ଭୁବନେଶ୍ୱର ବିମାନ ବନ୍ଦର ଛାତ ଭୁଶୁଡିବା ଘଟଣା : ଭଙ୍ଗା ଛାତ ଚାପି ହୋଇ ଚାଲିଗଲା ଶ୍ରମିକଙ୍କ ଜୀବନ, ଅଘଟଣକୁ ନେଇ ସନ୍ଦେହ ଘେରରେ ବିମାନ ବନ୍ଦର କର୍ତ୍ତୃପକ୍ଷ ଓ ଠିକା ସଂସ୍ଥାର ମାଲିକ ।
କନକ ବ୍ୟୁରୋ : ଭୁବନେଶ୍ୱର ବିମାନ ବନ୍ଦର ଛାତ ଭୁଶୁଡିବା ଘଟଣାରେ ଜଣେ ଶ୍ରମିକଙ୍କ ମୃତ୍ୟୁ ହୋଇଛି । ଦୀର୍ଘ ଘଣ୍ଟାର କସରତ ପରେ ଏନଡିଆରଏଫ ଓ ଅଗ୍ନିଶମ ବିଭାଗ ଛାତ ତଳେ ଦବି ରହିଥିବା ଶ୍ରମିକଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ନେଇଥିଲେ । ତେବେ ହସ୍ୱିଟାଲରେ ତାଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ମୃତକ ଜଣକ ହେଉଛନ୍ତି କଟକ ବଡମ୍ବା ଅଞ୍ଚଳର ଅନ୍ତର୍ଯ୍ୟାମୀ ଗୁରୁ । ତାଙ୍କ ଶରୀର ଉପରେ ସିମେଣ୍ଟ ଖଣ୍ଡ ସହ ରଡ ଓ ବାଲି ମଧ୍ୟ ପଡି ରହିଥିଲା । ଯେଉଁଥିପାଇଁ ତାଙ୍କର ମୃତ୍ୟୁ ହୋଇଥିଲା । ସେହିଭଳି ଅନ୍ୟଜଣେ ଆହତ ଶ୍ରମିକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଚିକିତ୍ସା କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏଠି ପ୍ରଶ୍ନ ଉଠୁଛି ଶ୍ରମିକଙ୍କ ମୃତ୍ୟୁ ପାଇଁ ଦାୟୀ କିଏ? ବିମାନ ବନ୍ଦର କର୍ତ୍ତୃପକ୍ଷ ନା ଠିକା ସଂସ୍ଥା । କାରଣ ରାତିରେ ବିନା ସୁରକ୍ଷାରେ କିଭଳି ନିର୍ମାଣ କାର୍ଯ୍ୟ ପାଇଁ ଅନୁମତି ଦିଆଗଲା ଓ ଏଥିପାଇଁ କିଏ ଅନୁମତି ଦେଲା ତାହାକୁ ନେଇ ଉଠିଛି ପ୍ରଶ୍ନ । ଏହାଛଡା ନିର୍ମାଣ କାର୍ଯ୍ୟ କରୁଥିବା ଠିକା ସଂସ୍ଥାର ମାଲିକ ଯେଉଁଭଳି ବେପାରୁଆ ବୟାନ ଦେବା ସହ ଦୁର୍ଘଟଣା ପାଇଁ ଶ୍ରମିକଙ୍କୁ ଦାୟୀ କରିଛନ୍ତି ତାହା ଅତ୍ୟନ୍ତ ଲଜ୍ଜାଜନକ । ଏପରିକି ଏହି ଘଟଣାରେ ବିମାନ ବନ୍ଦର କର୍ତ୍ତୃପକ୍ଷ ମୁହଁ ନ ଖୋଲିବା କେଉଁଠି ନା କେଉଁଠି ତାଙ୍କ ଉପରେ ପ୍ରଶ୍ନବାଚୀ ଛିଡା କରିଛି । ଏହାଛଡା ନିମ୍ନମାନର କାର୍ଯ୍ୟ ପାଇଁ ଏଭଳି ଦୁର୍ଘଟଣା ହୋଇନାହିଁ ତ ସେ ଦିଗକୁ ମଧ୍ୟ ଅଙ୍ଗୁଳି ଉଠିଛି । ତେଣୁ ଏହି ଘଟଣାର ଯାଞ୍ଚ କରି କଡା କାର୍ଯ୍ୟାନୁଷ୍ଠାନ ନେବାକୁ ଉଠିଛି ଦାବି ।