କନକ ବ୍ୟୁରୋ : ରାଜ୍ୟ ରାଜନୀତିର ସବୁଠାରୁ ହାଇପ୍ରୋଫାଇଲ ଲଢେଇ ପାଇଁ ବାଟ ଫିଟିଛି । ବିଜେପୁର ନିର୍ବାଚନ ସଂକ୍ରାନ୍ତରେ ହାଇକୋର୍ଟରେ ଚାଲିଥିବା ମାମଲାକୁ ଆଉ ଆଗକୁ ବଢାଇବାକୁ ମନା କରିଛନ୍ତି ହାଇକୋର୍ଟ । ଅର୍ଥାତ୍ ପୂର୍ବତନ ମନ୍ତ୍ରୀ ତଥା ୨୦୧୪ରେ ବିଜେପୁର ଆସନରୁ ଲଢି ପରାସ୍ତ ହୋଇଥିବା ପ୍ରସନ୍ନ ଆଚାର୍ଯ୍ୟଙ୍କ ମାମଲା ଆଉ ଆଗକୁ ବଢିବନି । ସୁବଳ ସାହୁଙ୍କ ଦେହାନ୍ତ ହୋଇଥିବାରୁ ମାମଲା ଆଗକୁ ଚାଲିବାର ଆବଶ୍ୟକତା ନଥିବା କୋର୍ଟ ଅନୁଭବ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୧୪ରେ କଂଗ୍ରେସ ପ୍ରାର୍ଥୀ ସୁବଳ ସାହୁଙ୍କ ଠାରୁ ମାତ୍ର ୪୫୮ ଭୋଟରେ ପରାସ୍ତ ହୋଇଥିବା ପ୍ରସନ୍ନ ଆଚାର୍ଯ୍ୟ ନିର୍ବାଚନ ପରେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ନିର୍ବାଚନକୁ ଅସିଦ୍ଧ ଘୋଷଣା ସହ କାଜୁଆଲ ଭ୍ୟାକେନସୀ ଘୋଷଣା କରିବାକୁ ନିଜ ଆବେଦନରେ ପ୍ରସନ୍ନ ଆଚାର୍ଯ୍ୟ ଦର୍ଶାଇଥିଲେ । ତେବେ ଏହାରି ଭିତରେ ବିଧାୟକ ସୁବଳ ସାହୁଙ୍କ ଦେହାନ୍ତ ହୋଇସାରିଥିବାରୁ ମାମଲା ଆଉ ଆଗକୁ ବଢିବାର ଆବଶ୍ୟକତା ନଥିବା କୋର୍ଟ ଅନୁଭବ କରିଛନ୍ତି । ଫଳରେ ବିଜେପୁରରେ ଉପନିର୍ବାଚନ ହେବାର ବାଟ ଫିଟିଯାଇଛି ।
ବିଜେପୁରରେ ହେବାକୁ ଥିବା ଉପନିର୍ବାଚନ ତିନୋଟି ଯାକ ରାଜନୈତିକ ଦଳ ପାଇଁ ଗୁରୁତ୍ୱପୁର୍ଣ୍ଣ । ୨୦୧୯ରେ ସାଧାରଣ ନିର୍ବାଚନ ଆଗରୁ ଏହା ହେବ ସମସ୍ତ ରାଜନୈତିକ ଦଳଙ୍କ ପାଇଁ ଏସିଡ୍ ଟେଷ୍ଟ୍ । ନିଜ ସପକ୍ଷରେ ବାତାବରଣ ସୃଷ୍ଟି କରିବାକୁ ପ୍ରତିଟି ରାଜନୈତିକ ଦଳ ଉଦ୍ୟମ ଆରମ୍ଭ କରିଦେଇଛନ୍ତି । କାରଣ ନିର୍ବାଚନର ଏହି ସେମିଫାଇନାଲରେ ବାଜି ମାରିଲେ, ୨୦୧୯ ଫାଇନାଲ ଆଗରୁ ଦଳ ପାଇଦାରେ ରହିବେ ବୋଲି ନେତା ବି ବେଶ ଭଲଭାବେ ଜାଣିଛନ୍ତି । ଆଉ ଏହା ଆଧାରରେ ଗୋଟି ମଧ୍ୟ ଚଳାଇବାରେ ବ୍ୟସ୍ତ ।
ବିଜୁ ଜନତା ଦଳ ରେସରେ ଆଗୁଆ ଥିଲା । ଦିବଂଗତ ବିଧାୟକ ସୁବଳ ସାହୁଙ୍କ ପତ୍ନୀ ରୀତା ସାହୁଙ୍କୁ ଦଳରେ ମିଶାଇ ମାଷ୍ଟର ଷ୍ଟ୍ରୋକ୍ ମାରିଥିଲେ ନବୀନ । କୁହାଯାଉଥିଲା ବିଜେପି ମଧ୍ୟ ଚେଷ୍ଟା ଚଳାଇଥିଲା ରୀତାଙ୍କୁ ନିଜ ଦଳରେ ମିଶାଇବାକୁ । ହେଲେ ବାଜି ମାରିନେଇଥିଲା ବିଜେଡି । ଅନୁକମ୍ପା ଓ କଂଗ୍ରେସ ଭୋଟବ୍ୟାଙ୍କକୁ ଆଖି ଆଗରେ ରଖି ରୀତାଙ୍କୁ ଦଳରେ ମିଶାଇଥିଲେ ନବୀନ । ଖାଲି ଏତିକି ନୁହେଁ, ବିଜେପୁର ନିର୍ବାଚନ ମଣ୍ଡଳୀର ବ୍ଲକ ଓ ଏନଏସି ସ୍ତରର ନେତା ହାତ ଛାଡି ଶଙ୍ଖ ଧରିଥିଲେ । କୁହାଗଲା ଏହା ବିଜେଡିକୁ ଶକ୍ତିଶାଳୀ କରିବ । କାରଣ ବିଜେଡି ସଂଗଠନ ସହ ଯଦି ଅନୁକମ୍ପା ଓ କଂଗ୍ରେସର ଭୋଟ୍ ମିଶିଗଲା ତେବେ ବିଜେଡିର ଶକ୍ତିବୃଦ୍ଧି ଘଟିବ ।
ତେବେ ନବୀନଙ୍କ ଏହି ନିଷ୍ପତି ପଛରେ ସମସ୍ତେ ଖସୁି ନଥିଲେ । ବରଗଡରେ ଉଠିଥିଲା ପ୍ରତିବାଦର ସ୍ୱର । ଚର୍ଚ୍ଚା ହେଲା ପୂର୍ବତନ ଅର୍ଥମନ୍ତ୍ରୀ ତଥା ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ଖୁସିନଥିଲେ । ଏପରିକି ସେ କହିଥିଲେ, ଦଳରେ କିଏ ପ୍ରାର୍ଥୀ ହେବ ତାହା ନିଷ୍ପତ୍ତି ହୋଇନାହିଁ । ସେହିଭଳି ୨୦୦୯ରେ ବିଜେଡି ପ୍ରାର୍ଥୀ ଥିବା ପ୍ରଭାତ ଆଦିତ୍ୟ ମିଶ୍ର ଓ ତୃଣମୁଳସ୍ତରର କିଛି କର୍ମୀ ଏହି ମିଶ୍ରଣକୁ ଖୋଲାଖୋଲି ବିରୋଧ କରିଥିଲେ । ଯାହା ବିଜେଡି ସୁପ୍ରିମୋଙ୍କୁ ବେଶ ଅଡୁଆରେ ପକାଇଥିଲା । ହେଲେ ସବୁ ଅସନ୍ତୋଷକୁ ଚୁପ୍ କରିବାରେ ମାହିର ଥିବା ନବୀନ ଘୋଷଣା କରିଦେଲେ ରୀତା ସାହୁ ହେବେ ବିଜୁ ଜନତା ଦଳର ବିଜେପୁର ପ୍ରାର୍ଥୀ ।
ଆଉ ଏହାରି ଭିତରେ ନବୀନ ବିଜେପୁରକୁ ଆଖି ଆଗରେ ରଖି ଘୋଷଣା କରିଛନ୍ତି ସବୁଠାରୁ ବଡ ପଦକ୍ଷେପ । ବିଜେପୁର ଲିଫଟ କେନାଲ ସିଷ୍ଟମକୁ କାର୍ଯ୍ୟକାରୀ କରିବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ଏହି ଭୂତଳ ଜଳସେଚନ ବ୍ୟବସ୍ଥା ପାଇଁ ୧୨ ଶହ ୫୦ କୋଟି ଟଙ୍କା ଖର୍ଚ ହେବ । ୩୨ ହଜାର ହେକ୍ଟର ଜମିକୁ ଜଳସେଚନ ହୋଇପାରିବ । ଏହାଦ୍ୱାରା ଖରିଫ ଋତୁରେ ୨୫ ହଜାର ୬ ଶହ ହେକ୍ଟର ଓ ରବିରେ ୭ ହଜାର ହେକ୍ଟର ଜମି ଜଳସେଚିତ ହୋଇପାରିବ । ପ୍ରକଳ୍ପ ଯୋଗୁଁ ୧୮ କିଲୋମିଟର ଦୂରରୁ ବରଗଡ ମୁଖ୍ୟ କେନାଲରୁ ମାଟିତଳେ ପାଇପ ଯୋଗେ ପାଣି ଆସିବ । ପ୍ରତି ୪ ହେକ୍ଟର ଜମି ପାଇଁ ଗୋଟିଏ ଗୋଟିଏ ପଏଂଟ ଯୋଗାଇଦିଆଯିବ । ଏହି ପ୍ରକଳ୍ପର ନାମ ରହିବ ଗଙ୍ଗାଧର ମେହେର ଲିଫଟ କେନାଲ ବ୍ୟବସ୍ଥା । ପ୍ରକଳ୍ପ ପାଇଁ ଅତ୍ୟାଧୁନିକ କୌଶଳ ବ୍ୟବହାର କରାଯିବ । ସାରା ଦେଶରେ ଏହି ପ୍ରକଳ୍ପ ଏକ ମଡେଲ ପ୍ରକଳ୍ପ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଅନୁମାନ କରାଯାଉଛି, ବିଜେପୁର ପାଇଁ ନବୀନ ଗୋଟିଏ ଗୁଳିରେ ଦୁଇଟି ଶିକାର କରିଛନ୍ତି । ବିଜେପୁର ନିର୍ବାଚନ ମଣ୍ଡଳୀର ଭୋଟର ମୁଖ୍ୟତଃ ଚାଷୀ ଆଉ ବୁଣାକାର । ଚାଷ ଜମିକୁ ଜଳସେଚିତ କରାଇବା ସହ ପ୍ରକଳ୍ପକୁ ଗଙ୍ଗାଧର ମେହେରଙ୍କ ନାମରେ ମାନିତ କରାଇ ନବୀନ ଦୁଇଟି ଯାକ ଗୋଷ୍ଠୀଙ୍କୁ ନିଜ ସପକ୍ଷରେ ନେବାକୁ ଉଦ୍ୟମ କରିଛନ୍ତି । ଅନୁମାନ କରାଯାଉଛି, ବିଜେପୁର ନିର୍ବାଚନ ମଣ୍ଡଳୀରେ ଏହା ଦଳକୁ କିଛି ମାତ୍ରାରେ ଫାଇଦା ଦେଇପାରେ ।
ସେପଟେ ଭାରତୀୟ ଜନତା ପାର୍ଟି ଏହାରି ଭିତରେ ପଛରେ ପଡିନାହିଁ । ଦଳ ପୂର୍ବତନ ବିଜେଡି ବିଧାୟକ ଅଶୋକ ପାଣିଗ୍ରାହୀଙ୍କୁ ଦଳରେ ମିଶାଇଛି । ଅନୁମାନ କରାଯାଉଛି, ଦଳ ଅଶୋକଙ୍କୁ ହିଁ ପ୍ରାର୍ଥୀ କରିବ । ଦଳର ସଂସଦୀୟ ବୋର୍ଡ ଚୁଡାନ୍ତ ନିଷ୍ପତି ନେବାକୁ ଥିବାରୁ ନେତା ଯଥାସମ୍ଭବ ନୀରବତା ଅବଲମ୍ବନ କରୁଛନ୍ତି । କିନ୍ତୁ ଅଶୋକ ହିଁ ପ୍ରାର୍ଥୀ ହେବେ, ବୋଧହୁଏ ଏନେଇ କାହା ମନରେ ସନ୍ଦେହ ନଥିବ ।
ତେବେ ବିଜେପି ଦଳ ଭିତରେ ମଧ୍ୟ ବିବାଦ ଜୋଦ ଧରିଥିଲା । ଦଳର ଜିଲ୍ଲା ସଭାପତି ନାରାୟଣ ସାହୁ ଦଳ ବିରୋଧରେ ସ୍ୱର ଉଠାଇଥିଲେ । ଅଶୋକଙ୍କୁ ଖୋଲାଖୋଲି ବିରୋଧ କରିଥିଲେ । କହିଥିଲେ, ଦଳ ଭିତରେ ଅନେକ ଯୋଗ୍ୟ ନେତା ଅଛନ୍ତି । ଅନ୍ୟ କାହାକୁ ବାହାରୁ ଅଣାଯାଇ ପ୍ରାର୍ଥୀ କରିବା ଅନୁଚିତ । ଇଶାରା ସିଧାସଳଖ ଥିଲା ଅଶୋକଙ୍କ ଆଡକୁ । ତେବେ ବିଜୁ ଜନତା ଦଳ ଭଳି ଭାରତୀୟ ଜନତା ପାର୍ଟି ମଧ୍ୟ ଏହି ବିଦ୍ରୋହକୁ ପ୍ରଶମିତ କରାଇ ପାରିଥିଲା । ଭୁବନେଶ୍ୱରରେ ହୋଇଥିଲା ନାରାୟଣ ସାହୁଙ୍କ ମାନଭଂଜନ । କେନ୍ଦ୍ରମନ୍ତ୍ରୀ ଓ ବିଜେପି ବିଧାୟକ ଦଳର ନେତାଙ୍କ ଉପସ୍ଥିତିରେ ବୁଝାଯାଇଥିଲା ଜିଲ୍ଲା ସଭାପତିଙ୍କୁ । ଏହାପରେ ନାରାୟଣ ସାହୁ କହିଥିଲେ, ସେ ଦଳରେ ଥିଲେ ଅଛନ୍ତି ଓ ରହିବେ । ବ୍ୟକ୍ତି ନୁହେଁ ତାଙ୍କ ପାଇଁ ଦଳ ବଡ ଥିବା ସେ ସଫେଇ ଦେଇଥିଲେ ।
ହେଲେ ଏହା ବୁଝିବାକୁ ପଡିବ ଯେ, ଯେତେବେଳେ ମନ ଥରେ ଭାଙ୍ଗିଯାଏ, ତାହା ଯୋଡିହେବା କଷ୍ଟ । ସମ୍ଭବତଃ ଉଭୟ ବିଜେପି ଓ ବିଜେଡି କ୍ଷେତ୍ରରେ ଏହା ଦେଖିବାକୁ ମିଳିପାରେ । ନିର୍ବାଚନ ବେଳେ ହୁଏତ ଯୋଡି ହୋଇଯାଇଥିବା ମନ କେତେଦୁର ଏକାଠି ରହିପାରୁଛି ତାହା ପ୍ରମାଣିତ ହେବ । କିନ୍ତୁ ଏହା ମଧ୍ୟ ଅନୁମାନ କରାଯାଇପାରେ, ଦଳ ଭିତରେ ଥିବା ଅସନ୍ତୋଷ ଉଭୟ ଦଳ ପାଇଁ ଅଡୁଆ ଜନକ ସ୍ଥିତି ସୃଷ୍ଟି କରିପାରେ ।
ଏହାରି ଭିତରେ ସ୍ୱାଭାବିକ ଭାବେ ପ୍ରଶ୍ନ ଉଠୁଛି, କଂଗ୍ରେସ ଦଳର ସ୍ଥିତି କଣ । ଉଭୟ ବିଜେପି ଓ ବିଜେଡି ନିଜ ନିଜର ପ୍ରାର୍ଥୀଙ୍କ ସହ ରଣନୀତି କରି ଆଗକୁ ବଢୁଥିବା ବେଳେ କଂଗ୍ରେସ ପ୍ରାର୍ଥୀ ଚୟନ ପାଇଁ କେବଳ କମିଟି ଗଠନ କରି ରହିଛି । ଝାରସୁଗୁଡା ବିଧାୟକ ନବ ଦାସଙ୍କ ନେତୃତ୍ୱରେ ଏକ କମିଟି ହୋଇଛି, ଯିଏ ବିଜେପୁର ପାଇଁ କଂଗ୍ରେସ ଦଳର ପ୍ରାର୍ଥୀ କିଏ ହେବ ସେବାବଦରେ ନିଷ୍ପତି ନେବ ।
ତେବେ ବଡ କଥା ହେଉଛି, ରାଜ୍ୟ ରାଜନୀତିରେ କଂଗ୍ରେସର ସ୍ଥିତିକୁ ଦେଖିଲେ ଲାଗୁଛି, ପଂଚାୟତ ନିର୍ବାଚନ ପରେ ଦଳ ତାର ଆତ୍ମବିଶ୍ୱାସ ହରାଇଛି । ଏପରିକି ତିନି ତିନି ଥର ଏହି ଆସନରେ ବାଜିମାତ କରିଥିବା ସୁବଳ ସାହୁଙ୍କ ପରିବାରକୁ ଦଳ ନିଜ ପାଖରେ ରଖିପାରିଲାନି । ଯାହା କଂଗ୍ରେସ ଦଳର ସ୍ଥିତିକୁ ବୟାନ କରୁଛି । ହେଲେ ଏହାରି ଭିତରେ କିନ୍ତୁ ପିସିସି ସଭାପତି ପ୍ରସାଦ ହରିଚନ୍ଦନ କହିଛନ୍ତି, ବିଜେପୁର ଉପ ନିର୍ବାଚନରେ ସେମାନେ ବାଜିମାତ୍ କରିବେ ।