କନକ ବ୍ୟୁରୋ : ପଶ୍ଚିମ ଓଡ଼ିଶାର ମୁଖ୍ୟଦ୍ୱାର କୁହାଯାଉଥିବା ସମ୍ବଲପୁରରେ ଏଥପ ପଞ୍ଚାୟତ ନିର୍ବାଚନ ମାହୋଲ ବେଶ ସରଗରମ ରହିଛି । ଗତ ୨ଟି ପଞ୍ଚାୟତ ନିର୍ବାଚନରେ ଫଳାଫଳ ଚଳିତ ନିର୍ବାଚନକୁ ଆହୁରି ରୋଚକ କରିଛି । ଖାସକରି ଦଳୀୟ ଚିହ୍ନରେ ଲଢାଯାଉଥିବା ଜିଲ୍ଲା ପରିଷଦ ଆସନ ହାତେଇବାକୁ ଜୋର ଦେଉଛନ୍ତି ରାଜନୈତିକ ଦଳ । କିନ୍ତୁ ଚଳିତ ପଞ୍ଚାୟତ ନିର୍ବାଚନରେ କାହାକୁ ଭରସିବେ ଭୋଟର ତାହା ଏବେ ବି ସସପେନ୍ସରେ । ପ୍ରଚାରରେ କଟକଣା ଲାଗିଥିବାରୁ ଭୋଟରଙ୍କ ମୁଡ ପରଖିବା ଏବେ ନେତାଙ୍କ ପାଇଁ କଷ୍ଟକର ହୋଇପଡିଛି । ଯାହା ରାଜନୈତିକ ଦଳର ଚିନ୍ତାକୁ ବଢାଇଦେଇଛି ।
Kanak News is now on WhatsApp
Join and get latest news updates delivered to you via WhatsApp
ସମ୍ବଲପୁରରେ ୧୮ଟି ଜିଲ୍ଲା ପରିଷଦ ଜୋନ ରହିଥିବା ବେଳେ ୨୦୧୨ରେ ୧୪ଟି ଆସନ ହାତେଇ ଜିଲ୍ଲା ପରିଷନ ଅଧ୍ୟକ୍ଷ ପଦ ହାତେଇଥିଲା ବିଜେଡି । କିନ୍ତୁ ୨୦୧୭ର ପଞ୍ଚାୟତ ଫଳାଫଳ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । କାରଣ ବିଜେପି ସପକ୍ଷରେ ଭୋଟ କରିଥିଲେ ଭୋଟର । ୧୩ଟି ଜୋନ୍ ହାତେଇବା ସହ ଜିଲ୍ଲା ପରିଷଦ ଅଧ୍ୟକ୍ଷ ପଦ ନିଜ ଅକ୍ତିଆରକୁ ନେଇଥିଲା ବିଜେପି । କିନ୍ତୁ ଚଳିତ ନିର୍ବାଚନର ଫଳାଫଳ କଣ ହେବ ତାହା ଏବେ ବି ସସପେନ୍ସରେ । ତେବେ ଏହି ସସପେନ୍ସ ଭୋଟର ବିଜେଡିର ମୁଣ୍ଡବିନ୍ଧାର କାରଣ ପାଲଟିପାରନ୍ତି । ଏସବୁ ଭିତରେ ବିଜେଡି ପାଇଁ ଭଲ ଖବର ହେଲ. ୨୦୧୯ ନିର୍ବାଚନ ପରଠାରୁ ଦଳ ଏଠାରେ ଅଧିକ ସଙ୍ଗଠିତ ହୋଇଛି । ନଳିନୀକାନ୍ତ ପ୍ରଧାନ ପଞ୍ଚାୟତ ପରୀକ୍ଷା ପାଇଁ ରଣନୀତି ପ୍ରସ୍ତୁତ କରୁଥିବା ବେଳେ ରେଢାଖୋଲ ବିଧାୟକ ରୋହିତ ପୂଜାରୀ ଏହାକୁ ତୃଣମୂଳସ୍ତରକୁ ନେବା ଆରମ୍ଭ କରିଛନ୍ତି । ରେଢାଖୋଲ ନିର୍ବାଚନମଣ୍ଡଳୀ ଅଧୀନରେ ୬ଟି ଜିଲ୍ଲା ପରିଷଦ ଜୋନ ରହିଥିବା ବେଳେ ଏଠାରେ କ୍ଲିନସୁଇପ କରିବା ଲକ୍ଷ୍ୟରେ ରଖିଛି ବିଜେଡି । କାରଣ ରେଢାଖୋଲରେ ଦଳର ଦବଦବା ଯଥେଷ୍ଟ ଅଧିକ ରହିଛି । କିନ୍ତୁ ବିଜେଡି ପାଇଁ ବୁମେରାଂ ହୋଇପାରନ୍ତି ବିଦ୍ରୋହୀ ପ୍ରାର୍ଥୀ । କାରଣ ଦଳୀୟ ସମର୍ଥନ ଆଶାରେ ପଞ୍ଚାୟତସ୍ତରରେ ଅନେକ ପ୍ରାର୍ଥୀ ମୈଦାନକୁ ଓହ୍ଲାଇଛନ୍ତି । ଯାହାର ସିଧାସଳଖ ପ୍ରଭାବ ଜିଲ୍ଲା ପରିଷଦ ଆସନ ଉପରେ ପଡିପାରେ ବୋଲି ଚର୍ଚ୍ଚା ହେଉଛି । ଆଉ ଯଦି ଏଭଳି ହୁଏ ତେବେ ବିଜେଡି ପୁଣିଥରେ ଏଠାରେ କମବ୍ୟାକ୍ କରିବାର ସମ୍ଭାବନା କ୍ଷୀଣ ।
ଅନ୍ୟପଟେ ବିଜେଡିର ବିଦ୍ରୋହୀ ପ୍ରାର୍ଥୀ ମୈଦାନକୁ ଓହ୍ଲାଇବା ବିଜେପିକୁ ବେଶ ସୁହାଇବ ବୋଲି କୁହାଯାଉଛି । କାରଣ ହେଭିୱେଟ ନେତା ଜୟନାରାୟଣ ମିଶ୍ରଙ୍କ ନେତୃତ୍ୱରେ ଏଠାରେ ବିଜେପି ପଞ୍ଚାୟତ ଲଢେଇକୁ ଓହ୍ଲାଇଛି । ଗ୍ରାମାଞ୍ଚଳରେ ଜୟନାରାୟଣଙ୍କ ଲୋକପ୍ରିୟତା ଭୋଟ ରାଜନୀତିକୁ ଯଥେଷ୍ଟ ପ୍ରଭାବିତ କରିବାର ସମ୍ଭାବନା ରହିଛି । ଏହାଛଡା ରେଙ୍ଗାଲିରେ ବିଜେପି ନିଜର ସଙ୍ଗଠନକୁ ଯଥେଷ୍ଟ ସୁଦୃଢ କରିସାରିଥିବାରୁ ଏଠାରେ ପ୍ରବେଶ କରିବା ପ୍ରତିଦ୍ୱନ୍ଦ୍ୱୀଙ୍କ ପାଇଁ ସହଜ ହେବ ନାହିଁ । ଏସବୁ ବ୍ୟତୀତ ଦଳ ଭିତରେ ଅନ୍ତଃକନ୍ଦଳ ନ ରହିବା ବିଜେପି ପାଇଁ ଆର୍ଶୀବାଦ ସାଜିଛି । ତେଣୁ ୨୦୨୨ରେ ମଧ୍ୟ ୨୦୧୭ର ପୁନରାବୃତ୍ତି କରିବାକୁ ଲକ୍ଷ୍ୟ ରଖିଛି ବିଜେପି । ତେବେ ଶାସକ ବିଜେଡି ରାଜ୍ୟ ସରକାରଙ୍କ ଜନକଲ୍ୟାଣକାରୀ ଯୋଜନାକୁ ସାମ୍ନାକୁ ଆଣି ନିର୍ବାଚନ ମୈଦାନକୁ ଓହ୍ଲାଇଥିବାରୁ ଏହା ବିଜେପିର ଭୋଟବ୍ୟାଙ୍କକୁ କିଛି ମାତ୍ରାରେ ପ୍ରଭାବିତ କରିପାରେ ବୋଲି କୁହାଯାଉଛି ।
ବିଜେଡି-ବିଜେପିର ଏହି ଲଢେଇ ଭିତରେ କଂଗ୍ରେସ କିନ୍ତୁ ଯଥେଷ୍ଟ ପଛରେ ରହିଥିବା ଚର୍ଚ୍ଚା ହେଉଛି । ଦଳ ପାଖରେ ନା ବଡ ଚେହେରା ଅଛନ୍ତି ନା ଏଥର ପ୍ରଚାର ମାଧ୍ୟମରେ ଲୋକଙ୍କ ପାଖରେ ପହଞ୍ଚିବାର ସୁଯୋଗ ରହିଛି । ଏଭଳି ସ୍ଥିତିରେ ଦଳର ସବୁଠୁ ବଡ ସମ୍ପତ୍ତି ହେଉଛି ପାରମ୍ପରିକ ଭୋଟବ୍ୟାଙ୍କ । ତେଣୁ ଏହି ଭୋଟବ୍ୟାଙ୍କରେ ଯଦି ସେଭଳି ବଡ ଧରଣର ହଲଚଲ ନ ହୁଏ ତେବେ କଂଗ୍ରେସ ମଧ୍ୟ ବିଜେଡି-ବିଜେପିର ଏହି ଲଢେଇରେ ନିଜକୁ ଦୃଢ ଦାବିଦାର ଭାବେ ଛିଡା କରିପାରିବ । ଆଉ ଏଥିପାଇଁ ସ୍ଥାନୀୟ ନେତାଙ୍କୁ ତୃଣମୂଳସ୍ତରରେ ସଙ୍ଗଠିତ ହେବାକୁ ପଡିବ । ଯାହାଦ୍ୱାରା ସମ୍ବଲପୁରରେ ହାତର ପଞ୍ଝା ଆହୁରି ସୁଦୃଢ ହୋଇପାରିବ । ତେବେ ଏସବୁ ଭିତରେ କେଉଁ ଦଳ ପ୍ରତି ସମ୍ବଲପୁରବାସୀ ଆସ୍ଥା ପ୍ରକଟ କରିବେ ତାହା ଉପରେ ସମସ୍ତଙ୍କର ନଜର ରହିବ ।