କିଏ ପିନ୍ଧିବ ବିହାର ବ୍ୟାଟେଲର ବିଜୟୀ ଟୀକା ? ରେସରେ ଆଗରେ ଏନଡିଏ, କଡା ଟକ୍କର ଦେଉଛନ୍ତି ତେଜସ୍ୱୀ ।
କନକ ବ୍ୟୁରୋ : ବିହାର ନିର୍ବାଚନରେ ଏଥର ଦେଖିବାକୁ ମିଳିଛି କଡା ଟକ୍କର । ଗୋଟିଏ ପଟେ ବିହାର ରାଜନୀତିର ମୋଡ ବଦଳାଇଦେବା ଭଳି ଶକ୍ତି ରଖିଥିବା ତେଜସ୍ୱୀ ଯାଦବ । ଅନ୍ୟପଟେ ବିହାରରେ ଏନଡିଏର ନେତା ନୀତିଶ କୁମାର । ତେବେ ବର୍ତ୍ତମାନ ସୁଦ୍ଧା ଏନଡିଏ ଆଗରେ ରହିଥିବା ବେଳେ ନୀତିଶଙ୍କୁ କଡା ଟକ୍କର ଦେଉଛନ୍ତି, ୩୧ ବର୍ଷର ଯୁବକ ତେଜସ୍ୱୀ ଯାଦବ ।
Kanak News is now on WhatsApp
Join and get latest news updates delivered to you via WhatsApp
ବର୍ତ୍ତମାନର ରିପୋର୍ଟ ସୁଦ୍ଧା, ଏନଡିଏ ୧୩୩ ଆସନ ସହ ଆଗରେ ରହିଥିବା ବେଳେ, ମହାମେଣ୍ଟ ୯୯ ଆସନ ସହ ଆଗକୁ ବଢୁଛି । ତେବେ ଆଗକୁ ଫଳାଫଳ କଣ ହେବ, ତାଉପରେ ରହିଛି ସମସ୍ତଙ୍କ ନଜର । କାରଣ ବର୍ତ୍ତମାନ ଏମିତି ବି ଅନେକ ଆସନ ରହିଛି ଯେଉଁଠି କି, ୫୦୦ରୁ ଅଳ୍ପ ଭୋଟ୍ ବ୍ୟବଧାନରେ ପଛରେ ରହିଛି ଆରଜେଡି ।
ଚଳିତ ନିର୍ବାଚନରେ ଯୁବବର୍ଗଙ୍କୁ ନିଜ ଆଡକୁ ଆକୃଷ୍ଟ କରିଥିଲେ ଆରଜେଡିର ଯୁବ ନେତା ତେଜସ୍ୱୀ ଯାଦବ । ସଭାମଂଚ ନିକଟରେ ବିପୁଳ ଭିଡ ଜମାଇ ନିର୍ବାଚନୀ ସଭାରୁ ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଉପରେ ଜୋରଦାର ଆକ୍ରମଣ କରୁଥିଲେ ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ୱୀ । କେବଳ ଏତିକି ନୁହେଁ ନିର୍ବାଚନରେ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲେ ଆରଜେଡିର ଏହି ଯୁବ ନେତା । ତେଜସ୍ୱୀ ଯାଦବଙ୍କ ରାଷ୍ଟ୍ରୀୟ ଜନତା ଦଳ ଏକ ଆଂଚଳିକ ପାର୍ଟି ହୋଇଥିବାରୁ ରୋଜଗାର ଏହାର ପ୍ରମୁଖ ପ୍ରସଙ୍ଗ ପାଲଟିଥିଲା ।
ତେବେ ବର୍ତ୍ତମାନର ଫଳାଫଳ ସୁଦ୍ଧା ଏନଡିଏ ଆଗରେ ରହିଥିବା ବେଳେ ମହାମେଣ୍ଟ ପଛରେ ରହିଛି । ତେଜସ୍ୱୀଙ୍କ ତେଜକୁ କାଟି ଆଗକୁ ବଢିଚାଲିଛନ୍ତି ନୀତିଶ କୁମାର । ତେବେ ଚୂଡାନ୍ତ ଫଳାଫଳ ସୁଦ୍ଧା କାହାକୁ ବହୁମତ ମିଳୁଛି, ଏବେ ତାକୁ ହିଁ ଅପେକ୍ଷା ।