କନକ ବ୍ୟୁରୋ : ତୃତୀୟ ଓ ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ବିଜେଡି ଆଉ ୧୮ଟି ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରିଛି । ଯେଉଁଥିରେ କିଛି ପୁରୁଣା ମୁହଁଙ୍କୁ ବାଦ୍ ଦିଆଯାଇଥିବା ବେଳେ କିଛି ନୂଆ ମୁହଁଙ୍କୁ ସୁଯୋଗ ମିଳିଛି । ଏପରିକି ଏହି ତାଲିକାରେ ହେଭିୱେଟଙ୍କ ନାଁ ମଧ୍ୟ ରହିଛି । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
Kanak News is now on WhatsApp
Join and get latest news updates delivered to you via WhatsApp
ଖାସକରି ଭଦ୍ରକ ଆସନରୁ ହେଭିୱେଟ ନେତା ଯୁଗଳ କିଶୋର ପଟ୍ଟନାୟକଙ୍କ ଟିକେଟ କଟିବା ପରେ ବିଜେଡି ଶିବିରରେ ହଲଚଲ ଦେଖିବାକୁ ମିଳିଛି । ୫ ଥର ଭଦ୍ରକ ଆସନରୁ ବିଧାୟକ ଥିବା ଯୁଗଳଙ୍କ ବଦଳରେ ଦଳ ନୂଆଁ ମୁହଁ ଭାବେ ସଞ୍ଜୀବ ମଲ୍ଲିକଙ୍କୁ ମୈଦାନକୁ ଓହ୍ଲାଇଛି । ପୂର୍ବରୁ କଂଗ୍ରେସରୁ ବିଜୟୀ ହୋଇ ଆସୁଥିବା ଯୁଗଳ ୨୦୦୯ ଓ ୨୦୧୪ରେ ବିଜେଡି ଟିକେଟରେ ବିଧାୟକ ହୋଇଥିଲେ । ତେବେ ଯୁଗଳଙ୍କ ବିରୋଧରେ ବଢୁଥିବା ଜନଅସନ୍ତୋଷକୁ ଦୃଷ୍ଟିରେ ରଖି ଦଳ ତାଙ୍କ ଉପରେ ପୁଣିଥରେ ଭରସା କରିନାହିଁ ।
ତୃତୀୟ ଓ ଚତୁର୍ଥ ପର୍ଯ୍ୟାୟର ନିର୍ବାଚନ ପାଇଁ ପ୍ରାର୍ଥୀ ତାଲିକା ଘୋଷଣା କଲା ବିଜେଡି । ପୁରୀରୁ ଲଢିବେ ମହେଶ୍ୱର ମହାନ୍ତି, ଜଟଣୀରୁ ଲଢିବେ ବିଭୂତି ବଳବନ୍ତରାୟ, ବାଲେଶ୍ୱରରୁ ଜୀବନ ପ୍ରଦୀପ ଦାସ, ବାଙ୍ଗିରିପୋଷିରୁ ସୁଦାମ ମାରାଣ୍ଡି । #ElectionWithKanakNews #Election2019 #BJD pic.twitter.com/IpLQySZ5wz
— Kanak News (@kanak_news) March 29, 2019
ସେହିଭଳି ଜଟଣୀରେ ଦୀର୍ଘ ୫ ବର୍ଷର ବନବାସ ପରେ ପୁଣିଥରେ ମୈଦାନକୁ ଓହ୍ଲାଇବେ ବିଭୂତି ବଳବନ୍ତରାୟ । ଦଳ ବିଧାୟକ ଥିବା ଭାଗିରଥୀ ବଡଜେନାଙ୍କ ବଦଳରେ ବିଭୂତିଙ୍କୁ ପୁଣିଥରେ ପ୍ରାର୍ଥୀ କରିଛି । କଂଗ୍ରେସରୁ ରାଜନୀତି କ୍ୟାରିୟର ଆରମ୍ଭ କରିଥିବା ବିଭୂତି ୨୦୦୯ ମସିହାରେ ବିଜେଡିରେ ଯୋଗ ଦେଇ ଜଟଣୀରୁ ପ୍ରଥମ ଥର ପାଇଁ ବିଧାୟକ ଭାବେ ନିର୍ବାଚିତ ହୋଇଥିଲେ । ତେବେ ମେ ୨୯ ମିଡନାଇଟ ଅପରେସନ ପରେ ଦଳ ତାଙ୍କୁ ସନ୍ଦେହ ଚକ୍ଷୁରେ ଦେଖିଥିଲା । ଯେଉଁଥିପାଇଁ ଦଳ ୨୦୧୪ରେ ଏଠାରେ ବିଭୂତିଙ୍କ ବଦଳରେ ଭାଗିରଥୀଙ୍କୁ ସୁଯୋଗ ଦେଇଥିଲା । ତେବେ ଦଳର ଜଣେ ଶୃଙ୍ଖଳିତ କର୍ମୀ ଭାବେ ଦୀର୍ଘ ୫ ବର୍ଷ କାମ କରିବା ସହ ବିଜେଡି ସୁପ୍ରିମୋଙ୍କ ଭରସା ଜିତିଥିଲେ ବିଭୂତି । ଯାହାର ଫଳସ୍ୱରୂପ ପୁଣିଥରେ ଦଳ ତାଙ୍କୁ ଜଟଣୀରୁ ସୁଯୋଗ ଦେଇଛି ।
ଆଜି ଘୋଷଣା ହୋଇଥିବା ୧୮ ପ୍ରାର୍ଥୀଙ୍କ ମଧ୍ୟରୁ ୯ଟି ଆସନରେ ପ୍ରାର୍ଥୀ ବଦଳାଇଛି ଦଳ । ତେବେ ୧୪୭ ଆସନ ମଧ୍ୟରୁ ଦଳ ଏପର୍ଯ୍ୟନ୍ତ ୧୧୯ଟି ଆସନରେ ପ୍ରାର୍ଥୀ ତାଲିକା ଘୋଷଣା କରିଥିବା ବେଳେ ଆହୁରି ୨୮ଟି ଆସନରେ ପ୍ରାର୍ଥୀ ଘୋଷଣା ବାକି ରହିଛି ।