ଭବ୍ୟ ସମାରୋହରେ ହେବ ମୋଦିଙ୍କ ଶପଥ ଗ୍ରହଣ ଉତ୍ସବ । ପାକିସ୍ତାନ ଓ ଚୀନକୁ ମିଳିଲାନି ନିମନ୍ତ୍ରଣ, ବିମଷ୍ଟେକ ରାଷ୍ଟ୍ରର ପ୍ରମୁଖ ଶପଥଗ୍ରହଣ ଉତ୍ସବରେ ହେବେ ସାମିଲ ।
ଆସନ୍ତା ୩୦ ତାରିଖରେ ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ନେବେ ନରେନ୍ଦ୍ର ମୋଦି । ବେଶ ଭବ୍ୟ ଢଙ୍ଗରେ ମୋଦିଙ୍କ ଶପଥଗ୍ରହଣ ଉତ୍ସବ ହେବ । ରାଷ୍ଟ୍ରପତି ଭବନରେ ହେବାକୁ ଥିବା ଭବ୍ୟ ସମାରୋହରେ ନରେନ୍ଦ୍ର ମୋଦି ଓ ତାଙ୍କ ମନ୍ତ୍ରୀମଣ୍ଡଳକୁ ପଦ ଓ ଗୋପନୀୟତାର ଶପଥ ପାଠ କରାଇବେ ରାଷ୍ଟ୍ରପତି ରାମନାଥ କୋବିନ୍ଦ । ଏହି ଶପଥଗ୍ରହଣ ଉତ୍ସବରେ ସାମିଲ ହେବାକୁ ଦେଶ ଓ ବିଦେଶର ଅନେକ ଜଣାଶୁଣା ଅତିଥିଙ୍କୁ ନିମନ୍ତ୍ରଣ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବିଦେଶ ମନ୍ତ୍ରାଳୟ ମୁତାବିକ ପ୍ରଧାନମନ୍ତ୍ରୀ ମୋଦିଙ୍କ ଶପଥ ଗ୍ରହଣ ଉତ୍ସବରେ ବିମଷ୍ଟେକ BIMSTEC ରାଷ୍ଟ୍ରମୁଖ୍ୟଙ୍କୁ ସାମିଲ ହେବାକୁ ନିମନ୍ତ୍ରଣ କରାଯାଇଛି । ପଡୋଶୀ ଦେଶ ସହ ସର୍ମ୍ପକ ସୁଦୃଢ ନୀତିକୁ ଦୃଷ୍ଟିରେ ରଖି ବିମଷ୍ଟେକ ରାଷ୍ଟ୍ର ପ୍ରମୁଖଙ୍କୁ ନିମନ୍ତ୍ରଣ କରାଯାଇଛି । ବିମଷ୍ଟେକରେ ବାଂଲାଦେଶ, ଶ୍ରୀଲଙ୍କା, ଥାଇଲାଣ୍ଡ, ନେପାଳ, ଭୂଟାନ ଓ ଭାରତ ସଦସ୍ୟ ରହିଛନ୍ତି । ଏହି ରାଷ୍ଟ୍ର ଗୁଡିକ ବ୍ୟତୀତ ଅର୍ନ୍ତଜାତୀୟସ୍ତରର ଅନ୍ୟ କିଛି ପ୍ରଭାବଶାଳୀ ନେତାଙ୍କୁ ମଧ୍ୟ ନିମନ୍ତ୍ରଣ କରାଯାଇପାରେ ।ଯେଉଁଥିରେ ଇସ୍ରାଏଲ ରାଷ୍ଟ୍ରପତି ବେଞ୍ଜାମିନ୍ ନେତ୍ୟାନାହୁ , ଶ୍ରୀଲଙ୍କାର ପୂର୍ବତନ ରାଷ୍ଟ୍ରପତି ମହିନ୍ଦ୍ରା ରାଜପକ୍ଷେ ରହିଛନ୍ତି ।
ଏସବୁ ଭିତରେ ମୋଦିଙ୍କ ଶପଥ ଗ୍ରହଣ ଉତ୍ସବକୁ ପଡୋଶୀ ପାକିସ୍ତାନ କିମ୍ବା ଚୀନକୁ ନିମନ୍ତ୍ରଣ କରାଯାଇନାହିଁ । ପଡୋଶୀ ରାଷ୍ଟ୍ର ସହ ଉତ୍ତମ ସର୍ମ୍ପକକୁ ପ୍ରାଥମିକତା ଦେଉଥିବା ମୋଦି ସରକାର ଗତ ୨୦୧୪ ନିର୍ବାଚନ ଶପଥଗ୍ରହଣ ଉତ୍ସବରେ ସାର୍କ ରାଷ୍ଟ୍ର ପ୍ରମୁଖଙ୍କୁ ନିମନ୍ତ୍ରଣ କରିଥିଲେ । ସାର୍କ ରାଷ୍ଟ୍ରରେ ସାମିଲ ଥିବା ପାକିସ୍ତାନ ଓ ଚୀନ ମଧ୍ୟ ଗତଥର ଭାରତର ନିମନ୍ତ୍ରଣ ରକ୍ଷା କରି ଶପଥ ଗ୍ରହଣ ଉତ୍ସବରେ ଯୋଗ ଦେଇଥିଲେ ।
ବିଦେଶ ରାଷ୍ଟ୍ର ପ୍ରମୁଖଙ୍କ ବ୍ୟତୀତ ଦେଶର ବିଭିନ୍ନ ରାଜନୈତିକ ଦଳର ମୁଖ୍ୟଙ୍କୁ ମଧ୍ୟ ମୋଦିଙ୍କ ଶପଥଗ୍ରହଣ ଉତ୍ସବକୁ ନିମନ୍ତ୍ରଣ କରାଯାଇଛି । ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ, ଆନ୍ଧ୍ରପ୍ରଦେଶ ବିଧାନସଭା ନିର୍ବାଚନରେ ବିପୁଳ ବିଜୟ ହାସଲ କରିଥିବା ୱାଇଏସଆରସିପି ମୁଖ୍ୟ ଜଗନମୋହନ ରେଡ୍ଡି, ଅଭିନେତାରୁ ନେତା ପାଲଟିଥିବା କମଲ ହସନଙ୍କୁ ମଧ୍ୟ ନିମନ୍ତ୍ରଣ କରାଯାଇଛି । ଏହାବାଦ୍ ଦେଶର ଅନ୍ୟ ବିରୋଧୀ ଦଳର ନେତାଙ୍କୁ ମଧ୍ୟ ଉତ୍ସବରେ ସାମିଲ ହେବାକୁ ଖୁବଶୀଘ୍ର ନିମନ୍ତ୍ରଣ କରାଯିବ ବୋଲି ସୂଚନା ମିଳିଛି ।