ପକ୍ଷୀପ୍ରେମରେ ପୂର୍ବତନ ସରପଞ୍ଚ । ବେସାହାରା ଚଢେଇଙ୍କ ପାଇଁ ଗାଁ ସାରା ବୁଲି ବୁଲି ଗଛରେ ବସା ବାନ୍ଧୁଛନ୍ତି ଭଦ୍ରକର ପକ୍ଷୀପ୍ରେମୀ ସୁଶାନ୍ତ ।
କନକ ବ୍ୟୁରୋ: ପକ୍ଷୀପ୍ରେମରେ ପୂର୍ବତନ ସରପଞ୍ଚ । ଚଢେଇଙ୍କ ପାଇଁ ବାନ୍ଧୁଛନ୍ତି ବସା । ଆଜିର ବ୍ୟସ୍ତବହୁଳ ଜୀବନ, ସ୍ୱାର୍ଥପର ଦୁନିଆରେ ମଣିଷ ପାଖରେ ମଣିଷଟିଏ ପାଇଁ ସମୟ ନାହିଁ । ଜଣେ ଅନ୍ୟ ଜଣଙ୍କର ସୁଖ, ଦୁଃଖ ବୁଝିବାକୁ ବି ବେଳ ନାହିଁ । କିନ୍ତୁ ଏଠି ମଣିଷ ନୁହେଁ ପକ୍ଷୀ ପାଇଁ ଚାଲିଛି ଘର ତିଆରି, ଗଢା ହେଉଛି ଚଢେଇ ବସା । ମଣିଷର ଘରଖଣ୍ଡେ ଅଛି ବୋଲି ସେ ଆରାମରେ ମୁଣ୍ଡ ଗୁଞ୍ଜି ଜୀବନ ବିତାଉଛି । ହେଲେ ଯେଉଁ ପକ୍ଷୀମାନଙ୍କର ଘରଟିଏ ନାହିଁ, ବସା ଭାଙ୍ଗିଯାଇଛି ସେମାନେ କେମିତି ବଞ୍ଚୁଥିବେ । ବେସାହାରା ଚଢେଇଙ୍କ ଏ କଷ୍ଟ ବୁଝି ସେମାନଙ୍କ ପାଇଁ ନିଜ ହାତରେ ବସା ତିଆରି କରୁଛନ୍ତି ଏ ପକ୍ଷୀପ୍ରେମୀ ମଣିଷ । ଆଉ ତାଙ୍କୁ ସହଯୋଗ କରୁଛନ୍ତି ତାଙ୍କ ପତ୍ନୀ ।
Kanak News is now on WhatsApp
Join and get latest news updates delivered to you via WhatsApp
କାଠି କୁଟା ଦେଇ ଚଢେଇଙ୍କ ପାଇଁ ଛୋଟ ଛୋଟ ବସା ତିଆରି କରୁଛନ୍ତି ଭଦ୍ରକ ଧାମନଗର ବ୍ଲକ ପାଳସାହି ପଞ୍ଚାୟତର ପୂର୍ବତ ସରପଞ୍ଚ ସୁଶାନ୍ତ ନାୟକ । ଜନପ୍ରତିନିଧି ଭାବେ ଦିନେ ଲୋକଙ୍କ ସେବା କରି ପ୍ରଶଂସା ପାଉଥିଲେ ଆଉ ଏବେ ଚଢେଇସେବା କରି ପୁଣି ଚର୍ଚ୍ଚାରେ ରହିଛନ୍ତି ଏ ଦରଦୀ ମଣିଷ ।
ତେବେ ବନ୍ୟା, ବାତ୍ୟାରେ ପକ୍ଷୀଙ୍କ ବସା ଭାଙ୍ଗିଯିବାରୁ ଚଢେଇମାନେ ରହିବାକୁ ହଇରାଣ ହେଉଛନ୍ତି । ଗାଁରେ ବି ଏବେ ଧିରେଧିରେ ବିରାଟକାୟ ଗଛ ଲୋପ ପାଇବାକୁ ବସିଲାଣି ତେଣୁ
ପକ୍ଷୀଜାତିର ସୁରକ୍ଷା ପାଇଁ ଅଣ୍ଟା ଭିଡିଛନ୍ତି ସୁଶାନ୍ତ । ଆଉ ନିଜ ପତ୍ନୀଙ୍କ ସହଯୋଗରେ ନିଜ ଛୁଆଙ୍କ ପରି ଚଢେଇଙ୍କ ପାଇଁ ବି ତିଆରି କରି ଚାଲିଛନ୍ତି ବସା । ଇତିମଧ୍ୟରେ ପାଖାପାଖି ୧୦୦୦ଟି ବସା ବିଭିନ୍ନ ଗଛରେ ବାନ୍ଧି ସାରିଲେଣି ସୁଶାନ୍ତ । କେବଳ ନିଜ ଗାଁ ନୁହେଁ ପୂରା ଧାମନଗର ବ୍ଲକରେ ପକ୍ଷୀଙ୍କ ପାଇଁ ଏମିତି ବସା ବାନ୍ଧିବାକୁ ନିଷ୍ପତ୍ତି ନେଇଛନ୍ତି ସୁଶାନ୍ତ । ଆଉ ତାଙ୍କର ଏଭଳି ମନୋଭାବ ଦେଖି ଗାଁର ଯୁବକମାନେ ବି ତାଙ୍କୁ ଏକାମରେ ସାହାଯ୍ୟର ହାତ ବଢାଇଛନ୍ତି ।
ସେପଟେ ଏକ ଦୁର୍ଘଟଣା ଯୋଗୁଁ ଦୀର୍ଘଦିନ ଧରି ପୂର୍ବତନ ସରପଞ୍ଚ ଭଲରେ ଚଲାବୁଲା କରିପାରୁନଥିବା ବେଳେ ଚଢେଇଙ୍କ ପାଇଁ ଘରେ ବସି ବସା ବନାଉଛନ୍ତି । ଯାହା ଅନ୍ୟମାନଙ୍କ ପାଇଁ ପ୍ରେରଣା ଆଣିଦେବ । ଆଉ ପକ୍ଷୀକୂଳ ବିଲୁପ୍ତ ହେବାରୁ ବଞ୍ଚିଯିବ । ଆସନ୍ତୁ ସୁଶାନ୍ତଙ୍କ ପରି ଆମେମାନେ ବି ଚଢେଇ ସୁରକ୍ଷା ପାଇଁ ଏମିତି ଭଲ ଭଳ କାମ କରିବା ।