କନ୍ଧମାଳ ଗଡ ବଞ୍ଚାଇବା ବିଜେଡି ପାଇଁ ଚ୍ୟାଲେଞ୍ଜ! ଶାସକ ଦଳକୁ ସହଜରେ ବାଟ ନ ଛାଡିବାକୁ ବିରୋଧୀଙ୍କ ବ୍ଲୁ-ପ୍ରିଣ୍ଟ ।
କନକ ବ୍ୟୁରୋ : କନ୍ଧମାଳରେ ଶୀତର ଲହରୀ ଏଯାଏଁ କମିନଥିବା ବେଳେ ଜିଲ୍ଲା ରାଜନୀତିକୁ ଉଷ୍ମ କରିଛି ପଞ୍ଚାୟତ ନିର୍ବାଚନ । ଚଳିତଥର ପ୍ରଚାର ଉପରେ କଟକଣା ଲାଗିଥିବାରୁ ନେତା ଏବେ ଘର ଘର ବୁଲି ଭୋଟ ମାଗୁଛନ୍ତି । ଖାସକରି ଜିଲ୍ଲା ପରିଷଦ ଆସନ ହାତେଇବା ଏବେ ୩ ଦଳର ଫୋକସରେ ରହିଛି । ଦଳୀୟ ଚିହ୍ନରେ ଜିଲ୍ଲା ପରିଷଦ ଲଢାଯାଉଥିବାରୁ ଏହାକୁ ଅକ୍ତିଆର କରିବାକୁ ୩ ଦଳର ନେତାଙ୍କ ମଧ୍ୟରେ ବ୍ୟସ୍ତତା ବଢିଯାଇଛି । ନାମାଙ୍କନପତ୍ର ଦାଖଲ ଶେଷ ହୋଇଥିବାରୁ ପ୍ରାର୍ଥୀଙ୍କୁ ଧରି ଏବେ ପ୍ରଚାର ମୈଦାନରେ ନେତା । ତେବେ ଚଳିତଥର କନ୍ଧମାଳବାସୀ କାହା ସପକ୍ଷରେ ଭୋଟ କରିବେ ତାହାର ଆକଳନ କରିବା ଏବେଠାରୁ କଷ୍ଟକର ହୋଇପଡିଛି । କାରଣ ଗତ ନିର୍ବାଚନରେ କିଛି ସେଭଳି ସ୍ଥିତି ଦେଖିବାକୁ ମିଳିଥିଲା । ପୂରା ରାଜ୍ୟରେ ଦ୍ୱିମୁଖୀ ଲଢେଇ ହେଉଥିବା ବେଳେ କନ୍ଧମାଳରେ ତ୍ରିମୁଖୀ ଲଢେଇ ଦେଖିବାକୁ ମିଳିଥିଲା । ଭୋଟର ଭାଗ ଭାଗ ହୋଇଯାଇଥିଲେ । ଯାହାର ଫାଇଦା ଶାସକ ବିଜେଡିକୁ ମିଳିଥିଲା ।
Kanak News is now on WhatsApp
Join and get latest news updates delivered to you via WhatsApp
୨୦୧୭ ପଞ୍ଚାୟତ ନିର୍ବାଚନରେ ୧୮ଟି ଜିଲ୍ଲା ପରିଷଦ ଆସନରୁ ବିଜେଡି ଏକାକୀ ୯ଟି ଆସନ ହାତେଇଥିବା ବେଳେ କଂଗ୍ରେସ ଓ ବିଜେପି ୪ଟି ଲେଖାଏଁ ଜିଲ୍ଲା ପରିଷଦ ଅକ୍ତିଆର କରିଥିଲେ । ଆଉ ଗୋଟିଏ ଆସନରେ ସ୍ୱାଧୀନ ପ୍ରାର୍ଥୀ ବାଜି ମାରିଥିଲେ । ଆଉ ଜିଲ୍ଲା ପରିଷଦ ଅଧ୍ୟକ୍ଷ ଚୟନ ବେଳେ ସ୍ୱାଧୀନ ପ୍ରାର୍ଥୀଙ୍କୁ ବଡ ଭୂମିକାରେ ଦେଖିବାକୁ ମିଳିଥିଲା । ବିଜେଡି ହାତେଇଥିଲା ଜିଲ୍ଲା ପରିଷଦ ଆସନ । ଆସନ ଦୃଷ୍ଟିରୁ ବିଜେଡି ଆଗରେ ରହିଥିଲା କିନ୍ତୁ ଭୋଟ ଦୃଷ୍ଟିରୁ ୩ ଦଳ ମଧ୍ୟରେ କଡା ଟକ୍କର ଦେଖିବାକୁ ମିଳିଥିଲା । ତେବେ ଚଳିତଥର ସ୍ଥିତିରେ ବଡ ଧରଣର ପରିବର୍ତ୍ତନ ଦେଖିବାକୁ ମିଳିପାରେ । କାରଣ ପଞ୍ଚାୟତ ନିର୍ବାଚନ ଫଳାଫଳର ଝଲକ ୨୦୧୯ ନିର୍ବାଚନରେ ଦେଖିବାକୁ ମିଳିନଥିଲା । ଜିଲ୍ଲାର ୩ ବିଧାନସଭା ଆସନରେ ବିଜେଡି ବିଜୟ ବାନା ଉଡାଇଥିଲା । ତେଣୁ ଏହି ଧାରାକୁ ପଞ୍ଚାୟତ ନିର୍ବାଚନରେ ବଜାୟ ରଖିବାକୁ ବିଜେଡି ପକ୍ଷରୁ ବ୍ଲୁ-ପ୍ରିଣ୍ଟ ପ୍ରସ୍ତୁତ ହୋଇଛି । ବିଜେଡିର ବଡ ଚେହେରା ଭାବେ ସାଂସଦ ଅଚ୍ୟୁତ ସାମନ୍ତଙ୍କ କାନ୍ଧରେ ରହିଛି ପଞ୍ଚାୟତ ଲଢେଇ ଭାର । ତେବେ ବିଜେଡିର ଫଳାଫଳକୁ ଗୋଷ୍ଠୀ କନ୍ଦଳ କିଛି ମାତ୍ରାରେ ପ୍ରଭାବିତ କରିପାରେ ।
ଅନ୍ୟପଟେ ୨୦୧୯ ନିର୍ବାଚନ ପରେ ବିଜେପି ଓ କଂଗ୍ରେସ ସଙ୍ଗଠନକୁ ସୁଦୃଢ କରିବା ଉପରେ ଗୁରୁତ୍ୱ ଦେଇଛନ୍ତି । ନିକଟରେ ଫୁଲବାଣୀରେ କଂଗ୍ରେସ ଏକ ବିଶାଳ ସମାବେଶ କରି ଅନ୍ୟ ଦଳର କିଛି ଛାମୁଆ ନେତାଙ୍କୁ ଦଳରେ ସାମିଲ କରି ବିଜେଡିର ଚିନ୍ତାକୁ ବଢାଇ ଦେଇଛି । ସେହିପରି ବିଜେପି ମଧ୍ୟ ଏହି ରେସରେ ପଛରେ ନାହିଁ । ଦଳ ମୋଦୀ ସରକାରଙ୍କ ଜନକଲ୍ୟାଣକାରୀ କାର୍ଯ୍ୟକ୍ରମର ଦ୍ୱାହି ଦେଇ ଭୋଟରଙ୍କ ଭରସା ଜିତିବାକୁ ଉଦ୍ୟମ କରୁଛି । ଜିଲ୍ଲାରେ ଉଭୟ ଦଳ ନିକଟରେ ସେଭଳି ଜଣାଶୁଣା ଚେହେରା ନଥିବା ବେଳେ ଦଳୀୟ ପ୍ରାର୍ଥୀ ନିଜ ବଳରେ ନିର୍ବାଚନ ବୈତରଣୀ ପାର ହେବାକୁ ପ୍ରସ୍ତୁତ ହେଉଥିବା ଚର୍ଚ୍ଚା ହେଉଛି ।
ବିଜେଡି ଚଳିତ ନିର୍ବାଚନରେ ଆସନ ସଂଖ୍ୟା ବୃଦ୍ଧି ସହ ଜିଲ୍ଲା ପରିଷଦ ଅଧ୍ୟକ୍ଷ ପଦ ହାତେଇବାକୁ ପ୍ରସ୍ତୁତ ହେଉଛି । ତେବେ ବିଜେଡିକୁ ଏତେ ସହଜରେ ବାଟ ଛାଡିବେନି ଉଭୟ ବିଜେପି ଓ କଂଗ୍ରେସ । ବିଜେପି ଯୁବ ଭୋଟରଙ୍କୁ ନିଜ ଆଡକୁ ଆକର୍ଷିତ କରୁଥିବା ବେଳେ କଂଗ୍ରେସର ପାରମ୍ପରିକ ଭୋଟ ବଳରେ କନ୍ଧମାଳ ଗଡ ଜିତିବାକୁ ଆଶା ରଖିଛି । ଦାରଡଙ୍ଗବାଡିରେ କଂଗ୍ରେସ କ୍ରମାଗତ ଭାବେ ଏକପାଖିଆ ବିଜୟ ହାସଲ କରିଆସୁଛି । ଏଭଳି ସ୍ଥିତିରେ ଶାସକ ବିଜେଡି ପାଇଁ କନ୍ଧମାଳ ଜିଲ୍ଲାରେ ଗଡ ରକ୍ଷା କରିବା ଏତେ ସହଜ ହୋଇନପାରେ । ତେବେ ଗତଥର ଭଳି ଏଥର ଉଭୟ ଦଳ ଶାସକ ବିଜେଡିକୁ କଡା ଟକ୍କର ଦେଇପାରୁଛନ୍ତି ନା ବିଜେଡି ନିଜର ସଙ୍ଗଠନ ବଳରେ ସହଜ ବିଜୟ ହାସଲ କରୁଛି ତାହା ଉପରେ ସମସ୍ତଙ୍କର ନଜର ରହିବ ।