ତ୍ରିପୁରାରେ ନୂଆ ସରକାର ! ମୁଖ୍ୟମନ୍ତ୍ରୀ ଭାବେ ଶପଥ ନେଲେ ବିପ୍ଲବ ଦେବ

10

କନକ ବ୍ୟୁରୋ: ତ୍ରିପୁରାରେ ଆଜି ନୂଆ ସରକାର ଶପଥ ନେଇଛନ୍ତି । ୨୫ ବର୍ଷର ବାମପନ୍ଥୀ ସରକାରଙ୍କ ପତନ ଘଟାଇ ପ୍ରଥମ ଥର ଲାଗି ରାଜ୍ୟରେ ବିଜେପି କ୍ଷମତାସୀନ ହୋଇଛି । ତ୍ରିପୁରା ବିଜେପିର ସଭାପତି ବିପ୍ଲବ କୁମାର ଦେବ ଆଜି ରାଜ୍ୟର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି । ଅଗରତାଲାରେ ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବିଜେପି ଅଧ୍ୟକ୍ଷ ଅମିତ ଶାହା ବରିଷ୍ଠ ବିଜେପି ନେତା ଲାଲକୃଷ୍ଣ ଆଡ଼ଓ୍ଵାନୀ, ମୁରଲୀ ମନୋହର ଜୋଶୀ, ଗୃହମନ୍ତ୍ରୀ ରାଜନାଥ ସିଂହ ଏବଂ ବିଜେପି ଶାସିତ ତିନି ଉତ୍ତରପୂର୍ବାଞ୍ଚଳ ରାଜ୍ୟର ମୁଖ୍ୟମନ୍ତ୍ରୀମାନେ ଉପସ୍ଥିତ ଥିଲେ। ଏହାଛଡ଼ା ବିଦାୟୀ ମୁଖ୍ୟମନ୍ତ୍ରୀ ମାଣିକ ସରକାର ମଧ୍ୟ ଯୋଗ ଦେଇଥିଲେ।

ଆଜି ଦିନ ୧୨ଟାରେ ଅନୁଷ୍ଠିତ ହୋଇଛି ଶପଥଗ୍ରହଣ ସମାରୋହ । ଏଥିରେ ଯୋଗଦେବାକୁ ସମସ୍ତ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରାଯାଇଛି । ୬୦ ଆସନ ବିଶିଷ୍ଠ ବିଧାନସଭାରେ ବିଜେପିକୁ ୩୫ଟି ଆସନ ମିଳିଥିବାବେଳେ ସହଯୋଗୀ ଆଇପିଏଫଟି ୮ଟି ଆସନ ପାଇଛି ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.