କନକ ବ୍ୟୁରୋ: ବିହାରର କୁନି ପୁଅ ଏବେ ଭାଇରାଲ ହେବାରେ ଲାଗିଛି । ସ୍କୁଲ ଶିକ୍ଷକଙ୍କ ଆଗରେ କାନ୍ଦି କାନ୍ଦି ଜଣାଉଛି ନିଜ ଅସହାୟତାର କଥା । ହେଲେ ଏମିତି କ’ଣ ହେଲା ଆଉ ପିଲାଟି କ’ଣ କହିଲା ଯେ, ତାକୁ ନେଇ ଚାରଆଡେ ଚର୍ଚ୍ଚା?
Kanak News is now on WhatsApp
Join and get latest news updates delivered to you via WhatsApp
ଘଟଣା ଘଟିଛି ବିହାର ରୋହତାସ୍ ଜିଲ୍ଲା ତିଲୌଥୁ ଇଲାକାରେ ଥିବା ଏକ ସରକାରୀ ସ୍କୁଲରେ । ପିଲାଙ୍କ ପାଖରେ ପଢିବାକୁ ବହି ନାହିଁ । ଏମାନଙ୍କ ମଧ୍ୟରେ ଯେଉଁ କୁନି ଛାତ୍ରକୁ ଆପଣ ଦେଖୁଛନ୍ତି ସେ ତା ପାଖରେ ମଧ୍ୟ ବହି ନାହିଁ । ବହି କିଣିବାକୁ କହି କହି ୫ ଦିନ ହେବ ଥକି ଗଲେଣି ଶିକ୍ଷକ । ଏଥିରେ ବିରକ୍ତ ହୋଇ ବହି ନଥିବା ପିଲାଙ୍କୁ ଲାଇନରେ ଛିଡା କରି କାରଣ ପଚାରିଥିଲେ ଶିକ୍ଷକ । ଆଉ ଏଇ ପିଲାଟିର ପାଳି ପଡିବାରୁ ସେ ଭୋ ଭୋ ହୋଇ କାନ୍ଦି ପକାଇଥିଲା । କହିଥିଲା :ବାପା ବହି କିଣି ଦେଉନାହାଁନ୍ତି । ବହୁତ ଥର କହିଲିଣି ହେଲେ ଜମା କିଣି ଦେଉନାହାଁନ୍ତି । ସବୁଦିନେ ମଦ ପିଇକି ଘରକୁ ଆସୁଛନ୍ତି । ବହି କିଣିବାକୁ କହିବାରୁ ରାଗୁଛନ୍ତି ।
ବାରମ୍ବାର ସେହି କଥାକୁ ଦୋହରାଉଛି କୁନି ଛାତ୍ର ଜଣକ । ‘ ବାପା ସବୁଦିନେ ମଦ ପିଉଛନ୍ତି, ବହି କିଣିଦେଉନାହାଁନ୍ତି ।’ହେଲେ ପଛପଟେ ଛିଡା ହୋଇ ମୁହଁ ଟାଣ କରି ଓଲଟି ପୁଅ ଉପରେ ଦୋଷ ଲଦୁଛନ୍ତି ବାପା । ଶିକ୍ଷକ କହୁଛନ୍ତି ପୁଅ ପାଇଁ ବହି କିଣିଦେବାକୁ । ହେଲେ ଶୁଣିି ନଶୁଣିଲା ପରି ହେଉଛନ୍ତି ଛାତ୍ରଙ୍କ ବାପା । ଓଲଟି ପୁଅ ମିଛ କହୁଛି ବୋଲି କହୁଛନ୍ତି ।
ହେଲେ ସତକୁ ବା କେମିତି ଲୁଛେଇବେ ମଦୁଆ ବାପା । ବାପା କଥାରେ ପୁଣିଥରେ ଛାତ୍ରକୁ ତାଗିଦା କରିବାରୁ ପିଲାଟି ଡରିଯାଇଥିଲା । ହେଲେ ଧାଡିରେ ଛିଡା ହୋଇଥିବା ଛାତ୍ରର ଭଉଣୀ ଭାଇକୁ ସମର୍ଥନ କରି କହୁଛି ‘ ନାଁ ସାର୍ ଭାଇ ବାପାଙ୍କୁ ବହି ଆଣିବାକୁ କହିଥିଲା । ହେଲେ ବାପା ଆଣୁନାହାଁନ୍ତି । ବାପା ସବୁବେଳେ ଘରକୁ ମଦ ପିଇ ଆସୁଛନ୍ତି’ । ଏହାପରେ ମଦୁଆ ବାପାଙ୍କୁ ତାଗିଦ କରୁଛନ୍ତି ଶିକ୍ଷକ । ବହି କିଣି ତୁରନ୍ତ ପିଲାଙ୍କୁ ଦେବାକୁ କହିବା ସହ ବହି ନକିଣିଲେ ଥାନାରେ ଅଭିଯୋଗ କରିବାକୁ ଚେତାବନୀ ମଧ୍ୟ ଦେଇଛନ୍ତି ।
ଭିଡିଓଟି କେବଳ ଏହି କୁନି ଛାତ୍ରର ଦୁଃଖଭରା ସମସ୍ୟାକୁ ବଖାଣୁନି ବରଂ ତା ପରି ହଜାର ହଜାର ଶିଶୁଙ୍କ ଯନ୍ତ୍ରଣାକୁ ପ୍ରକାଶ କରୁଛି । ଯେଉଁମାନଙ୍କ ଭବିଷ୍ୟତ ଏପରି ମଦୁଆ ବାପାଙ୍କ ଯୋଗୁଁ ଛାରଖାର ହୋଇଯାଉଛି ।ପୁଣି ଭିଡିଓଟି ଏପରି ସମୟରେ ଭାଇରାଲ ହୋଇଛି ଯେତେବେଳେ, ବିହାର ସରକାର ଚଳାଇଛନ୍ତି ‘ସରାବବନ୍ଦୀ ଅଭିଯାନ’ । କିଛି ଦିନ ହେବ ବିହାରରେ ଏହି ଅଭିଯାନ ଜୋର ସୋରରେ ଚାଲିଥିବାବେଳେ ଶୁକ୍ରବାର ମଦ୍ୟପାନ ନକରିବାକୁ ମୁଖ୍ୟମନ୍ତ୍ରୀ ଅଢେଇ ଲକ୍ଷରୁ ଅଧିକ ସରକାରୀ କର୍ମଚାରୀଙ୍କୁ ଶପଥ ଗ୍ରହଣ କରାଇବା ସହ ନିଜେ ମଧ୍ୟ ଶପଥ ନେଇଛନ୍ତି । ହେଲେ ବାସ୍ତବରେ ଏହି ଅଭିଯାନ କେତେ ସତ ତାହାର ଗୁମର ଖୋଲିଛି ଏହି କୁନି ଛାତ୍ର ।