ବିହାର ଚମ୍ପାରଣରେ ଅଭାବନୀୟ ଘଟଣା । ଗୋଟିଏ ଗାଁର ୮ ଜଣଙ୍କ ମୃତ୍ୟୁ, ବିଷାକ୍ତ ମଦପିଇ ମୃତ୍ୟୁ ହୋଇଥିବା ସନ୍ଦେହ
କନକ ବ୍ୟୁରୋ : ବିହାର ସରକାରଙ୍କ ତରଫରୁ ରାଜ୍ୟରେ ମଦ ବିକ୍ରି ଉପରେ ସମ୍ପୂର୍ଣ୍ଣ ପ୍ରତିବନ୍ଧକ ଲଗାଯାଇଛି । ମାତ୍ର ବେଆଇନ ଭାବେ ରାଜ୍ୟରେ ମଦ ବିକ୍ରି ଚାଲିଛି ଓ ଅନେକ ସମୟରେ ବିଷାକ୍ତ ମଦପିଇ ଅନେକ ଲୋକ ମୃତ୍ୟୁବରଣ କରୁଛନ୍ତି । ଏବେ ରାଜ୍ୟର ପଶ୍ଚିମ ଚମ୍ପାରଣରେ ୮ ଜଣ ଲୋକଙ୍କ ସନ୍ଦେହଜନକ ମୃତ୍ୟୁ ହୋଇଛି । ଏହି ମୃତ୍ୟୁର କାରଣ ବିଷାକ୍ତ ମଦ ବୋଲି ପରିବାର ଲୋକେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଷାକ୍ତ ମଦ କାରଣରୁ ସେମାନଙ୍କ ମୃତ୍ୟୁ ହୋଇଥିବା ପରିବାର ଲୋକମାନେ କହୁଥିବା ବେଳେ ପ୍ରଶାସନ ଏନେଇ କିଛି ସ୍ପଷ୍ଟ କରିନାହିଁ । ମାତ୍ର ଜଣେ ମୃତକର ପରିବାର ଲୋକେ କହିଛନ୍ତି କି ବିଷାକ୍ତ ମଦପିଇବା କାରଣରୁ ମୃତ୍ୟୁ ହୋଇଛି । ସମସ୍ତ ମୃତକ ନୈତନ ଥାନା ଅନ୍ତର୍ଗତ ଦକ୍ଷୀଣ ତେଲହୁଆ ଗ୍ରାମର ବୋଲି ସୂଚନା ମିଳିଛି ।
ଅନ୍ୟଜଣେ ମୃତକଙ୍କ ପରିବାର ଲୋକ କହିବା କଥା କି ବୁଧବାର ସଂନ୍ଧ୍ୟାରେ ମଦ ପିଇବା ପରେ ଅଚାନକ ତାଙ୍କର ଦେହ ଅସୁସ୍ଥ ହୋଇପଡିଥିଲା । ଏହାପରେ ତାଙ୍କୁ ମେଡିକାଲ ନିଆଯାଉଥିବା ବେଳେ ରାସ୍ତାରେ ତାଙ୍କର ମୃତ୍ୟୁ ହୋଇଥିଲା । ହେଲେ ମୃତକଙ୍କ ପରିବାର ଲୋକ ଏଭଳି ଅଭିଯୋଗ ଆଣୁଥିଲେ ବି ପ୍ରଶାସନ ଏହାଠାରୁ ଦୂରେଇ ରହିଛି । ଏହି ପୁରା ଘଟଣା ଉପରେ ଏପର୍ଯ୍ୟନ୍ତ ଜିଲ୍ଲା ପ୍ରଶାସନର କୌଣସି ଅଧିକାରୀ କିଛି ମତ ଦେଇ ନାହାଁନ୍ତି ।
କହିରଖୁ କି ଦୁଇଦିନ ପୂର୍ବରୁ ଗୋପାଳଗଞ୍ଜରେ ବି ବିଷାକ୍ତ ମଦପିଇ ୮ ଜଣଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଥିଲା । ଅନ୍ୟପଟେ ଚଳିତ ବର୍ଷ ପଶ୍ଚିମ ଚମ୍ପାରଣ ଜିଲ୍ଲାରେ ବି ବିଷାକ୍ତ ମଦପିଇ ୧୬ ଜଣଙ୍କର ମୃତ୍ୟୁ ହୋଇଥିଲା । ଯାହାକୁ ନେଇ ରାଜ୍ୟ ସରକାରଙ୍କ ଉପରେ ବିରୋଧୀମାନେ ପ୍ରବଳ ବର୍ଷିଥିଲେ ।