କନକ ବ୍ୟୁରୋ : ଓଡ଼ିଶାରେ ବିଟ୍ କଏନ୍ ଠକେଇ । ବିଟ କଏନ ବା ଅନ ଲାଇନ ଡିଜିଟାଲ କରେନ୍ସି ନାଁରେ ଭୁବନେଶ୍ୱରରୁ ଲକ୍ଷାଧିକ ଟଙ୍କାର ଠକେଇ ଅଭିଯୋଗ । ପ୍ରଥମେ ବିଟ୍ କଏନ୍ ଜରିଆରେ ଟଙ୍କା ଦୁଇଗୁଣା କରିବାର ପ୍ରଲୋଭନ୍ ଓ ତାପରେ ଟଙ୍କା ନେଇ କୋଲକାତା ଫେରାର୍ । ଏହି ମାମଲାରେ ନୟାପଲ୍ଲୀ ପୁଲିସର ଗିରଫଦାରୀ ପରେ ଜଣାପଡ଼ିଛି ବିଟ୍ କଏନର କାହାଣୀ ।
Kanak News is now on WhatsApp
Join and get latest news updates delivered to you via WhatsApp
ବିଟ୍ କଏନ୍ ବା ଇଂଟରନେଟରେ ପ୍ରଚଳିତ ମୁଦ୍ରା ଜରିଆରେ ଟଙ୍କା ଦୁଇ ଗୁଣା କରିବାର ଲୋଭ ଦେଖାଇ ଠକେଇ । କିଛି ଏଭଳି କଥା ବୟାନ୍ କରୁଥିଲା ଶିବପ୍ରସାଦ ବିଶ୍ୱାଳଙ୍କ ଗିରଫ ଦାରୀର କାହାଣୀ । ବିଟ୍ କଏନର ଠକ ସର୍ଦ୍ଦାର ଗିରଫ ହେବାପରେ ପର୍ଦ୍ଦାଫାଶ୍ ହୋଇଛି ଆଉ ଏକ ଅଭିନବ ଠକେଇ ଘଟଣାର । ଯେଉଁଠି ଠକେଇର ଜରିଆ ପାଲଟିଥିଲା ବିଟ୍ କଏନ୍ ।
ନୟାପଲ୍ଲୀ ପୁଲିସ୍ ଏହି ଘଟଣାରେ ଅଭିଯୁକ୍ତଙ୍କୁ କୋର୍ଟଚାଲାଣ କରିଥିବା ବେଳେ ଦୁଇ ଅଭିଯୁକ୍ତ ହେଉଛନ୍ତି ଜଙ୍କିଆର ଶିବପ୍ରସାଦ ବିଶ୍ୱାଳ ଓ କେନ୍ଦ୍ରାପଡାର ରାକେଶ ଆଚାର୍ଯ୍ୟ । ଶିବପ୍ରସାଦ ୧୦ରୁ ଅଧିକ ଲୋକଙ୍କୁ ବିଟ କଏନ ମାଧ୍ୟମରେ ରାତାରାତି ୧୦ ଗୁଣା ଅଧିକ ଟଙ୍କା କରିବାର ଲୋଭ ଦେଖାଇ ୨୦ ଲକ୍ଷରୁ ଉଦ୍ଧ୍ୱର୍ ଟଙ୍କା ଠକେଇ କରିଥିବା କୁହାଯାଉଛି । ବିଟ୍ କଏନ୍ ଇଂଟରନେଟରେ ପ୍ରଚଳିତ ଏକ ମୁଦ୍ରା ଯାହାକୁ କୌଣସି ବ୍ୟାଙ୍କ ପକ୍ଷରୁ ଜାରି କରାଯାଇନଥାଏ । ତେବେ ଅର୍ଥବୃଦ୍ଧିର ସୁଯୋଗ ଥିବାରୁ ବିଶ୍ୱର ବିଭିନ୍ନ ଦେଶରେ ଏହା ବେଆଇନ୍ ଭାବେ ପ୍ରଚଳିତ । ଏବେ ଏଥିସହ ଯୋଡ଼ି ହୋଇଛି ଭୁବନେଶ୍ୱରର ଠକେଇ ।