ମୀନାବଜାର ଭଳି ‘ହର୍ ଏକ ମାଲ୍’ ଦରରେ ବିକ୍ରି ହେଉଛି କୁକୁଡା । ଗୋଟିଏ କିଣିଲେ ୫୦ ଆଉ ଶହେ ଟଙ୍କା ଦେଲେ ମିଳୁଛି ମନପସନ୍ଦର ୩ଟା କୁକୁଡା
କନକ ବ୍ୟୁରୋ: ଶାଗ ମାଛ ମୂଲରେ ବିକ୍ରି ହେଉଛି କୁକୁଡା । ଗୋଟିଏକୁ ୫୦ ଟଙ୍କା ଆଉ ଶହେ ଟଙ୍କାରେ ୩ଟା କୁକୁଡା । ଆଉ ଏହି ଗୋଟିଏ ଗୋଟିଏ କୁକୁଡାର ଓଜନ ହେବ ପ୍ରାୟ ଏକ କେଜିରୁ ଦେଢ କେଜି । ଶୁଣିବାକୁ ସତ ଲାଗୁ ନଥାଇପାରେ । କିନ୍ତୁ ଏଭଳି ଦୃଶ୍ୟ ଦେଖିବାକୁ ମିଳିଛି ଅନୁଗୁଳ ଜିଲ୍ଲାର ମାଛ ମାର୍କେଟ ଓ ସାପ୍ତାହିକ ହାଟରେ । ଗତକାଲି ଆମିଷ ବାର ହୋଇଥିବାରୁ ଅନୁଗୁଳର ଏହି ଦୁଇଟି ଜାଗାରେ ଗୋଟିଏ କୁକୁଡା ଭର୍ତ୍ତି ମିନିଟ୍ରକ ଲାଗିଥିଲା । ଆଉ ଗାଡିରେ ଥିବା ୨ ଜଣ ବ୍ୟକ୍ତି ଲୋକଙ୍କୁ ସେମାନଙ୍କ ପସନ୍ଦ ମୁତାବକ କୁକୁଡା ବାଛି ଦେଉଥିବା ବେଳେ ତଳେ ଥିବା ଜଣେ ବ୍ୟକ୍ତି କିଣି ନେଉଥିବା ଲୋକଙ୍କଠାରୁ ଟଙ୍କା ରଖୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ମୀନା ବଜାରରରେ ହର୍ ଏକ ମାଲ୍..ବିକ୍ରି ଭଳି କୁକୁଡା ଗୋଟିଏକୁ ୫୦ ଟଙ୍କା ଲେଖାଏଁ ଦରରେ ବିକ୍ରି କରାଯାଉଥିଲା । ସେହିଭଳି ଯଦି କେହି ୩ଟାକୁ ଶହେ ଟଙ୍କା ଦରରେ ମାଗୁଥିଲେ ନିସଂକୋଚରେ ଦେଉଥିବା ଦେଖିବାକୁ ମିଳିଥିଲା । ମିନିଟ୍ରକ୍ ସାମ୍ନାରେ କୁକୁଡା କିଣିବା ପାଇଁ ଲୋକଙ୍କ ମଧ୍ୟରେ ବେଶ୍ ଭିଡ ଦେଖିବାକୁ ମିଳିଥିଲା ।
ତେବେ ଅନୁଗୁଳରେ ବାର୍ଡଫ୍ଲୁ ନଥିବା ସୂଚନା ପରେ ବି ଲୋକେ ଛାନିଆଁ ହୋଇ ଚିକେନଠାରୁ ମୁହଁ ଫେରାଉଛନ୍ତି । ଫଳରେ ଉଭୟ ଚାଷୀ ଏବଂ ବ୍ୟବସାୟୀଙ୍କ ଚିନ୍ତା ବଢିଯାଇଛି । ଗୋଟିଏ ବ୍ରଏଲର କୁକୁଡା ପାଳନ କରି ବଡ କରିବା ପାଇଁ ପ୍ରାୟ ୭୦ ଟଙ୍କା ଖର୍ଚ୍ଚ ହେଉଥିବା ବେଳେ ଏବେ କୁକୁଡା କିଲୋ ପ୍ରତି ୪୦ରୁ ୫୦ ଟଙ୍କା ମଧ୍ୟରେ ବିକୁଛନ୍ତି ଚାଷୀ । ଯଦି ଏପରି ସ୍ଥିତି ଆଗକୁ ଲାଗି ରହେ ତେବେ ଉଭୟ ଚାଷୀ ଓ ବ୍ୟବସାୟୀଙ୍କ ରୋଜଗାର ଶୂନ୍ୟ ହୋଇପଡିବା ବେଶି ଦୂର ନୁହେଁ ବୋଲି କୁହାଯାଉଛି ।