କନକ ବ୍ୟୁରୋ : ବିଶ୍ୱକପ ବିଜେତା ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ପରେ ଭାରତୀୟ କ୍ରିକେଟର ଦାଦା ଭାବେ ଜଣାଶୁଣା ସୌରଭ ଗାଙ୍ଗୁଲିଙ୍କ ଜୀବନୀକୁ ନେଇ ଫିଲ୍ମ ନିର୍ମାଣ ହେବାକୁ ଯାଉଛି । ଏନେଇ ଖୋଦ୍ ସୌରଭ ସୋସିଆଲ ମିଡ଼ିଆରେ ସୂଚନା ଦେଇଛନ୍ତି । ସୌରଭଙ୍କ ବାୟୋପିକକୁ ନେଇ ଲବ ରଞ୍ଜନ ଓ ଅଙ୍କୁର ଗର୍ଗ ଫିଲ୍ମ ନିର୍ମାଣ କରିବେ । ଏନେଇ ଲବ ରଞ୍ଜନ ଇନଷ୍ଟାଗ୍ରାମରେ ଘୋଷଣା କରିବା ସହ କହିଛନ୍ତି, ଖେଳ ଆରମ୍ଭ ।
Kanak News is now on WhatsApp
Join and get latest news updates delivered to you via WhatsApp
Cricket has been my life, it gave confidence and ability to walk forward with my head held high, a journey to be cherished.
Thrilled that Luv Films will produce a biopic on my journey and bring it to life for the big screen 🏏🎥@LuvFilms @luv_ranjan @gargankur @DasSanjay1812— Sourav Ganguly (@SGanguly99) September 9, 2021
ସୌରଭ ଗାଙ୍ଗୁଲି । ବିସିସିଆଇର ସଭାପତି ଥିବା ସୌରଭ ପୂର୍ବରୁ ଭାରତୀୟ କ୍ରିକେଟ ଟିମର ଅଧିନାୟକ ରହିଛନ୍ତି । ୯୦ ଦଶକର କ୍ରିକେଟ କ୍ୟାରିୟର ଠାରୁ ବିସିସିଆଇ ସଭାପତି ପର୍ଯ୍ୟନ୍ତ, ବେଶ ରୋମାଞ୍ଚକର ରହିଛି ସୌରଭଙ୍କ ଯାତ୍ରା । ଭାରତୀୟ କ୍ରିକେଟର ଦାଦା ଭାବେ ଜଣାଶୁଣା ସୌରଭ ନିଜ କ୍ୟାରିୟରରେ ଅନେକ ରେକର୍ଡ ହାସଲ କରିଛନ୍ତି । ବିଦେଶରେ ବିଜୟ ଠାରୁ ଆରମ୍ଭ କରି ଯୁବ କ୍ରିକେଟରଙ୍କୁ ପ୍ରତିଭାସମ୍ପନ୍ନ କ୍ରିକେଟର ଭାବେ ଗଢିତୋଳିବା କ୍ଷେତ୍ରରେ ସୌରଭଙ୍କ ଅବଦାନ ଅତୁଳନୀୟ । ଗାଙ୍ଗୁଲି ଭାରତୀୟ କ୍ରିକେଟକୁ ଏକ ନୂଆ ପରିଚୟ ଦେଇଥିଲେ । ଆକ୍ରମଣାତ୍ମକ ଶୈଳୀରେ ବ୍ୟାଟିଂ କରିବା ହେଉ କି ସଠିକ୍ ସମୟରେ ୱିକେଟ ନେଇ ଦଳ ପାଇଁ ସୁରକ୍ଷାକବଚ ସାଜିଥାନ୍ତି ସୌରଭ । ବିଦେଶ ମାଟିରେ ଦଳକୁ ବିଜୟ ଭେଟିଦେବାର ଧାରା ସୌରଭଙ୍କ ପାଖରୁ ଆରମ୍ଭ ହୋଇଛି କହିଲେ ଅତ୍ୟୁକ୍ତି ହେବ ନାହିଁ । ସୌରଭଙ୍କ ଅଧିନାୟକତ୍ୱ ସମୟରେ ଦଳ ବୀରେନ୍ଦ୍ର ସେହୱାଗ, ଯୁବରାଜ ସିଂ, ହରଭଜନ ସିଂ, ମହମ୍ମଦ କୈଫ, ଜାହିର ଖାନ, ଆଶିଷ ନେହେରାଙ୍କ ଭଳି ଖେଳାଳି ଟିମ୍ ଇଣ୍ଡିଆ ପାଇଛି ।
ତେବେ ଅର୍ନ୍ତଜାତୀୟ କ୍ରିକେଟରୁ ଅବସର ନେବା ପରେ ପ୍ରଥମେ ବେଙ୍ଗଲ କ୍ରିକେଟ ଆସୋସିଏସନ ଏବଂ ତାପରେ ବିସିସିଆଇର ଅଧ୍ୟକ୍ଷ ଭାବେ ଦାୟିତ୍ୱ ତୁଲାଉଛନ୍ତି ସୌରଭ । ଗତ କିଛି ଦିନ ପୂର୍ବେ ବୀରେନ୍ଦ୍ର ସେହୱାଗଙ୍କ ସହ ସୌରଭ କେବିସିକୁ ଯାଇଥିଲେ । ପୂର୍ବରୁ ଟିଭି ପରଦାରେ ସୌରଭ ନଜର ଆସିଥିବା ବେଳେ ଖୁବଶୀଘ୍ର ବଡ ପରଦାରେ ନଜର ଆସିବ ଗାଙ୍ଗୁଲିଙ୍କ କ୍ରିକେଟ ଜୀବନୀ । ସୌରଭଙ୍କ ଜୀବନୀକୁ ନେଇ ଫିଲ୍ମ ନିର୍ମାଣ କରିବାକୁ ଥିବା ପ୍ରଡକ୍ସନ ସଂସ୍ଥା ଲବ୍ ଫିଲ୍ମସ ଏହାପୂର୍ବରୁ ସୋନୁ କି ଟିଟୁ କି ସ୍ୱିଟି, ଦେ ଦେ ପ୍ୟାର ଦେ, ମଲଙ୍ଗ, ଛଲାଙ୍ଗ ଭଳି ସଫଳ ଫିଲ୍ମ ଦର୍ଶକଙ୍କୁ ଭେଟି ଦେଇଛି । ତେଣୁ ସୌରଭଙ୍କ ଜୀବନୀକୁ ନେଇ ଲବ କିଭଳି ଫିଲ୍ମ ନିର୍ମାଣ କରୁଛନ୍ତି ତାହା ଉପରେ ସୌରଭଙ୍କ ପ୍ରଂଶସକ ସହ ଦର୍ଶକଙ୍କର ନଜର ରହିବ ।