ଯେଉଁ ରାସ୍ତା ଛାଡିଥିଲେ, ସେହି ରାସ୍ତା ଧରିଲେ ବିଜୟ ମହାପାତ୍ର । ଉଠାଇଥିବା ପ୍ରସଙ୍ଗ ସମାଧାନ ହୋଇନି, କିନ୍ତୁ ବଦଳିଗଲା ନେତାଙ୍କ ଆଭିମୁଖ୍ୟ ।
ପ୍ରଶ୍ନ ଉଠିବା ସ୍ୱାଭାବିକ, କିଭଳି ଏହି ୪ ମାସ ମଧ୍ୟରେ ବଦଳିଗଲା ବିଜୟ ମହାପାତ୍ରଙ୍କ ଆଭିମୁଖ୍ୟ । ବିଜୟ ମହାପାତ୍ର ଦଳ ଛାଡିବା ବେଳେ ଅନୁମାନ କରାଯାଉଥିଲା, ହୁଏତ ସେ ବିଜେଡିକୁ ଯାଇପାରନ୍ତି । ଏପରିକି ଦିଲ୍ଲୀପ ରାୟ, ନବୀନ ପଟ୍ଟନାୟକଙ୍କୁ ଭେଟିବା ପରେ ଏହି ଚର୍ଚ୍ଚା ବେଶ ଆଗକୁ ବଢିଯାଇଥିଲା । ହେଲେ ସେହି ସ୍ଥିତି ସୃଷ୍ଟି ହେଲାନି, ଯେତେବେଳେ ୧୯ ବର୍ଷ ପରେ ବିଜୟ-ନବୀନ ଏକାଠି ହେବାର ଅବସର ସୃଷ୍ଟି ହୋଇଥାନ୍ତା ।
ନଭେମ୍ବର ୩୦ରେ ଯେତେବେଳେ ବିଜୟ ମହାପାତ୍ର ବିଜେପିରୁ ଇସ୍ତଫା ଦେବା ନେଇ ଘୋଷଣା କରିଥିଲେ ଏହା ଆଦୈା ଅପ୍ରତ୍ୟାଶି ନଥିଲା । ବରଂ ଏଭଳି କିଛି ଘଟିବ ବୋଲି ରାଜନୀତିରେ ଉଣା ଅଧିକେ ସମସ୍ତେ ପୂର୍ବାନୁମାନ କରି ସାରିଥିଲେ । ସେହିଭଳି ବିଜେପିକୁ ପୁଣି ବିଜୟ ଫେରିବା ମଧ୍ୟ ସଂପୂର୍ଣ୍ଣ ଆକସ୍ମିକ ନଥିଲା । ଏନେଇ ପୂର୍ବରୁ ମଧ୍ୟ ଚର୍ଚ୍ଚା ସରିଥିଲା । ହେଲେ ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି, ତାହା ହେଲା ବିଜୟ ମହାପାତ୍ର ଇସ୍ତଫା ଦେବା ବେଳେ ଯେଉଁ ସବୁ ପ୍ରସଙ୍ଗ ଆଉ ମୁଦ୍ଦା ଉଠାଇଥିଲେ, ତାର ସ୍ଥିତି ଆଜି କେଉଁଠି ଅଛି । ଏହି ଦିଗକୁ ବିଜୟ ମହାପାତ୍ର ସଂପୂର୍ଣ୍ଣ ଆଖି ବୁଜି ଦେଇନାହାନ୍ତି ତ?
Kanak News is now on WhatsApp
Join and get latest news updates delivered to you via WhatsApp
ଇସ୍ତଫା ପତ୍ର ଜରିଆରେ ବିଜୟ ମହାପାତ୍ର ଦର୍ଶାଇବାକୁ ଚେଷ୍ଟା କରିଥିଲେ, ରାଜ୍ୟ ସ୍ୱାର୍ଥରେ ବିଜେପି ନାହିଁ । ମହାନଦୀ ସମସ୍ୟା, ବ୍ରାହ୍ମଣୀ ସେତୁ ଓ ଆଇଜିଏଚ ପ୍ରସଙ୍ଗ ବାବଦରେ କୁହାଯାଇଥିବା ଗୋଟିଏ ବି କଥା ରଖାଗଲା ନାହିଁ । ଓଡିଶାର ଲୋକ ନିରାଶ ହେବା ସହ ଦିଆଯାଉଥିବା ଭଲ ପରାମର୍ଶ କେତେକ ଅହଂ ଓ ସ୍ୱାର୍ଥକୈନ୍ଦ୍ରିକ ବ୍ୟକ୍ତି କଦର୍ଯ୍ୟ କୈାଶଳ କରି ଏସବୁକୁ ଏକ ବିପଦ ବୋଲି ଅର୍ଥ ବାହାର କଲେ ।
ସେହିଭଳି ନିଜ ଇସ୍ତଫା ପତ୍ରରେ ବିଜୟ ମହାପାତ୍ର ଲେଖିଥିଲେ, ନିର୍ବାଚନ ମଣ୍ଡଳୀରେ ଉପହାସ କରାଇବାକୁ ପ୍ରଚାର ଆରମ୍ଭ କରାଗଲା । ରାଜ୍ୟରେ ଏକାଧିକ ଦଶନ୍ଧି ଧରି ଲୋକଙ୍କୁ ସେବା ଯୋଗାଇ ଆସୁଥିବା ଏବଂ ଆତ୍ମସମ୍ମାନ ଥିବା ରାଜନେତା ଭାବରେ ଦଳପାଇଁ ପ୍ରଦର୍ଶନର ବସ୍ତୁ ହୋଇ ରହିବାକୁ ଚାହୁଁନାହୁଁ । କ୍ଷମତା ବା ଟିକେଟ ପାଇଁ କଦାପି ଆତ୍ମସମ୍ମାନ କିମ୍ବା ରାଜ୍ୟର ସ୍ୱାର୍ଥ ସହ ସାଲିସ କରିବୁ ନାହିଁ । ଦଳ ଯେଉଁଭଳି ଭାବରେ ପରିଚାଳିତ ହେଉଛି ସେଥିରୁ ଦଳ ପ୍ରତି ଲୋକଙ୍କ ମୋହଭଙ୍ଗ ହେବା ପ୍ରତିଫଳିତ ହେଉଛି । ଦୀର୍ଘ ୪ ବର୍ଷ ବୃଥାରେ ଅପେକ୍ଷା କଲୁ, ଆଉ ଅଧିକ ସମୟ ଅପେକ୍ଷା କରି ପାରିବୁ ନାହିଁ । ତେଣୁ ଦଳ ଛାଡୁଛୁ ।
ନଭେମ୍ବର ୩୦ରେ ଏହି କିଛି ଉକ୍ତି ବେଶ ଚର୍ଚ୍ଚିତ ହୋଇଥିଲା । ଆଉ ସେବେଠାରୁ ଆକଳନ ଆରମ୍ଭ ହୋଇଥିଲା ଏହି ବରିଷ୍ଠ ରାଜନେତାଙ୍କ ଆଗାମୀ ରାଜନୈତିକ ଆଭିମୁଖ୍ୟ କଣ ରହିବ । ହେଲେ ଠିକ ୪ ମାସ ପରେ ଯେଉଁ ବିଜେପି ନେତୃତ୍ୱ ଆଉ ବିଜେପିର ଆଭିମୁଖ୍ୟ ଓ ଜଣେ ନିର୍ଦ୍ଦିଷ୍ଟ ନେତାଙ୍କୁ ଇଙ୍ଗିତ କରି ବିଜୟ ଦଳ ଛାଡିଥିଲେ, ପୁଣି ସେହି ଦଳକୁ ଫେରି ଆସିଛନ୍ତି ।
ହେଲେ ଗୁରତ୍ୱପୂର୍ଣ୍ଣ କଥା ହେଉଛି, ଏହି ୪ ମାସ ଭିତରେ ବିଜୟ ମହାପାତ୍ର ଉଠାଇଥିବା ସମସ୍ତ ପ୍ରସଙ୍ଗ ଠିକ ସେହିଭଳି ଅଛି, ଯାହା ନଭେମ୍ବର ୩୦ରେ ଥିଲା । ଆଜି ବି ମହାନଦୀରେ ଉପରମୁଣ୍ଡରୁ ପାଣି ଆସିବା ଏକ ବଡ ସମସ୍ୟା । ଆଇଜିଏଚ ସୁପର ସ୍ପେଶାଲିଟି ହସ୍ପିଟାଲରେ ପରିଣତ ହୋଇନାହିଁ । ବ୍ରାହ୍ମଣୀ ଉପରେ ଦ୍ୱିତୀୟ ସେତୁ ନିର୍ମିତ ହୋଇନାହିଁ କିମ୍ବା ଆଇଓସିଏଲରେ ଓଡିଆଙ୍କ ନିଯୁକ୍ତି ନେଇ ଆଜି ମଧ୍ୟ ବିବାଦ ରହିଛି । ସମସ୍ୟା ଠିକ ସେହିଭଳି ରହିଛି ହେଲେ ବିଜୟ ମହାପାତ୍ର ଆଜି ପଛ କଥା ଭୂଲି ଆଗକୁ ବଢିଛନ୍ତି । ଗଣମାଧ୍ୟମକୁ ନିଜ ପ୍ରତିକ୍ରିୟାରେ କହିଛନ୍ତି, ଆଗକୁ ବଢିବାକୁ ହେଲେ ଅତୀତ କଥା ଭୂଲିବାକୁ ପଡେ ।
ଠିକ ନିର୍ବାଚନ ପୂର୍ବରୁ ବିଜୟ ମହାପାତ୍ର ଅତୀତରେ ଅନେକ ନିଷ୍ପତ୍ତି ଗ୍ରହଣ କରିଛନ୍ତି । ଠିକ ଯେମିତି, ୨୦୦୯ ନିର୍ବାଚନର ଠିକ ପୂର୍ବରୁ ବିଜେପିରେ ସାମିଲ ହୋଇଥିଲେ । ୯ ବର୍ଷ ପରେ ଦଳରୁ ଇସ୍ତଫା ଦେଇଥିଲେ ଆଉ ୨୦୧୯ ନିର୍ବାଚନର ଠିକ ପୂର୍ବରୁ ବିଜେପିକୁ ପୁଣି ଫେରିଛନ୍ତି ରାଜ୍ୟ ରାଜନୀତିର ଏହି ଚର୍ଚ୍ଚିତ ଚେହେରା । ରାଜନୀତିରେ ଅନେକ ବାଧ୍ୟ ବାଧ୍ୟକତା ଥାଏ, ହୁଏତ ଏହି ଦିଗ ହିଁ ବିଜୟଙ୍କୁ ନିଷ୍ପତିର ପୂନର୍ବିଚାର କରିବାକୁ ବାଧ୍ୟ କରି ଥାଇପାରେ ।
ଗତ ୪ ମାସ ମଧ୍ୟରେ ରାଜ୍ୟ ରାଜନୀତିରେ ଅନେକ କିଛି ବଦଳିଛି । ଯେଉଁ ନେତା ଅର୍ଥାତ୍ ବୈଜୟନ୍ତ ପଣ୍ଡା ଓ ଅରୁଣ ସିଂଙ୍କ ସହ ଆଜି ବ୍ରେକଫାଷ୍ଟ କରି ବିଜେପିକୁ ଫେରିବା ନେଇ ଘୋଷଣା କଲେ ସେମାନେ ବିଜୟଙ୍କୁ ବୁଝାଇବାରେ ସମର୍ଥ ହେଲେ । କିନ୍ତୁ ଧର୍ମେନ୍ଦ୍ର ପ୍ରଧାନଙ୍କ ଆଭିମୁଖ୍ୟ ଆଜିର ମିଶ୍ରଣ ପର୍ବ ଉପରେ କିଛି ଅଲଗା ଥିଲା । ନା ବିଜୟ ଫେରିବା ପାଇଁ ହୋଇଥିବା ତମାମ କଥାବାର୍ତ୍ତାରେ ଧର୍ମେନ୍ଦ୍ରଙ୍କର କୈାଣସି ଭୂମିକା ନଥିଲା । ଖାସ୍ ସେଥିପାଇଁ ମିଶ୍ରଣ ପର୍ବ ଅବସରରେ ଧର୍ମେନ୍ଦ୍ର-ବିଜୟ ପାଖାପାଖି ବସିନଥିଲେ । ଉଭୟଙ୍କ ମଧ୍ୟରେ ବସିଥିଲେ ବରିଷ୍ଠ ନେତା ବିଶ୍ୱଭୂଷଣ ହରିଚନ୍ଦନ । ଯାହା କିଛି ସମୟ ପାଇଁ ଚର୍ଚ୍ଚାର ଖୋରାକ ମଧ୍ୟ ଯୋଗାଇଥିଲା ।
ପ୍ରଶ୍ନ ଉଠିବା ସ୍ୱାଭାବିକ, କିଭଳି ଏହି ୪ ମାସ ମଧ୍ୟରେ ବଦଳିଗଲା ବିଜୟ ମହାପାତ୍ରଙ୍କ ଆଭିମୁଖ୍ୟ । ବିଜୟ ମହାପାତ୍ର ଦଳ ଛାଡିବା ବେଳେ ଅନୁମାନ କରାଯାଉଥିଲା, ହୁଏତ ସେ ବିଜେଡିକୁ ଯାଇପାରନ୍ତି । ଏପରିକି ଦିଲ୍ଲୀପ ରାୟ, ନବୀନ ପଟ୍ଟନାୟକଙ୍କୁ ଭେଟିବା ପରେ ଏହି ଚର୍ଚ୍ଚା ବେଶ ଆଗକୁ ବଢିଯାଇଥିଲା । ହେଲେ ସେହି ସ୍ଥିତି ସୃଷ୍ଟି ହେଲାନି, ଯେତେବେଳେ ୧୯ ବର୍ଷ ପରେ ବିଜୟ-ନବୀନ ଏକାଠି ହେବାର ଅବସର ସୃଷ୍ଟି ହୋଇଥାନ୍ତା ।
ଶେଷରେ ତମାମ କଳ୍ପନାଜଳ୍ପନାର ଅନ୍ତ ଘଟାଇ ବିଜେପି କ୍ୟାମ୍ପରେ ସାମିଲ ହୋଇଛନ୍ତି ବିଜୟ ମହାପାତ୍ର । ଯାହା ଅନେକ ରାଜନୈତିକ ପ୍ରଶ୍ନ ସୃଷ୍ଟି କରିଛି । ଏହା ବିଜୟ ମହାପାତ୍ରଙ୍କ ପାଇଁ ବାଧ୍ୟ ବାଧ୍ୟକତା ନଥିଲା ତ? ଅର୍ଥାତ୍ ବିଜେଡି ଶିବିରରେ ଯେତେବେଳେ ପ୍ରବେଶ କରିବାକୁ ବିଜୟଙ୍କ ସବୁ ରାସ୍ତା ବନ୍ଦ ହୋଇଗଲା, ଠିକ ସେତିକିବେଳେ ବିଜେପି କ୍ୟାମ୍ପକୁ ବାଛିନେଇ ଆଗକୁ ବଢିଗଲେ ଏହି ଭେଟେରାନ ରାଜନେତା ।