ନାମାଙ୍କନକୁ ତିନିଦିନ ବାକି, ଚୂଡାନ୍ତ ହୋଇପାରୁନି କଂଗ୍ରେସର ବିଜେପୁର ପ୍ରାର୍ଥୀ : ରିପୁନାଥ ସେଠ୍ ଓ ପ୍ରଣୟ ସାହୁଙ୍କୁ ନେଇ ନେତାଙ୍କ ଭିତରେ ଛକାପଂଝା
କନକ ବ୍ୟୁରୋ : ବିଜେପୁର ପାଇଁ କିଏ କଂଗ୍ରେସ ପ୍ରାର୍ଥୀ ହେବେ ତାକୁ ନେଇ ଏବେବି ସସପେନ୍ସ । ପ୍ରଣୟ ସାହୁ ବନାମ ରିପୁନାଥ ସେଠ୍ । କାହାକୁ ବାଛିବେ ହାଇକମାଣ୍ଡ । ରାଜ୍ୟରୁ ଯାଇଛି ଦୁଇ ପ୍ରକାରର ମତ, ଯାହା ହାଇକମାଣ୍ଡଙ୍କୁ ଦ୍ୱିଧାରେ ପକାଇଛି । କୁହାଯାଉଛି, ଏଆଇସିସି କମିଟି ଆଉ ପ୍ରସାଦଙ୍କ ମତ ଭିତରେ ଫରକ୍ ହିଁ ସବୁ ବିବାଦର ମୂଳ ।
Kanak News is now on WhatsApp
Join and get latest news updates delivered to you via WhatsApp
ନାମାଙ୍କନ ପତ୍ର ଦାଖଲ କରିବାକୁ ୩ଦିନ ବାକି ଥିବା ବେଳେ ପ୍ରାର୍ଥୀ ଚୟନରେ ବିଳମ୍ବ ଏବେ କଂଗେସ କର୍ମୀ ଓ ନେତାଙ୍କ ଭିତରେ ଦ୍ୱନ୍ଦ୍ୱ ସୃଷ୍ଟି କରିଛି । ଟିକେଟ ପାଇଁ ଦୁଇ ଜଣଙ୍କର ଆଶା ରହିଛି । ଅନୁମାନ କରାଯାଉଛି, ଜଣେ ପ୍ରାର୍ଥୀ ହେଲେ ଆଉ ଜଣେ ବିଦ୍ରୋହୀ ହୋଇପାରନ୍ତି ।
ଏହାରି ଭିତରେ କିନ୍ତୁ ଗୁଗଲି ମାରିଛନ୍ତି ପୂର୍ବତନ ସଭାପତି ନିରଂଜନ ପଟ୍ଟନାୟକ । ପ୍ରାର୍ଥୀ ଚୟନ ଉପରେ ଅନ୍ୟ ଦଳର ପ୍ରଭାବ ଆଶଙ୍କାକୁ ସେ ଏଡାଇ ପାରୁନାହାନ୍ତି ।
କଂଗ୍ରେସ ଟକେଟ ପାଇଁ ରେସରେ ଥିବା ପୂର୍ବତନ ମନ୍ତ୍ରୀ ରିପୁନାଥ ସେଠ୍ ଓ ଗାଏସିଲଟ ବ୍ଲକ ଉପାଧ୍ୟକ୍ଷ ପ୍ରଣୟ ସାହୁ ରାଜଧାନୀରେ କ୍ୟାମ୍ପ ପକାଇଛନ୍ତି । ଅନ୍ୟପଟେ ହାଇକମାଣ୍ଡଙ୍କୁ ଯାଇଥିବା ରିପୋର୍ଟ ଉପରେ ବିଜେପୁରର କଂଗ୍ରେସ ନେତା ପ୍ରଶ୍ନ ଉଠାଇଛନ୍ତି । ଚିଠି ଲେଖି ପ୍ରତିବାଦ କରିଛନ୍ତି ।
କଂଗ୍ରେସର ପ୍ରାର୍ଥୀ ଚୟନ ଉପରେ କିନ୍ତୁ ବିଜେପି ଓ ବିଜେଡିର ତୀକ୍ଷ୍ଣ ନଜର ରହିଛି । ଯଦି ପ୍ରଣୟ ସାହୁ ପ୍ରାର୍ଥୀ ହୁଅନ୍ତି ତେବେ ବିଜେପି ଘାଟା ସହିବାକୁ ଥିବା ବେଳେ ରିପୁନାଥ ପ୍ରାର୍ଥୀ ହେଲେ ପ୍ରଣୟଙ୍କୁ ନିଜ ସପକ୍ଷକୁ ଆଣିବାକୁ ବିଜେଡି ଉଦ୍ୟମ କରିବ ।ରାଜ୍ୟ କଂଗ୍ରେସରେ ନେତୃତ୍ୱ କନ୍ଦଳ ପରେ ଏବେ ବିଜେପୁରକୁ ନେଇ କନ୍ଦଳ । ତେଣୁ ବିଜେପୁରରେ କିଏ କଂଗ୍ରେସ ମଙ୍ଗ ଧରୁଛି ଏବଂ ଗଡ ବଂଚାଇବାକୁ କଂଗ୍ରେସ ପରିବାର ଏକାଠି ହେଉଛନ୍ତି କି ନାହିଁ, ତା ଉପରେ ନଜର ।