କାହିଁକି ବିଳମ୍ବ ହେଉଛି ବିଜେପୁର ନିର୍ବାଚନର ତାରିଖ ଘୋଷଣା : ବିଜେଡିର ଅଭିଯୋଗ, ବିଳମ୍ବ କରିବା ପାଇଁ ଚାପ ପକାଉଛି ବିଜେପି
କନକ ବ୍ୟୁରୋ : ବିଜେପି ଚାପରେ ନିର୍ବାଚନ କମିଶନ ବିଜେପୁର ଉପ-ନିର୍ବାଚନ ଘୋଷଣା ବିଳମ୍ବ କରୁଛନ୍ତି । କାରଣ ବିଜେପି ଜାଣିଛି ବିଜେପୁରରେ ଦଳ ତିନି ନମ୍ବର ସ୍ଥାନରେ ରହିବ । ଏମିତି ଅଭିଯୋଗ ଆଣିଛନ୍ତି ବିଜେଡି ନେତା ତଥା ଶ୍ରମ ମନ୍ତ୍ରୀ ସୁଶାନ୍ତ ସିଂ । ବରଗଡ ଜିଲ୍ଲାର ହେଭିୱେଟ୍ ସୁଶାନ୍ତ ସିଂଙ୍କ ଏମିତି ମନ୍ତବ୍ୟ ପରେ ପୁଣି ଜୋର ଧରିଛି ବିଜେପୁରକୁ ନେଇ ରାଜନୀତି ।
Kanak News is now on WhatsApp
Join and get latest news updates delivered to you via WhatsApp
ମନ୍ତ୍ରୀ କହୁଛନ୍ତି ଯଦି କଂଗ୍ରେସ ଗାଏସିଲଟ ବ୍ଲକ ଅଧ୍ୟକ୍ଷ ପ୍ରଣୟ ସାହୁଙ୍କୁ ଟିକେଟ ଦିଏ, ତେବେ ବିଜେପୁରରେ ବିଜେପି ତୃତୀୟ ସ୍ଥାନରେ ରହିବ । ତେଣୁ ନିଜ ସ୍ଥିତି ଦୁର୍ବଳ ଥିବା ଜାଣି ବିଜେପି ବର୍ତମାନ ନିର୍ବାଚନ ସପକ୍ଷରେ ନାହିଁ । କିନ୍ତୁ ବିଜେପି ଏହାକୁ ଦୃଢ ଭାବେ ଖଣ୍ଡନ କରିଛି ।ବିଜେପୁରର କଂଗ୍ରେସ ନେତା ପ୍ରଣୟ ସାହୁ । ୧୯୯୭ରୁ ବର୍ତମାନ ପର୍ଯ୍ୟନ୍ତ ଗାଏସିଲଟ ବ୍ଲକରେ କଂଗ୍ରେସର ମଙ୍ଗ ଧରିଥିବା ଏହି ନେତାଙ୍କୁ କଂଗ୍ରେସ ଟିକେଟ ଦେବାର ଯଥେଷ୍ଟ ସମ୍ଭାବନା ରହିଛି । ଆଉ ପ୍ରଣୟ ଲଢେଇକୁ ଆସିଲେ ତ୍ରିମୂଖୀ ପ୍ରତିନ୍ଦ୍ୱଦିତା ହେବ ବୋଲି ଆଶା କରୁଛନ୍ତି ଉଭୟ ବିଜେପି ଓ ବିଜେଡି ।
କଂଗ୍ରେସର ଗଡ କୁହାଯାଉଥିବା ବିଜେପୁର ପାଇଁ କଂଗ୍ରେସ ମଧ୍ୟ ତାର ଅଭିଯାନ ଆରମ୍ଭ କରିସାରିଛି । ଦିବଂଗତ କଂଗ୍ରେସ ନେତା ସୁବଳ ସାହୁଙ୍କ ପତ୍ନୀ ବିଜେଡିକୁ ଯିବା ପରେ ନିଜ ଦମରେ ବିଜେପୁର ହାତେଇବାକୁ ଆଶା ରଖିଛି ।କୁହାଯାଉଛି ବିଜେପୁର ପାଇଁ ନବୀନ ସରକାରଙ୍କ ପ୍ୟାକେଜ୍ ଘୋଷଣାକୁ ଚେକମେଟ ଦେବାପାଇଁ ବିଜେପି ଚିନ୍ତା କରୁଛି । ଆଉ ଏହାରି ଭିତରେ ପ୍ରଣୟଙ୍କ ପ୍ରାର୍ଥୀତ୍ୱକୁ ନେଇ ତ୍ରିମୂଖୀ ଲଢେଇ ମଧ୍ୟ ଆଶା କରୁଛନ୍ତି ଦୁଇ ଦଳ ।