିକେତା ସ୍ୱାଇଁ ପହଚିଁଥିଲେ ନବୀନ ନିବାସ । କାକଟପୁର ନିର୍ବାଚନ ମଣ୍ଡଳୀରୁ ପ୍ରାର୍ଥୀ ହେବା ପାଇଁ ଆଶାୟୀ ଥିବା ନେଇ ପୂର୍ବତନ ବିଧାୟକ ସୁର ସେଠୀଙ୍କୁ ମଧ୍ୟ ସମର୍ଥକଙ୍କ ସହ ଦେଖିବାକୁ ମିଳିଥିଲା ।
ଗଂଜାମ, ଖୋର୍ଦ୍ଧା, ଯାଜପୁର, ପୁରୀ ଅଂଚଳର ନେତା ସେମାନଙ୍କ ସମର୍ଥକଙ୍କ ସହ ନବୀନ ନିବାସକୁ ଆସିଥିଲେ । ଏନଏସି ଘୋଷଣା ହେଉ କିମ୍ବା ଅନ୍ୟ ବିକାଶମୂଳକ କାର୍ଯ୍ୟ ପାଇଁ ମୁଖ୍ୟମନ୍ତ୍ରୀଙ୍କୁ ଶୁଭେଚ୍ଛା ଓ ଧନ୍ୟବାଦ ଜଣାଇବା ଆଳରେ ନିଜ ଟିକେଟକୁ ପକ୍କା କରିବା ପାଇଁ ପ୍ରୟାସ ଆରମ୍ଭ କରି ଦେଇଛନ୍ତି ।