୯ରୁ ୪ ବିଧାୟକଙ୍କ ଟିକେଟ କାଟିଲେ ବିଜେଡି ସୁପ୍ରିମୋ । ନୂଆ ମୁହଁଙ୍କ ଉପରେ ନବୀନଙ୍କ ଭରସା
କନକ ବ୍ୟୁରୋ : ଘୋଷଣା ହେଲା ବିଜେଡିର ଦ୍ୱିତୀୟ ପର୍ଯ୍ୟାୟ ପ୍ରାର୍ଥୀ ତାଲିକା । ବିଜେଡି ସୁପ୍ରିମୋ ନବୀନ ପଟ୍ଟନାୟକ ୯ ଜଣ ପ୍ରାର୍ଥୀ ତାଲିକା ଘୋଷଣା କରିଥିବା ବେଳେ ଏଥିମଧ୍ୟରୁ ୪ ବିଧାୟକଙ୍କ ଟିକେଟ କାଟିଛନ୍ତି । ଏପରିକି ମନ୍ତ୍ରୀ ଥିବା ଯୋଗେନ୍ଦ୍ର ବେହେରାଙ୍କୁ ମଧ୍ୟ ଟିକେଟ ତାଲିକାରୁ ବାଦ୍ ଦେଇଛନ୍ତି ଦଳପତି ।
Kanak News is now on WhatsApp
Join and get latest news updates delivered to you via WhatsApp
ଲୋଇସିଂହାରୁ ଯୋଗେନ୍ଦ୍ର ବେହେରାଙ୍କ ବଦଳରେ ପ୍ରଦୀପ ବେହେରା, ଲାଞ୍ଜିଗଡରୁ ବଳଭଦ୍ର ମାଝୀଙ୍କ ବଦଳରେ ପ୍ରଦୀପ ଦିଶାରୀ, ପଟାଙ୍ଗୀରୁ ପ୍ରଫୁଲ ପାଙ୍ଗୀଙ୍କ ବଦଳରେ ପ୍ରୀତମ ପାଢି ଓ ମାଲକାନଗିରିରୁ ମାନଓ ମାଡକାମୀଙ୍କ ବଦଳରେ ମୁକୁନ୍ଦ ସୋଢିଙ୍କ ଉପରେ ଭରସା କରିଛି ଦଳ । ଏମାନଙ୍କ ବ୍ୟତୀତ ଝରିଗାଁରୁ ପ୍ରକାଶ ଚନ୍ଦ୍ର ମାଝୀ, ବଲାଙ୍ଗୀରରୁ ଅର୍କେଶ ନାରାୟଣ ସିଂହଦେଓ, ବ୍ରଜରାଜନଗରରୁ କିଶୋର ମହାନ୍ତି, ରେଢାଖୋଲରୁ ରୋହିତ ପୂଜାରୀ, ସମ୍ବଲପୁରରୁ ରାସେଶ୍ୱରୀ ପାଣିଗ୍ରାହୀଙ୍କୁ ପ୍ରାର୍ଥୀ କରିଛି ଦଳ ।
ଏହାପୂର୍ବରୁ ନବୀନ ସରକାରରେ ମନ୍ତ୍ରୀ ଥିବା ଲୋଇସିଂହାର ବିଧାୟକ ଯୋଗେନ୍ଦ୍ର ବେହେରା ନିର୍ବାଚନ ନ ଲଢିବା ନେଇ ସଂକେତ ଦେଇଥିଲେ । ତେବେ ତାଙ୍କ ବଦଳରେ ପୁଅକୁ ଟିକେଟ ଦେବାକୁ ବିଜେଡି ସୁପ୍ରିମୋଙ୍କୁ ଜଣାଇଥିଲେ ଯୋଗେନ୍ଦ୍ର । କିନ୍ତୁ ଲୋକପ୍ରିୟତା ଓ ବିଜୟ ସମ୍ଭାବନା ଥିବା ପ୍ରାର୍ଥୀଙ୍କୁ ଦଳ ଗୁରୁତ୍ୱ ଦେଇ ଥିବାରୁ ଯୋଗେନ୍ଦ୍ରଙ୍କ ପୁଅଙ୍କ ଟିକେଟ କଟିଥିବା ଚର୍ଚ୍ଚା ହେଉଛି ।
ଏହାପୂର୍ବରୁ ନବୀନ ଘୋଷଣା କରିଥିବା ୫୪ ପ୍ରାର୍ଥୀଙ୍କ ମଧ୍ୟରୁ ୧୪ ଜଣ ବିଧାୟକଙ୍କର ଟିକେଟ କାଟିଥିଲେ ନବୀନ । ଏପରିକି ୯ ସାଂସଦଙ୍କ ମଧ୍ୟରୁ ୮ ଜଣ ନୂଆ ପ୍ରାର୍ଥୀଙ୍କୁ ମୈଦାନକୁ ଓହ୍ଲାଇଛି ଦଳ । ତେଣୁ ୨୦୧୯ ନିର୍ବାଚନରେ ନୂଆ ମୁହଁଙ୍କ ଉପରେ ନବୀନ ଭରସା କରୁଥିବା ଦେଖିବାକୁ ମିଳିଛି ।
ଏହାପୂର୍ବରୁ ବିଜେଡି ପ୍ରଥମ ପର୍ଯ୍ୟାୟରେ ୯ ଲୋକସଭା ଓ ୫୪ ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିଥିଲା । ତେବେ ଆଜି ୯ଟି ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରିଛି ବିଜେଡି । ବିଜେପି ବର୍ତମାନ ସୁଦ୍ଧା ୧୫ଟି ଲୋକସଭା ଓ ୧୨୧ଟି ବିଧାନସଭା ପାଇଁ ପ୍ରାର୍ଥୀ ଘୋଷଣା କରିସାରିଛି । କଂଗ୍ରେସ ୮ ଲୋକସଭା ଓ ୧୦୦ ବିଧାନସଭା ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରିସାରିଛି ।
୨୦୧୯ ସାଧାରଣ ନିର୍ବାଚନ ପାଇଁ ଟିକେଟକୁ ନେଇ ସବୁ ରାଜନୈତିକ ଦଳରେ ଲାଗିରହିଛି କନ୍ଦଳ । ବିଶେଷ କରି ଟିକେଟ ଘୋଷଣା ହେବା ପରେ କିଛି ଦଳରେ ଅସନ୍ତୋଷ ତେଜୁଥିବା ଦେଖିବାକୁ ମିଳିଛି । ଆଉ ଏହାରି ଭିତରେ କେଉଁ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇଲେ, ଜନମତ ହାସଲ କରିହେବ, ସେନେଇ ମଧ୍ୟ ଚାଲିଛି ଅଙ୍କକଷା ।