ମାଇକ୍ରୋସଫ୍ଟ ବୋର୍ଡ ଅଫ୍ ଡାଇରେକ୍ଟର୍ସ ପଦ ଛାଡିଲେ ବିଲ୍ ଗେଟସ୍ : ସାମାଜିକ କାମରେ ଏବେ ସମୟ ଦେବେ ଦୁନିଆର ସବୁଠାରୁ ଧନୀ ବ୍ୟକ୍ତି ।
ଟେକ୍ କମ୍ପାନୀ ମାଇକ୍ରୋସଫ୍ଟ ଘୋଷଣା କରିଛି ଯେ କମ୍ପାନୀର ସହ-ନିର୍ଦ୍ଦେଶକ ବିଲ୍ ଗେଟସ୍ ବୋର୍ଡ ଅଫ୍ ଡାଇରେକ୍ଟର୍ସ ପଦରୁ ଇସ୍ତଫା ଦେଇଛନ୍ତି । କମ୍ପାନୀ ପକ୍ଷରୁ କୁହାଯାଇଛି ଯେ , ବିଲ୍ ଗେଟସ୍ ଏବେ ସାମାଜିକ କାମରେ ସମୟ ଦେବାକୁ ଚାହୁଁଛନ୍ତି । ବିଶ୍ୱ ସ୍ୱାସ୍ଥ୍ୟ ଏବଂ ଶିକ୍ଷା ପାଇଁ ବିଲ୍ ଗେଟସ୍ କାମ କରିବାକୁ ଇଚ୍ଛାପ୍ରକାଶ କରିଥିବା କଥା କମ୍ପାନୀ କହିଛି । ସାମାଜିକ କାମର ଇଚ୍ଛାକୁ ପୂରଣ ପାଇଁ ସେ କମ୍ପାନୀର ଦାୟିତ୍ୱ ଭାରରୁ ମୁକ୍ତ ହେବାକୁ ଚାହୁଁଥିବା କଥା କମ୍ପାନୀ କହିଛି । ୬୪ ବର୍ଷୀୟ ଗେଟସ୍ ବହୁ ପୂର୍ବରୁ ହିଁ ଅଫିସ୍ ର ନିତିଦିନିଆ କାମରୁ ବିରତି ନେଇଯାଇଥିଲେ । ତେବେ ମାଇକ୍ରୋସଫ୍ଟର ସିଇଓ ସତ୍ୟ ନାଡେଲାଙ୍କ ସହ ଟେକନିକ୍ ପରାମର୍ଶଦାତା ରୁପେ ଗେଟସ୍ ଜଡିତ ହୋଇ ରହିବେ । ୨୦୧୪ ପ୍ରାରମ୍ଭରୁ ସେ ମାଇକ୍ରୋସଫ୍ଟର ବୋର୍ଡ ଅଫ୍ ଡାଇରେକ୍ଟର୍ସରେ ଚେୟାରମ୍ୟାନ୍ ପଦରେ କାମ କରିଥିଲେ । କିନ୍ତୁ ଏବେ ସେ ସମ୍ପୁର୍ଣ୍ଣ ରୁପେ ଏହି ପଦରୁ ହଟିବା କଥା କମ୍ପାନୀ କହିଛି । ମାଇକ୍ରୋସଫ୍ଟ ମୁଖ୍ୟ ଏକ୍ସିକ୍ୟୁଟିଭ୍ ଅଫିସର୍ ସତ୍ୟ ନାଡେଲା ଏକ ପ୍ରେସ୍ ରିଲିଜ୍ ରେ କହିଥିଲେ , ଏତେ ବର୍ଷ ବିଲ୍ ଗେଟସ୍ ଙ୍କ ସହ କାମ କରିବା ମୋ ପାଇଁ ଏକ ସମ୍ମାନର କଥା । ଗେଟସ୍ କାମରୁ ଅବସର ନେଲେ ବି କମ୍ପାନୀ ତାଙ୍କ ଠାରୁ ହିଁ ପରାମର୍ଶ ନେବ ।
Kanak News is now on WhatsApp
Join and get latest news updates delivered to you via WhatsApp
ଗେଟସ୍ ୨୦୦୦ ରେ ମାଇକ୍ରୋସଫ୍ଟ ସିଇଓ ପଦରୁ ଇସ୍ତଫା ଦେଇଥିଲେ ଏବଂ ସେତେବେଳେ କମ୍ପାନୀର ଦାୟିତ୍ୱ ଷ୍ଟେଭ୍ ବାଲମର୍ ଙ୍କୁ ଦିଆଯାଇଥିଲା । ଆପଣଙ୍କୁ କହିରଖୁଛୁ , ବିଲ୍ ଗେଟସ୍ ଙ୍କ ନାଁ ଦୁନିଆର ସବୁଠାରୁ ଧନୀ ଲୋକଙ୍କ ତାଲିକାରେ ନିୟମିତ ପ୍ରଥମ ସ୍ଥାନରେ ରହିଥାଏ । ୧୩ ବର୍ଷ ବୟସରୁ ହିଁ ସେ ପ୍ରୋଗ୍ରାମିଙ୍ଗ୍ ଦୁନିଆରେ ପାଦ ଥାପିଥିବା କଥା କୁହାଯାଉଛି ।